João 15 - Kaxinawá Bíblia (BR)

Jesusrã, uva bana hawẽ tashu keskakiaki, na hãtxarã

¹ nũ benibaunaibu nuku ana yuikĩ: —Ana betsa matu yusĩnũ nĩkayukãwẽ. Earã, ẽ uva bana nia hawẽ tashu kayabiki. Ẽ Eparã, mibã ibuã mekekĩ meurumiski.

² Hatiri mebi tibi bimi hayamakẽ meshteshũ putamiski. Hakia hawẽ mebi tibi bimiyamis ana bimihaira wakĩ hawẽ ibuã bumeshtekĩ pewamiski, hau ana katakutã bimihairanunã. Ea ikũwaĩbu ẽ Epa Deusũ habiaskari washanikiki.

³ Ẽ hãtxa ẽ matu yusĩaĩ mã ikũwaĩwẽ taea mã ma xinã betsa haya mã ma shũpĩhairaki.

⁴ Hakia hawẽ tashu anua hawẽ mebi betsa meskea ana haska bimitirumaki. Habiaskari wakĩ ea henebaĩkĩ mã Deus benimawatirumaki. Haskakẽ ẽ matu putama keska wakĩ eari putayamashãkãwẽ.

⁵ Earã, ẽ mibã tashu keskaki. Maturã, mã hawẽ mebi keskabuki. Ebe haibunamekĩ bimi itxapaya keskakĩ mã Deus benimawatiruki. Eauma mã hawayatirumahairaki.

⁶ Ea haibuwama ewẽ petxiarã, hawẽ mebi bimiuma meshtetã putaima barĩ shana waxina itxawashũ kua keska wakĩ Deusũ txi anu hatu urẽshanikiki.

⁷ Hanua maturã, ebe ketashameshũ ẽ hãtxa xinãkĩ unãhairai hakimama txibãkubaĩkĩ hawara bikatsis ikĩ mã Deus yuka matu ashũshanikiki.

⁸ Haskai duapanãkĩ Deusũ kuxipa mã hatu kẽwãmairã, bimi itxapayai keskakĩ txanima ẽ tsumabu kayabi shabakabi mã ishãkanaii.

⁹ Eãnã, ẽ matu abuaii, haska ẽ Epã ea abukĩ akai keska wakinã. Haskawẽ taea ea putapakeyamashãkãwẽ, ẽ nui mã hayawẽ taearã.

¹⁰ Hawẽ hãtxa ẽ txibãyã ea abukĩ ẽ Epã ea putaismaki. Haska keskari wakĩ ẽ yunua hãtxa mã txibãyã matu abukĩ ẽ matu putamari ishanaii.

¹¹ Xinã txãkaĩ mã ebe benimahairanũbũ hawẽ benimati hãtxa ẽ matu yuiaii.

^12-14 Tsuara hawẽ haibuaibuwẽ nuikĩ abukĩ hatu merabewai mawashunai tsuã haskakĩ ana betsã binutirumaki. Ẽ hãtxa mã txibãkubainai mã ẽ haibuki. Eskaki, ẽ matu yunuairã. Ẽ matuwẽ nuikĩ abumiski. Haska txibãkĩ betsabuwẽ nui abunamekubaĩshãkãwẽ.

¹⁵ Hamẽ betsarã, hawẽ dayakiri hawẽ dayarubu shanẽ ibũ hatu shabakabi tapĩmaismaki. Hakia dasibi ẽ Epã ea yuia ẽ matu unãmaiwẽ taeshũ yunubiakĩ ẽ dayaru wakĩ matu kenama ẽ haibuwakĩ ẽ matu kenaii.

¹⁶ Mã ea katuama eã ẽ matu katuniki. Haskawẽ taeshũ ẽ matu yunuaii. Kashũ hatu yusĩkĩ mã bimi itxapa wai keska wakĩ ẽ tsumabu hatu wakĩ hau txĩtũyamanũbũ hatu kuxipa wakubaĩshãkãwẽ. Haska wakĩ ẽ kenayashũ Epa Deus hamapai tibi mã yuka matu ashũshanikiki.

¹⁷ Na haska ẽ matu yunuai keska wakinã, habũ ea ikũwaĩ betsabube hatuwẽ nui abunamekubaĩshãkãwẽ— iwanã,

Yurabũ Jesus danãnishũ hawenaburi danãshanaibu hatu yuinikiaki, na hãtxarã

^18-19 ana betsa nuku yuikĩ: —Habũ xinaĩ keska mã xinãyã ea ikũwãbumã matu abukeanaii. Hakia ikũwãbuma anua ẽ matu katuni habũ xinaĩ keska mã ana xinãmawẽ taeshũ ea dukũ danãxĩshũ maturi danãriashãkanikiki.

²⁰ Ẽ matu yuishurã, xinaĩrakãwẽ: “Dayakapã hawẽ tsuma binuismaki”, akĩ ẽ matu yuishuki. Haskakẽ ea itxakawanishũ habiabũri maturi itxakawashãkanikiki. Hakia betsabũri ẽ hãtxa nĩkanishũ matũ hãtxari nĩkakĩ ariashãkanikiki.

²¹ Hatũ ea yununi habũ unãbumawẽ taeshũ na haska tibi matu wakinã, mã ea txibaĩbuwẽ taeshũ matu ashãkanikiki.

²² Ẽ yusĩ hua hãtxamakẽ habu na mai anu hiweabũ ibubis xinaĩ: “Ẽ pepaki”, itirububia eskatiã ana haska washũ hatũ txakabu ibubis hũtãtirubumaki, mekeirã.

²³ Haska inũ, ea danãkinã, ẽ Epa Deusri danãriakanikiki.

²⁴ Ha inũ, hatu anushũ ẽ hawa hatu haska washũama txakabu xinãma ikeãkanaii. Hakia tsuã haska hatu anushũ haska washuĩsmabiakẽ Deusũ kuxipa hatũ berubi ẽ ma hatu uĩmabia uĩbiakĩ ea inũ ẽ Epa danãkanikiki.

²⁵ Haskakẽ Deusũ hãtxa yuishunikã yuikĩ: ‘Hawamawẽ taeshũ itxakawakĩ ea danãnibuki’, iwanã, keneni keska menekĩ ea danãkanikiki.

²⁶ Hanushũ maturi danaĩbũ ẽ Epa anua mekenã betsa matu anu ẽ yunua hanua Yushĩ Txanima Unãmanika hushũ ekiri matu unãmai ea hãtxashũshanikiki.

²⁷ Ha inũ, maturi ẽ tashnikiranai anua tapĩ mã ebe ikũkirãxinarã, mã ekiri hãtxai txaninikaburiki— iwanã,