Josué 24 - Kaxinawá Bíblia (BR)

Josué hawẽ henekĩ hatu hãtxa wanikiaki, na hãtxarã

¹ bari betsatiã Siquém mae anushũ Josué Israelĩ enabu shukua dasibi hatu itxawatã hanushũ hatũ shanẽ ibubu inũ, hatũ shanẽ ibu beshmasbu inũ, ha irabeaibu unãshũ hatu pewanikabu inũ, mekenika betsabu hau Deus bebũ mapui benũbũ hatu kena bea ha dapi mapuabũ

² Israelĩ enabu dasibi Deusũ hãtxa Josué hatu yuikĩ: —Eska nukũ shenipabu Israelĩ mekenika Senhor Deusũ ea yuishinaki. Matu yuinũ ea nĩkakãwẽ: “Henewã Eufrates ukeri kesha betsaurishũ matũ shenipabu Tera inũ hawẽ huni bake dabe Abraão inũ Naor hiweshũ yushĩ betsa betsapa duawakĩ kẽwãpaunibukiaki.

³ Haskai hiweabũ Henewã Eufrates kesha anu hiwebiakẽ matũ shenipabu Abraão besti katubirãkĩ iwenishũ Canaã nawabũ mai pakea anu hiwemakubaũkĩ hawenabu hau pahairashanũbũ hawẽ huni bake Isaque ẽ inãniki.

⁴ Hanushũ Isaque yumeimakẽ hawẽ huni bake dabe Jacó inũ Esaú ẽ inãrianiki. Hawẽ huni bake ma ewa dabeabu Esaú mananã Mati Seir mai pakea ẽ ibuwamaniki. Hakia Jacó inũ hawẽ huni bakebu Egito anu bunibuki.

⁵ Txipu Egito anushũ matũ shenipabu itxakawaibũ Moisés inũ Arão yunutã hanushũ hawẽ dateti damiwakĩ eãri Egito anu hiweabu tenãkĩ itxakawakubaĩkĩ hanua matũ shenipabu ẽ hatu tashnimabiraniki.

⁶ Egito anua hatu tashnimabaĩkĩ ẽ hatu iyuaya Ianẽwã Tashipaki kemai buaibũ ana Egito nawabũ hatu atxinũ ika hatũ cavalo itxapaki katsumea buaibu inũ cavalo tarãti itxapariki hawẽ bukĩ hatu txibãbiranaibũ

⁷ hatuwẽ datekĩ ea yukaibũ habu inũ Egito nawabu namakis pashkakĩ kebẽkĩ ẽ meshu waniki. Txipu Ianẽwã Tashipa matũ shenipabu pukebainaibũ Egito nawabũri hatu txibaĩ pukebaĩpanãbũ henewẽ atximakĩ ẽ hatu yamawakĩ keyuni haska mã unaiĩ. Hanu tsua hiweabumanu bari itxapa ẽ kushipa uĩ mã hiweakeakekubirani mã unãriaii.

⁸ Hanua Hene Jordão kesha betsauri ha Amorreu nawabũ mai pakea anu ẽ matu iwea matube detenameaibu ẽ matu merabewakĩ hatu maemamaya detekĩ mã hatu nitxĩkĩ hatũ mai pakea tibi mã ibuwakubiranimabuki.

⁹ Hanushũ Ziporĩ bake Balaque Moabe nawabu shanẽ ibũ matu maemakatsis ikĩ hau matu yupuyunũ Beorĩ bake Balaão kenakĩ hawenabu Balaquẽ hatu imatãkẽ

¹⁰ hakia Balaão matu yupunũ ishũ ea yukabia ẽ haska yunuamawẽ taeshũ matu yupumamakĩ hawẽ pepa hãtxa besti yuimakĩ matu yaushikĩ merabewakĩ ẽ matu mekeyamaki.

