Jó 31 - Kaxinawá Bíblia (BR)

¹ Aĩbu txipash ẽ aĩma uĩ hawẽ kemukĩ txutakatsi ikama Deusbe ẽ yubakaniki.

² Dasibi kushipahairatũ nai anua ana hawa hatu inãshanimẽkaĩ, habũ kanekĩ hawẽ aĩma txutakubainaibu dasibi hatu uĩmistunã?

³ Huni txakabubu inũ tsuabura yubakabiatã hawa akabuma habu ishãkanikiki, nuitapairã, habu ana hawa pe hiweamarã.

⁴ Hamapai sharabu ẽ akubaĩmis tibi Deusũ txanima ea uĩkubaĩmiski.

⁵ Txanima emebi shinã txakabuakĩ ẽ hatu hãtxa txakabuwaismahaira inũ tsuara paranũ, iwanã, ẽ shinãkubaĩsmarã, shabakabi txanima ẽ matu yuiaii.

⁶ Ẽ pepahaira wamis ea unãti wakĩ Deusũ besti hawẽ balançawẽ tana keska wakĩ ea tanakĩ pewashanikiki. Haska ea tanatã ẽ pepakẽ ea unãshanikiki.

⁷ Ẽ hiwea pepa henetã hawara uĩ kemukĩ txibaĩ kasmai ẽ mekẽwẽ hawara txakabu sharabu ẽ meimakẽ

⁸ hawara banakĩ ẽ txatxima hau betsabũ pikasmakĩ hawara ẽ banaima hau betse betse anũbũwẽ.

⁹ Txanima kemukĩ ea dapi hiweatũ aĩ uĩ kasmai hawẽ bene hanumakẽ parãtã ẽ txutaimakenã,

¹⁰ hawẽ taeshũ ẽ aĩ ea mebĩtã huni betsã tsumawakĩ escrava wabaina hau huni betsabũ ati wakĩ txutakubainũbũwẽ.

¹¹ Haska ẽ hiwei atimapamiswẽ taeshũ hau Deusũ ea kupihairashanũwẽ.

¹² Ẽ kena pepa ana shinãtima wakĩ ẽ mabu ea menũ keyũtirubuki. Hakia ẽ kaneismawẽ taea ẽ hawa dateamaki.

¹³ Ẽ dayarubu huni inũ aĩbũ hawara hawama bikatsis iki eki ha ikĩ haska ea yukaibu hatu danãma inãkĩ ẽ hatu merabewaimaki.

¹⁴ Ana haratu haska Deusũ betxipaiai ashũkĩ ẽ uĩmatirumẽ? Hamẽ ẽ kanemisrã, haskara ẽ Deuski txanitirumẽ, ea yukarã?

¹⁵ Ẽ dayarubu inũ eari habias Deusũ nukũ ewã shãkĩ anu nuku dasibi dami wakĩ hiwemaniwẽ taeshũ ẽ hatu nĩkakubainimaki.

¹⁶ Haska inũ, tsuara hawara hayama nuitapaibu hatu merabewakĩ ẽ heneama ikũkainimaki. Aĩbuaibu hawẽ bene mawanibu hatu yubanishũ hatũ piti inãkĩ ẽ hatu merabewakubainimaki.

^17-18 Aĩbu beneuma nuitapai hau tsuã hatu itxakawayamanũ mekekĩ bakeishta ibu huni hayabuma hatũ epa keskakĩ ẽ hatu merabewakubainimaki, piti eskarabes hayabia ẽmesti piama hatu pashkashũkubaĩkinã.

^19-20 Matsitiã tsuara yabukuti hayama nuitapai inũ tariuma matsi tenei mawakatsis ikai uĩkĩ ẽ txashuwã dani tari tima ẽ hatu inã hawẽ yabukui shanakubaĩkĩ benimakĩ ea yuikĩ: “Mĩ huni pepaki”, ea wakubainimabuki.

²¹ Shanẽ ibu kushipa betsabũ bakeishta ibu hayama itxakawaibu hatubetãs itxakawakatsi ikama haska ẽ txakabu ekiri yuikĩ shinãtirubu unaĩ ẽ pepa besti ikũkainimaki.

