Jó 38 - Kaxinawá Bíblia (BR)

Jó shinã betsa betsapa Deusũ unãti wamanikiaki, na hãtxarã

¹ Hanua niwe kushipa shubi shubi ikai anushũ hãtxa wakĩ Senhor Deusũ Jó yukakĩ:

² “Ẽ mia ashũmis hawa pe ekiri tapĩkĩ mĩ unãriamabia ekiri hatu yuikĩ shabakabi wama hunei mĩ hãtxakũkainairã, habia mĩ miaki”, atã,

³ “Mĩ kushipawẽ hawa dateama mĩ ea ikũhairawamisrã, ea uĩmawe, na yukati tibi ẽ mia yukai ea kemakinã.

⁴ Mĩ txanima unanepahairarã, ha mai dami wakĩ ẽ taewayarã, miarã, mĩ hani inimẽkaĩ ea yuiwe.

⁵ Mai dami wakĩ taewakĩ tana keyukĩ hatishũ hawẽ kesu wakea tsuã ani mĩ unaĩ? Tsua inimẽ, ha mai dami wai dayairã?

^6-7 Ẽ nai tsumabu benimahairakĩ ea kẽwaĩbũ penamahaira bishi hatiri txashai taekirani habe benimai kãtaibũ ha mishkipawã kushipahaira hawẽ mai mestẽwãkĩ ha dukũ hanakinã, tsuã animẽ?

⁸ Mai uke meranua dasibi ianẽwã tuebiranairã, tsuã hene nemakĩ maĩwẽ bepukĩ kesha wakĩ metu wabaunimẽ?

^9-10 Ianẽwã nemakĩ hawẽ kesha hatishũ kesu kawanawakĩ eã ẽ aniki. Dasibi bepu pewakinã, nai kuĩ hawẽ tari keska wakĩ inũ basnũri hawẽ bakeishta yabukuti keska wakĩ ianẽwã ẽ ashuniki.

¹¹ Haska watã ianẽwã yuikĩ: ‘Hanu besti kesua tũkash ikĩ tsakabirãbirãshãwẽ, ana unuri binuamarã’, akĩ ẽ nemaniki.

¹² Penai hau bari txashai pekiranunã, hiwekũkaĩkinã, mĩ ma haska yunuimamẽ, eã ẽ amis keska wakinã?

¹³ Mai hirabi hau shaba wanũ yunukĩ inũ huni txakabubu hau datei pashanũbũ mai taka taka akĩ hatu putakĩ mĩ kushipawẽ mĩ ma yunuimamẽ?

¹⁴ Bari txashakiranaya mai besu betsai mati matipa tari hawẽruai keskai tashi mirĩ itiruki.

¹⁵ Bari txashakĩ huni txakabubu atxibiatã hunekaĩmis keskai huni sinatamisbu keyushanikiki.

¹⁶ Ha ianẽwã uke merã hunea hanua habai uinã, mĩ ma katanimamẽ?

¹⁷ Hanu mawabu bumisbu meshuhaira anu hawẽ hikiti beputi shuirã, mĩ ma uĩtanimamẽ?

¹⁸ Mai hirabi hatishũ kesuakea hawẽ hashpa inũ hawẽ txaiparã, mĩ unaĩ? Haska ẽ mia yukakubainairã, txanima dasibi mĩ unã keyuimẽkaĩ, ea yuiwe.

¹⁹ Shaba inũ meshu hanu irumisrã, mĩ unaĩ?

²⁰ Hawẽ kati baiwẽ mai hirabi txaihaira dũkemabaũkĩ bari inũ meshu ana txĩtũwãbirãkinã, mĩ hatu yunutirumẽ?

²¹ Mĩ haska yunutirumahairaki. Mai bawakĩ dasibi ẽ dami waitiã mĩ kaini bari itxapa mĩ hayabia dasibi ẽ dami wani mĩ unãtirumahairaki.

^22-23 Hanu detenamei nuitapaibutiã huni txakabubu hawẽ hatu kupishanũ, iwanã, ha ui matsihaira inũ barush ui hanu ẽ arua hari kashũ mĩ ma uĩtanimamẽ?

²⁴ Haratu baiwẽ shaba hui ibubis txashakirani pabirãmismẽ? Niwe bari huaikiria shũku ibirani haskatã pua iki pabaĩmismẽ?

^25-27 Ha mai tsusĩhaira anu hanu tsua hiweabuma anu txa akĩ hau basi benemanũ tĩ ikaĩkaini kana baka baka ikai yunukĩ tsuã ui bepẽkĩ ui ima txakayamamismẽ?

²⁸ Ui inũ basnunã, hatũ dami wanirã, ibu hunirã, tsuamẽ?

^29-30 Mati keyatapahaira anua matsihaira wakĩ pashku inũ, hene inũ, ianẽwã batapa tãkimamisrã, tsuamẽ, haki banirã?

³¹ Bishi shukua hawẽ kena Sete-estrelo miã mĩ hatu meketirumẽ, hawa pashkamarã? Ha inũ, bishi shukua betsa Órionã, miã mĩ pashkatirumẽ, maewakinã?

³² Bishi shukua tibirã, hanu kaiaĩtianã, miã mĩ hatu tashnimamismẽ? Bishi shukua dabe Ursa Ewa inũ Ursã Bakerã, hanu dakai anu miã mĩ hatu maewakubaĩmismẽ?

³³ Nai anua shanẽ ibukĩ haska dayakĩ ẽ yunukubainairã, mĩ unaĩ? Haska ẽ yunumis mai anushũri habias keskari mĩ yunuriamismẽ?

³⁴ Hau miki ui itxakayamanũ mĩ hãtxa bestiwẽ nai kuĩ mĩ yunutirumẽ?

³⁵ Mĩ yunua haniara kana baka baka itã mia yuikĩ: ‘Nũ nenuki, mĩ nuku yunua nũ ikairã’, ikĩ mia yuibainaiburã, mĩ haska nĩkamismẽ?

³⁶ Tsuã yurabu unanepa wakubaĩmismẽ? Hunibũ yushĩ nĩkanikaya wakinã, tsuã hatu haska wakubaĩmismẽ?

^37-38 Unanepahairakĩ nai kuĩ hati haya tsuã tanatirumẽ? Mai mishpu tãki keyua dasibi tsusĩ anu tsuã ui imatirumẽ, nai kuĩki ũpash mata maĩ huka keska wakinã?

^39-40 Inu betsa leão yushanẽ hawẽ bakebu pimakĩ hatu yani wamanũ ika hatũ kini uke merã kasmai txaka merãshũ manaibu yuinaka miã deteshũ mĩ hatu beshũmismẽ?

⁴¹ Tete meshupã bakebu hawa pitima ĩsh ĩsh ikĩ ea merabe yukakubainaibũ tsuã ibu merabewa hatu piti bishũmismẽ?” atã,