João 20 - Kaxinawá Bíblia (BR)

Jesus bestẽkaina benanibukiaki, na hãtxarã

¹ Hanua Jesus mawaxina ana besteni matu yuinũ nĩkakãwẽ. Huĩrukũtitiã Jesusũ yura mixki tãpe merã dakakẽ usha dabea penai taei penariama mexukẽ domingotiã taeaya Jesus maiwakĩ hanaxinabu anua hatube Maria Madalena kakĩ tãpe bepemana uĩtã Jesusũ yura hayama uĩbirani

² Pedro inũ ea anu kuxitxakayamakirã nuku yuikĩ: —Nukũ Shanẽ Ibũ yura haniraki nuku buãbuki. Hanira datãbu nũ unãmaki— nuku wa

³ nĩkatã Jesus maiwaxinabu anu Pedrobe kai

⁴ kuxirabekaĩkĩ ea dukũ binukaĩ tãpeki

⁵ kemashũ dãkukaĩ tãpe merã uĩkĩ hawẽ yabuxinabu besti daka betxitã ẽ hikiriamakẽ

⁶ ea itxũ txipu Simão Pedro hui ha dukũri hikishũ hawẽ yabuxinabu uĩkĩ

⁷ hawẽ buyabuxinabu sebi pewashũ ha katxu datã uĩriaya

^8-9 hanua eari hikishũ hawẽ yura yama uĩtã: “Messias Cristo mawa ana bestẽshanikiki”, iwanã, Deusũ hãtxa una merã kenebianibu nũ nĩka pewariamabia: “Ẽ Shanẽ Ibu Jesus ma bestẽkainamẽkaĩ”, ikĩ ikũwãkĩ ẽ xinãniki.

¹⁰ Haskakaĩ uĩtani nũ ana txĩtũkiraniki, hanu nũ hiweanurã.

Maria Madalenaki Jesus nukui taenikiaki, na hãtxarã

¹¹ Hakia Maria Madalena katani ana txĩtũkirã hua mixki tãpe kesha nia kashai heneama nishũ ana uĩnũ ika dãkukaĩ tãpe merã uĩkĩ

¹² nai tsuma dabe tari hushupa sawea hanu Jesus datãxinabu anu hariri bupĩxinabukiri betsa tsauwa hariri tashkũwãxinabukiri betsa tsauria hatu betxitanaya

¹³ hanushũ nai tsuma dabetã yukakĩ: —Aĩbuũ, haskai mĩ kashai?— akabu —Ẽ Shanẽ Ibũ yura haniraki ea buãbuki. Hanira datãbu ẽ unãma benai ẽ kashai ikaii— hatu watã

¹⁴ nasaukekawã uĩbiakĩ tsua nia dabanẽ unãma Jesus betxia

¹⁵ hanushũ Jesusũri yukakĩ: —Aĩbuũ, haskai e iskaũ hanu hua mĩ kashai ikai? Tsua mĩ benai ikai?— aka mibã taurumis ikai dabanẽ Mariã xinãkĩ yuikĩ: —Ẽ Shanẽ Ibũ yura bushũ hani mĩ ea datanãshumẽkaĩ ea yuiwe, ẽ buairã— aka

¹⁶ Jesusũ yuikĩ: —Mariaã— aka hawaira dabeketã benimahairakĩ Hebreu hãtxawẽ yuikĩ: —Rabôni!— akĩ nukũ hãtxawẽ kenakinã: —Ẽ Yusĩnaã— iwanã, ikua

¹⁷ Jesusũ nemakĩ: —Ẽ Epa anu kariama uatiã ẽ matube hiwemis keskai ẽ ana matube itirumaki. Ea tsumakĩ ea baxiyamawe— iwanã, —Ẽ betsabu anu kashũ ẽ mia yuishu hatu yuiritãwẽ. Matu merabewai ẽ Epa anu dasinũ ika ẽ kashanaii. Ẽ Eparã, habia matũ Epariki. Ẽ Deus mekenikarã, habia matũ Deus mekenikariki— aka

¹⁸ Maria Madalena kashũ Shanẽ Ibu Jesus ana hiwea uĩtãshu hari Jesusũ ashu nũ hawẽ tsumabu nuku yuia nũ nĩkakẽ

