João 18 - Kaxinawá Bíblia (BR)

Jesus atxitanũ ika bunibukiaki, na hãtxarã

¹ Deusbe nuku hãtxashuni menetã hanushũ nuku kaĩmabaĩkĩ pashku debu hawẽ kena Cedrom Jesusũ nuku pukemabaini hanu mibã shukua mixkiwẽ kenenibu anu ukemerã nũ habe hikikẽ

² hanu Jesusbe nũ itxakũkaĩmis anu habianu nũ ana itxakẽ hanu Judasĩ unãhairai

³ hari hatu iyui Deusbe nukunabu hãtxashunika shanẽ ibubu inũ fariseububetã hatu yunuabu hatiri Templo mekenikabu inũ Romano soldadobu shuku betsa Judasĩ hatu iyua hatũ detetiya mesebaini bĩ dekutã txasha dakabainaibũ

⁴ Jesus atxi beaibu dasibi ma unaĩwẽ taea nuku bebũ Jesus nitã hatu yukakĩ: —Mã tsua benai bekanai?— hatu wa

⁵ habũ atxi beaibũ betsã Jesus kemakĩ: —Jesus Nazaré anuarã— akaya Jesusũ ana yuikĩ: —Habia ẽ eaki— hatu waya Judasĩ hatu atximai kai hawairakaĩ ma habe nikẽ

⁶ haskai Jesus hãtxai nĩkatã txishtekiri shekibaini di ikaibũ

⁷ Jesusũ ana hatu yukakĩ: —Tsuaraka mã benai bei ikanai?— hatu wa ana habiaskari habũ yuikĩ: —Jesus Nazaré anuarã— akaibũ

⁸ —“Habia ẽ eaki”, akĩ ẽ ma matu yuishuki. Mã ea besti benaiwẽ taeshũ ẽ haibuaibu hatu meyamakãwẽ, hau bunũbunã— hatu wa

⁹ bebũkiri Jesusũ yuikĩ: “Epaã, mĩ ea yununi ẽ tsua hatu benuamaki”, akĩ Jesusũ yuishuwẽ taeshũ: “Ẽ haibuaibu meyamakãwẽ”, akĩ Jesusũ hatu nemaniki.

¹⁰ Hanushũ Simão Pedrõ hawẽ nupe txaipa sitã Deusbe nukunabu hãtxashunika shanẽ ibuhairatũ tsuma Malco mapeshpaikĩ maebaĩ pabĩki yusiuria pashteaya

¹¹ nemakĩ Jesusũ Pedro yuikĩ: —Ana hatu meama mĩ nupe ana hawẽri usũwẽ. Ẽ Epã haska ea yununi habiaskari wakĩ ea yumãwãkanikiki. Ea yauxiyamawe— aka

Anásĩ hiwe anua Jesuski Pedro dakei parananãnikiaki, na hãtxarã

¹² hanushũ hatũ shanẽ ibu capitãobetã Romano soldadobu inũ Templo mekenikabũ Jesus atxishũ meneshtã

¹³ iyukĩ ha dukũ hatũ shanẽ ibu Anásĩ hiwe anu iyuabũ hawẽ dais Caifás na bari bestitxai Deusbe nukunabu hãtxashunika shanẽ ibuhairatũ

¹⁴ bebũkiri judeubu hatu yuikĩ: “Nukunabu hau pashkai sa iyamashanũbũ huni bestitxai nukunabu mawashunaya mã pepakũkaĩshanaii”, akĩ hatu yuimanurã,

¹⁵ Jesus iyuaibũ Simão Pedro inũ eã hune txipu kakĩ nũ Jesus txibãkubaini shanẽ ibu Anásĩ enabũ ea unaĩbuwẽ taea hanu itxamisbu dĩtu anu Jesusbe ẽ hikiaya

¹⁶ hakia Pedro unãbumawẽ taeshũ nemakĩ niti akabu hikiama bai kesha Pedro nikẽ hanua hemaĩtĩ kene hanu hikiti shui anu ana kashũ shui mekenika aĩbu yukashũtã Pedro ẽ bitxiaya

¹⁷ shui mekenika aĩbũ Pedro yukakĩ: —Ha hunĩ tsuma betsarã, habia mĩ miamẽ?— aka —Earã, ẽ hamaki— akaya

¹⁸ hanua ma matsi beaya hanu dayamisbu inũ Templo mekemisbũ hemaĩtĩ txi keti watã yui mapubaunabu hatube naxui ika Pedrori yuaya

Deusbe hatu hãtxashunika shanẽ ibuhairatũ Jesus yukanikiaki, na hãtxarã

¹⁹ hanushũ Deusbe nukunabu hãtxashunika shanẽ ibuhaira ikũkainima ma tashnima anu Anásĩ hiwe anu bitxiabu hawẽ tsumabukiri inũ hawẽ yusĩakiri Jesus yuka taewa

²⁰ Jesusũ kemakĩ: —Nĩkaibũ ẽ hãtxakũkaĩmiski. Hanu itxati hiwe tibi inũ Templo hemaĩtĩ anushũ nukunabu itxamisbu anushũ shabakabi dasibibũ berubi ẽ hatu yusĩmiski, hune hatu yusĩamarã.