²² Na hãtxa ẽ dama yuiai ẽ txanitxakayarã, ẽ pũyã ibubis teketã ẽ pũti anua tsekei hau paninũwẽ.

²³ Deusũ ea kupikĩ tenemaya haskatã hawẽ kushipa ẽ nematiruma hawẽ ẽ datehairaii.

²⁴ Unanuma hiwenũ ishũ ouro mane itxapa itxawatã haki txiti inũ ika ẽ hawẽ kemukĩ shinãma ikũkainimaki.

²⁵ Dayakũkaini inabu itxapa inũ, mabu itxapa inũ, dayarubu itxapa inũ, pei itxapa ẽ hayabia haska sharabu ha shinaĩ ẽ hawẽ hawa keĩsmahairaki.

²⁶ Bari hawẽ txasha hawẽruahaira kaĩkiranai inũ ushe babekei ewapai hawẽruahairari uĩkĩ

²⁷ hawa hune inũ shabakabi ẽ hatu kẽwã taskaismaki, ẽ mekẽ hatu meshãshũkinã.

²⁸ Hakia Deus danãkĩ bari inũ ushe ẽ kẽwãmiswẽ taeshũ Deus nai anua eki sinata txakayamakĩ ea kupitiruki, unãbiai ẽ haki petxiarã.

²⁹ Habu eki sinataibu txakabũ hatu atxia bika teneaibu hatu uĩ hatukiri shinã txakama ẽ hatuwẽ nui bestimiski.

³⁰ Eki sinataibu hau mawanũbũ hatukiri hãtxa txakabukĩ ẽ hatu yupuismahairaki.

³¹ Tsuara ebe hiweabũ nawa betsa txaikea beaibu hatuwẽ kemukĩ hatu itxakawanũ ikaibu

³² ha nawabuwẽ nuikĩ hiwemanu hau ushayamanũbũ hatu mekekĩ ẽ hiwe anu ishũ ẽ hatu ushãmiski.

^33-34 Huni betsabũ kanetã yurabuki datehairakĩ hatũ txakabu hunekubaĩmisbu keska wakĩ eãri hawara hune kanekĩ txakabuwatã ẽ huneismaki, tsua parãmarã. Hamẽ ẽ txakabuwẽ taea enabu eki dakekĩ ea danãtirubuwẽ taea ẽ hiwe bepu keyutã ẽ nishma dakaismaki.

³⁵ Na eska ẽ yuikubainai tsuãra hau ea nĩkashanũ hawẽ matu unãti wamati ẽ kena ibubis netãkĩ ẽ keneaii, bisha bisha akinã. Haska ẽ kanekubainimakiri huni betsã hau kenetã shanẽ ibubu inãnũwẽ, hawẽ ea yuãkĩ txitetirã. Ea haska waibũ Deus kushipahaira dasibi binuatũ ea nĩkamis shũ ea merabewakĩ hau ea kemanũwẽ.

³⁶ Haska ea txitebiaibu ẽ kaneismawẽ taea ma keneabu maiti keska ha kene sawetã dakeama ẽ nikaũshanaii.

³⁷ Shanẽ ibuhairatũ bake keskai pepai hawa txakabuma Deuski kematã dasibi ẽ akubiranai ha bebũ nishũ ẽ yui keyushanaii, hawa dakeamarã.

³⁸ Hanu ẽ yunumis mai uru pewakĩ dasibi pe mekekubaĩkĩ bari betsatiã banayuama ẽ huĩrukũmamiski, hau ana mai pepayunũ manakinã, hau ea huni mawayamashanunã.

³⁹ Hamẽ tsuãra yunu ẽ yumetsuima kasmai ẽ dayarubu parãkĩ ẽ hatu pe pakamakẽ

⁴⁰ ẽ bai anu shekiwã trigo ana hukuãma hakia musha besti benei inũ shekiwã cevadari ana hukuãma basi txakabu benekĩ hau dasibi ẽ yunu bai atxikubaĩshanũwẽ, akĩ hawenabu nemai hawẽ hãtxawẽ Jó yuinikiaki.