¹¹ Hene Jordão pukebirã Jericóki kematushitã mã hatube detenameaibu ẽ hatu itxakawakĩ babuwakẽ mã hatu detekĩ keyuniki. Ha nawabu ẽ hatu babuwaya Amorreu nawabu inũ, Ferezeu nawabu inũ, Canaã nawabu inũ, Heteu nawabu inũ, Girgaseu nawabu inũ, Heveu nawabu inũ, Jebuseu nawabu mã hatu maemakĩ yamawaimaki.

¹² Hanushũ mã huriama bebũkiri i bina mirima ẽ yunua hatuwẽ datei Amorreu nawa shanẽ ibu dabe inũ hawenabu ẽ hatu nitxiã matũ deteti matxatu txaipawẽ inũ matũ piawẽ mã hatu deteama ibubis hatũ mae henebaini pashayamabuki.

¹³ Bai mã sepama inũ hiwe mã wama ẽ matu ibu wamawẽ taeshũ hatũ mae tibi anu hiwekĩ uva nishi inũ oliva hi huni betsã banani anua hawẽ bimi bikĩ itxawashũ mã piaii”, akĩ Deusũ hawẽ hãtxa ea yuishinaki.

¹⁴ Haskakẽ Senhor Deuski mesekubaĩshãkãwẽ. Parananãma ikũ kayabi huĩti shabakabiwẽ Deus duawakubaĩshãkãwẽ. Ukeri henewã Eufrates inũ Egito anushũ matũ shenipabũ yushĩ betsa betsapa kẽwãbiapaunibũ habu henetã Senhor Deus besti duawakĩ kẽwãkubaĩshãkãwẽ.

¹⁵ Hakia Senhor Deus mã duawakatsi ikama haratu yushinĩ hãtxa mã txibãkatsi ikimẽkaĩ, ikis katukãwẽ. Henewã Eufrates ukeri matũ shenipabũ yushĩ betsa betsapa habũ kẽwãpauniburã, habumẽkaĩ. Nenu hiweshũ Amorreu nawabũ yushĩ betsa betsapa habũ kẽwaĩbumẽkaĩ, matũ shinãkãwẽ. Hakia ẽ aĩ inũ ẽ bakebubetanã, Senhor Deus duawakĩ nũ txibãpakeshanaii, heneamarã— hatu waya

¹⁶ dasibibũ nĩkatã Josué kemakĩ: —Nuku haska shinãshũyamawe. Senhor Deusũ hãtxa henetã yushibu betsa betsapa nũ txibãkatsi ikamaki.

¹⁷ Egito anushũ nukũ ibubu tsumawatã dayahairamakĩ hatu itxakawaibũ nukũ mekenika Senhor Deusũ Egito anua nuku pashawakĩ nenu nukũ ibubube nuku iwekubiraniki. Habiatiãri nukũ berubi hawẽ kushipa pehairawẽ dami betsa betsapa wakĩ nuku e imakubirãkĩ hanu nũ kai anu inũ tsuabura nũ daĩbainai hatu nuku daĩmakĩ nemashũkĩ nuku mekekubiranimaki.

¹⁸ Haska wakĩ nuku bebũshũ na mai pepa anu hiwebaunabu nũ kaikiria nawabu dasibi Senhor Deusũ nuku hatu nitxĩshunimaki, nenu Amorreu nawabu kushipabu hiwebiakẽ haburi pashawakinã. Haska dasibi nuku ashũkubaĩmiswẽ taea nukũri nũ duawakatsis ikaii, nukũ mekenika Senhor Deusrã. Ha besti duawakĩ nũ txibãpakeshanaii, heneamarã— ikaibuwẽ taeshũ

¹⁹ Josué hatu yuikĩ: —Nukũ mekenika Senhor Deus tari meribi pepa hiwemistũ hawenabu yaushinikawẽ taeshũ hawara txakabu mei haki patapakĩ mã duawakĩ pewatirubumaki.