Jesus bestẽkirã hawẽ tsumabu uĩmanikiaki, na hãtxarã

¹⁹ habias domingo mexu merã Tomé nukubemakẽ hiwe merã itxatã judeu shanẽ ibubuki datekĩ beputi nũ beshekĩ keyukẽ Jesus hikikaĩ damituxitã nuku naxui ika nishũ nuku hãtxa wakĩ: —Haska mã unãnumamẽ? Ma ẽ huai dateyamakãwẽ— nuku watã

²⁰ hanushũ nuku haska watã hawẽ mekẽ shui inũ hawẽ haxi shui nuku uĩmaya nukũ Shanẽ Ibu ana uiĩ nũ benimahairaya

²¹ ana nuku yuikĩ: —Haska mã unãnumamẽ? Ẽ matu hushuãki. Datetima kuxipa ẽ matu baxishunaii. Haska inũ, haska ẽ Epa Deusũ ea nitxĩkĩ yununi keska wakĩ ẽ matu nitxĩkĩ yunuriaii— iwanã,

^22-23 kuxipa wakĩ nukukiri kũtxũkaĩ kuxu atã nuku yuikĩ: —Yushĩ Pepa hayarikãwẽ. Haskatã tsuabura Deuskiri habu txakabu haya mã hakimawakẽ Deusũri hatũ txakabu hatu buashũshanikiki. Hakia hatũ txakabu mã hakimawamakẽ Deusũri hatũ txakabu hatu buashunama ishanikiki— nuku watã haniraki ana dami kaĩkẽ

Tomẽ Jesus uĩtã besti ikũwãnikiaki, na hãtxarã

^24-25 Jesusũ 12 tsuma kuxipaya betsa Tomé tsupibu bakekẽ hawẽ kenamisbu nũ shukua anu Jesus hua nũ uĩxĩkẽ habiatiãri nukube ikama ixĩkẽ mexukiri huai betsã Tomé nũ yuikĩ: —Nukũ Shanẽ Ibu hiwea nũ uĩxinaii— nũ akeakea nuku ikũwãma yuikĩ: —Hawẽ mekẽ anu mastaxinabu shui ẽ uĩyama habianuri ẽ metuti ẽ mistuama txatxixinabu hawẽ haxi shui ẽ mekẽwẽ ẽ mekĩ mistuama Jesus ana hiwea ẽ ikũwãtirumaki— nuku waxĩkẽ

²⁶ ana oito dia kaya Tomébe itxashũ ana nũ shui bepukĩ keyukẽ Jesus ana hikitã nuku bebũ damia naxui ika nishũ yuikĩ: —Haska mã unãnumamẽ? Ana ẽ huai ewẽ dateyamakãwẽ— iwanã,

²⁷ Tomé habis yuikĩ: —Ikis ea uĩriwe. Ẽ mekẽ shui mewe. Mekẽ sanãbaĩ ẽ haxi shui misturiyuwe. Ana ikũwãbuma keskama ẽ hiwea ea ikũwãwẽ— aka

²⁸ uĩtãs damapaikĩ Tomẽ yuikĩ: —Txanima mĩ ẽ Shanẽ Ibuki, mĩ ẽ mekenã yushĩ Deusrã!— aka

²⁹ —Ea uĩtãs mĩ ea ikũwaiĩ. Hakia habũ ea uĩyama ẽ haxi shui uĩyamabia ea ikũwãshanaiburã, Deusũ hatu duahaira waya benimakubaĩshãkanikiki— akai nũ nĩkaya ana habiaskariai damikainiki.

^30-31 Txanima ana hawẽ unãti dami itxapa Jesusũ nukũ berubi abiakubainikẽ dasibi ẽ matu keneshunamaki. Hakia dasibi mã uĩyamabia ẽ hãtxa ẽ keneai uĩkĩ nĩkakĩ unãtã: “Jesus Messias Cristoki, Deusũ bake kayabirã”, akĩ Jesuswẽ taea mã hiwei ikibi ishanai mã ikũwãshanũbũ ẽ matu keneshunaii.