Josué 23 - Kaxinawá Bíblia (BR)

Hawenabu mae hirabitũ hau Deus heneyamashãshũbũ Josué hatu yusinikiaki, na hãtxarã

¹ Bari itxapa Senhor Deusũ hatu detenamemakĩ merabewakĩ keyukẽ nawa betsa betsapa hiwebaunabube Israelĩ enabu ana datenameabumakẽ Josué anibui mestebuhairatã

² Israelĩ enabu hatũ shanẽ ibubu inũ hawẽ shanẽ ibu beshmasbu inũ hawẽ pepabu inũ txakabu unanikabu inũ hatũ políciabu kenakĩ hatu itxawatã Josué hatu yuikĩ: “Bari itxapa kai ma ẽ matu anibuhairashunaki. Ea nĩkairakãwẽ.

³ Matu merabewakĩ nawa shukua betsa betsapa hiweabu Senhor Deusũ habu matu nitxĩshunaya hawẽ daya dasibi matuwẽ detenameai mã uĩkubirãshinaki.

⁴ Hene Jordão inũ bari hikiaikiri ianẽwã ewapa Mediterráneo namakis nawa betsa betsapabu ẽ yamawani inũ nawa betsa betsapabu nũ matu nitxĩshũriamaki. Hatũ mai pakea tibi mã hanu ibu washanaibu ẽ matu pashkashuna hawẽ unãtiwẽ bikĩ matunabu shukua tibi hau hanu hiwekubaĩshanũbũ mã bimaki.

⁵ Haska matu yubani keska wakĩ tsuabura mã nitxĩriama hatũ mae tibi mebĩkĩ matu bebũkiri Senhor Deusũ habu matu nitxĩshunaya hatũ mai pakea tibi mã ibu washanaii.

^6-7 Haskakẽ nawa betsa betsapabu mã nitxĩriama mã hatu haibuwatã, hatũ yushibubu kena mã yuiyamashanũ inũ, hatũ yushibubu datã akĩ huni betsa mã yubamayamashanũ inũ, hatũ yushibubu mã duawayamashanũ inũ, hatũ yushibubu kẽwaĩ mã dãti iyamashanũ, haskawẽ taeshũ hawẽ unãmati una merã Moisĩ matu keneshuniki, matu nemakinã. Bai tanabainai keska wakĩ yusiuri inũ yusmauri dabekeama haska Moisĩ matu keneshuni txibãkĩ hawẽ nemati tibi nĩkakĩ hawẽ yunuti tibi akubaĩkĩ uĩrapakeshãkãwẽ, kushipai mestenepairã.

^8-9 Haska mã akubainai keska wakĩ matũ mekenika Senhor Deus heneyamapakeshãkãwẽ, matu bebũkiri nawa betsa betsapa kushipayabu nitxĩshuniwẽ taeshunã. Ha inũ, matu merabewaya tsuabũra matu nematirubuma iniki.

¹⁰ Haska matu yubani keska wakĩ matũ mekenika Senhor Deusũ hatu itxakawamiswẽ taeshũ matu bestitxaitũ 1.000 hunibu mã nitxĩtiruki, hatu kushimabaĩkinã.

¹¹ Haskakẽ ibubis mekekĩ matũ mekenika Senhor Deus betxipaihairakubaĩkãwẽ.

¹² Hakia Deusũ hãtxa txibaĩ mã txĩtũkĩ nawa betsa betsapa nenu hiweriabu haibuwatã hatũ aĩbuaibu aĩwãkubaini hatuki mã dasiaya

¹³ ana matu bebũkiri Senhor Deusũ hatu nitxĩshunama ishanikiki. Shinaĩrashãkãwẽ. Hakia hisĩ birũ keska wakĩ matu yabua inũ dispiwẽ matu kakush kakush aka keska wakĩ matũ beru anu musha tekea keska wakĩ parãkĩ nawa betsabũ matu itxakawaibũ na mai pepa matũ mekenika Senhor Deusũ matu ibu wamani anua mã debui keyushanaii, yamairã. Mã haskatiruwẽ taeshũ matũ mekenika Senhor Deus putataskayamashãkãwẽ.

¹⁴ Yura dasibi ishanaibu keskai ikis eari ẽ matu mawashũshanaii. Hawara pepa matũ mekenika Senhor Deusũ matu yubani ashũkĩ ma keyushinarã, matũ huĩti merã inũ matũ yushĩwẽ mã unãhairaii. Dasibi matu ashũkĩ hawẽ yubati hãtxa dasibi hakimama ishiãki.

^15-16 Hakia hawẽ yubani hãtxa danãkĩ yushibubu bebũ ana duawai mã dãti ishũ hatu kẽwãshanaya matuki dakekĩ matuki ana sinatahairakĩ hati ikis matu duawamis keska wakĩ ana akama hakia betsa betsapa matu tenemakĩ yupukĩ na mai pepa matu ibu wamani anushũ tere akĩ Senhor Deusũ matu hawaira yamawashanikiki, kupikinã”, hatu watã