²⁰ Hakia Senhor Deusũ hãtxa henetã yushibu betsa betsapa mã kẽwaĩbu matũ txakabu ana buama shinãkĩ matu duawabianishũ itxakawakĩ matu yamahaira washanikiki, kupikinã— hatu wa

²¹ Israelĩ enabũ Josué kemakĩ yuikĩ: —Haska mĩ yuiai keska nũ haskatirumaki. Hawa heneama Senhor Deus besti nũ duawapakekatsis ikaii— akabu

²² Josué ana hatu yuikĩ: —Senhor Deusũ hãtxa besti txibanũ ishũ matũmebi unãtinaĩ mã hãtxaii— hatu wa dasibibũ ana yuikĩ: —Haa. Txanimaki. Habiaskas nũ shinaiĩ— ikaibũ

²³ —Haskakenã, ikis yushĩ betsa betsapa dami matu anua puta keyutã matũ shinã betsa watã matũ shenipabu Israelĩ mekenika Senhor Deusũ hãtxa besti matũ huĩti hirabiwẽ shinãpakeshãkãwẽ, parãmarã— hatu wa

²⁴ dasibibũ ana yuikĩ: —Hawẽ hãtxa dasibi nĩkakĩ hawara nukũ mekenika Senhor Deusũ nuku yunua besti nukũ huĩti hirabiwẽ duawakĩ nũ txibãpakeshanaii, hawa parãmarã— akabu

²⁵ habias shabatiã Siquém anushũ haska wakĩ duawashanaibu Josué hawenabube yubakatã hawẽ yunuti inũ hawẽ nemati hãtxa itxapa hatu yuikĩ yunutã

²⁶ habias hãtxa yunushu Deusũ hãtxa yusĩti una merã hatu keneshũtã hawẽ hatube yubakani hiwe dapi hi ewapa kushipa namã mishki ewapa hatu benimatã

²⁷ hatu dasibi ana yuikĩ: —Uĩkãwẽ. Na mishkirã, ha txanipaketi keskaki. Parananaĩ Senhor Deuski mã txakabutiru hawẽ unãmati keska Senhor Deusũ hawẽ dasibi nuku hãtxa washuki, nũ txakabuwaibu ha mishkipã nukukiri metutiru keskarã— hatu watã

²⁸ hanushũ Josué hatũ mai pakea tibi anu hatu nitxinikiaki.

Josué mawanikiaki, na hãtxarã

²⁹ Hatu hãtxa waima binupaketã Numnẽ bake Josué Senhor Deusũ tsuma 110 ano mawakẽ

³⁰ Efraimnẽ enabũ maiwã pakea mananã Mati Gaás nortekiri Timnate-Sera anu hawẽ mai pakea hanu Josué ibuwani anu hawẽ yura maiwanibukiaki.

³¹ Josué shanẽ ibuaitiã Israelĩ enabu hatũ mekenika Senhor Deus txibãkubainibukiaki. Josué hiweatiã inũ ma mawabiaimakẽ duawakĩ hatũ Senhor Deus heneama inibukiaki. Hanua ha shanẽ ibu anibu unanepa betsabũri dasibi Senhor Deusũ hatu ashuni shinãkubaini hiweyuabũri Israelĩ enabũ Senhor Deus txibãpakenibukiaki.

José shau bekubiranishũ Siquém anu hawenabũ maiwanibukiaki, na hãtxarã

³² Egito anua José shau besti bekubiranishũ mae Siquém anu Hamorĩ huni bakebu Siquém inũ hawẽ betsabu anua 100 ouro pei heshewẽ bai bikĩ Jacó ibuwani anu José shau maiwanibukiaki. Natianã, ha bai José bababunakiaki.

Arãonẽ bake Eleazar mawanikiaki, na hãtxarã

³³ Arãonẽ huni bake Deusbe hawenabu hãtxashunika Eleazar mawakẽ Efraimnẽ enabũ maiwã pakea mananã anu Eleazarĩ huni bake Finéias mae betsa ibu wamani anu hawẽ yura maiwanibukiaki.