²¹ Ea yukama habũ ẽ hãtxa nĩkamisbu hatu yukawe. Hawara ẽ hatu yusĩmis unãhairakanikiki— ikaya

²² hari Jesusũ kemaya Templo mekenika betsa Jesus dapi nishũ mekẽ petxiuri kepais akĩ yuikĩ: —Nukũ shanẽ ibuhaira haska yuiyamawe— aka

²³ Jesusũ yuikĩ: —Ẽ yui txakayarã, ea unãmawe. Hakia ẽ pe yuibiaya haskakĩ e iskaũ mĩ ea deteai?— aka

²⁴ hãtxawẽ binutiruma unãtã Anásĩ hatu yunua Jesus meneshekea habiaska Deusbe nukunabu hãtxashunika shanẽ ibuhaira Caifás anuri iyuaibũ

Ana: Jesus ẽ unãmaki, ika Pedrõ hatu paranikiaki, na hãtxarã

²⁵ ha haska waibũ Simão Pedro hatube txĩ yui naxui ika yuaya betsabũ yukakĩ: —Mĩ hamamẽ, ha hunĩ tsuma betsarã?— abaunabu Pedrõ hatu parãkĩ yuikĩ: —Ẽ hamaki. Ẽ eamabĩ!— hatu wa

²⁶ hanushũ shanẽ ibuhaira binuatũ tsuma betsa Pedrõ patsãka hawenabũri Pedro yukakĩ: —Mibã shuku anushunã, Jesusberã, ẽ mia uĩyama ikirãshumẽ?— aka

²⁷ Pedrõ ana hari parãkĩ: —Ẽ hamaki— itanayas hawaira habiatiãri takara keui taeaya

Pilatos anu Jesus iyunibukiaki, na hãtxarã

²⁸ hanushũ Caifásĩ Jesus yukakĩ keyutã penaya Romano shanẽ ibu Pilatõs hiwe ewapa anu Jesus hau iyutanũbũ Romano soldadobu yunuaya judeu shanẽ ibubũ xinaĩ: “Nawã hemaĩtĩ anu hikia Moisés nuku yusĩniwẽ taea nawã detsiswẽ txakabutã ana Páscoa nawai besikĩ ẽ pitirumaki”, iki pepai nawayukatsi hikiabuma

²⁹ haskaibũ hatũ beya unãtã hatu anu Pilatos kaĩtã hatu hãtxa wakĩ yukakĩ: —Na huninã, hawa txakabu axiã mã hakiri yuiai?— hatu wa

³⁰ —Huni txakabumakenã, mianu nũ iweama ikeanaii. Unãti watã nuku kupishũwẽ— akabu

³¹ Pilatõsri hatu yuikĩ: —Iyushũ haska matũ shenipabũ matu yusĩpauni keska wakĩ matũmebi unãti watã kupitãkãwẽ— hatu wa judeu shanẽ ibubũ yuikĩ: —Nũ tenãpanã mĩ nuku nemamiski. Hau tenãnũbũ miã besti mĩ yunutiruki— akaya

³² haska wakĩ tenãshanaibu Jesusũ nuku yuixinarã, unãmabia habiaskari hatu amaya

³³ nĩkatã hawẽ kene merã ana hikishũ Pilatõs Jesus kenashũ yukakĩ: —Miarã, mĩ judeu shanẽ ibubu binu keyuamẽ?— aka

³⁴ Jesusũri yukakĩ: —Mimebi mĩ ea yukai? Huni betsã mia ekiri yunuaraka mĩ ea yukai ikai?— aka

³⁵ e itã Pilatõs yuikĩ: —Earã, ẽ judeumaki, haska mĩ ea yuipananã. Minabu judeubu inũ mĩ shanẽ ibubu Deusbe hãtxanikabũ mia ea inãkãshuki. Mĩ hawa txakabu mexinamẽ?— aka

³⁶ kemakĩ: —Earã, ẽ Shanẽ Ibu kayabiki. Mia yuinũ nĩkawe. Nenua hunibu shanẽ ibumisbu keskai ẽ shanẽ ibuamaki. Hakia ẽ kuxiparã, na nenu mai anua yurabũ xinaĩ hiweabu keskamaki. Hakia na, mai anua ẽ shanẽ ibuaya judeubũ ea atxishũ mia anu ea iweyamanũbũ ẽ tsumabu ewẽ taea nemakanai hatube detenamekeãkãshuki. Haskakẽ earã, ẽ Shanẽ Ibu kayabiki, nenuamarã. Ẽ hawa txakabu hayamaki— aka

³⁷ hanushũ Pilatõs ana yuikĩ: —Haskakenã, txanima mĩ shanẽ ibu kayabiraka— aka Jesusũ ana yuikĩ: —Mĩ haska hari yuiairã, ẽ Shanẽ Ibu kayabiki. Haskanũ ika yurabube hiwei ẽ tashnikiraniki, hatu txanima kayabi meshtãmairã. Tsuabũra txanima hãtxa abukĩ ẽ hãtxa nĩkamisbuki— aka

³⁸ Romano shanẽ ibu Pilatõs yuikĩ: —Txanima hãtxarã, hawamẽ?— itã haska wa hanu judeu shanẽ ibubũ manaibu anu ana kaĩkirã Pilatõs hatu yuikĩ: —Ha huni ẽ unãti washurã, hawa txakabu hayamaki.

Jesus hau mastanũbũ Pilatõs hatu yununikiaki, na hãtxarã

³⁹ Páscoatiã bari tibi huni bestitxai hawa wama ẽ matu nitxĩshũmis keska wakĩ, judeu shanẽ ibu kayabi Jesus hawa wama matu nitxĩshũpa?— hatu wa

⁴⁰ dasibibũ hui kuxipawẽ yunukĩ: —Ha nuku ashũama ha huni betsa Barrabás yumetsubiakẽ nuku ha kaĩmashũwẽ— akaibũ