Jeremias 38 - Kaxinawá Bíblia (BR)

Ũpash pukĩ kini keyatapa pupus merã Jeremias dispiwẽ butebiashinabũ ana mapemanibukiaki, na hãtxarã

^1-3 Jeremiasĩ yurã kaiã yuikĩ: “Eska Senhor Deusũ matukiri yuikiki: ‘Na maewã anu bashikuaibu matxatu txaipa kenuhairawẽ kasmai, buni paepawẽ kasmai, isĩ paepawẽ haska tibiwẽ mã mawatirubuki. Hamẽ matũ yura mekei Caldéia nawabube mã hatube kairã, mã habũ matũ hiwea meketirubuki. Ha inũ, na maewã Jerusalém Babilônia shanẽ ibuhairatũ detenamenikabũ matu binui beshãkanikiki, tsuã hawa matu nemashũtirumarã’ ”, hatu akai Matãnẽ huni bake Sefatias inũ, Pasurĩ huni bake Gedalias inũ, Selemiasĩ huni bake Jucal inũ, Malquiasĩ huni bake Pasur betsã Jeremiasĩ hãtxa habũ nĩkabaĩ

⁴ hanua habu shanẽ ibu beshmasbu hatũ shanẽ ibuhaira anu bushũ yuikĩ: —Nukũ detenamenikabu inũ nukunabu nenu hiweyuabũ Jeremiasĩ hãtxa nĩkai datemisbuwẽ taeshũ ha huni hau tenanũbũwẽ. Nukunabu hãtxa pewama hatu hãtxa txakabu besti yuikĩ mesewakubaĩmiski— akabu

⁵ kemakĩ Zedequiasĩ hatu yuikĩ: —Peki. Haska mã akatsis ikai ha huni akãwẽ, matunakirã— hatu wa

⁶ haska hatu shinãmaiwẽ taeshũ Jeremias atxishũ shanẽ ibuhairatũ hiwe mekenikabũ hemaĩtĩ kenekauna anu shanẽ ibũ huni bake Malquiasĩ ũpash wakĩ mai kini keyatapa wanibu ũpash hayama anu mistukĩ dispiwẽ buteabu uke merã pupushaira anu Jeremias pukuabu seukua nikẽ

⁷ Etiópia nawa betsa hawẽ kena Ebede-Melequerã, shanẽ ibuhaira Zedequiasĩ hiwe hawẽrua anushũ dasibibũ betxipaimisbu ũpash aruti kini keyatapa anu Jeremias ma mistukĩ bitxiabu nĩkatã habiatiãri Benjamimnẽ enabũ mai pakeakiri hikiti shui beputikiri shanẽ ibuhaira Zedequias hunibube itxa tsaukẽ

⁸ shanẽ ibuhairatũ hiwe hawẽrua anua Ebede-Meleque kaĩkaini Zedequias anu kashũ hune basheshẽ yuikĩ:

⁹ —Ẽ shanẽ ibuũ, mibe hãtxapa?— aka —Peki. Haskaramẽkaĩ, ea yuiwe— aka Ebede-Melequẽ unãshubira yuikĩ: —Haska Jeremias ha hunibũ ashiãburã, txakabuhairaki. Ũpash aruti kini keyatapa pupus besti anu nitxĩshinabu haria buni mawaya nukũ mae ewapa anu ana misi hayamaki— aka

¹⁰ haska wa shinãtã Zedequiasĩ Etiópia nawa Ebede-Meleque yunukĩ: —Txanima txakabuki. Hawaira 30 huni iyushũ ha ũpash kini keyatapa anua Jeremias hanũ mawanũ hatu mapemamatãwẽ— aka

¹¹ Ebede-Melequẽ 30 hunibu katushũ shanẽ ibuhairatũ hiwe anu tari aruti dĩtu anu hikishũ hanua tari sheni katubaĩ ha ũpash kini keyatapa anu kashũ dispiwẽ tari buneshkĩ mestẽwãtã Jeremias anu panĩwãshũtã

¹² Etiópia nawa Ebede-Meleque yuikĩ: —Dispiwẽ besti mĩ neshea mĩ isĩtiruki. Tariwẽ besti pishkãwemetã dispi tsumawe, nũ mia mapemairã— akabu haska yunuabu Jeremias haskaya

¹³ hanushũ huni kushipabũ ninibirãkĩ Jeremias mapemabu hanua shanẽ ibuhairatũ hiwe hawẽrua mekenikabũ hemaĩtĩ kenekauna anu Jeremias nitxiãbu hanu hiweyukẽ

Zedequias Jeremiasbe hune hãtxanikiaki, na hãtxarã

¹⁴ Deusũ hãtxa yuishunika Jeremias hau ea anu iwenũbũ, iwanã, hatu yunua Senhor Deus kẽwãti Templo hemaĩtĩ mishkiwẽ kenebaunibu inũ hikiti shui tibi betsa 3 anu dĩtu pishta manaũri iyushũ Zedequias bebũ nitxĩtã buaibũ tsuã nĩkama shanẽ ibuhairatũ Jeremias yuikĩ: —Hawarakiri ẽ mia yuka huneama shabakabi txanimahaira hãtxa besti ea yuiwe, hawa ea parãmarã— aka

¹⁵ Jeremiasĩ kemakĩ yuikĩ: —Mĩ haskakiri ea yukai shabakabi ẽ mia yuiayarã, eki sinatakĩ hau ea tenanũbũ mĩ ea hatu yunushanaii. Ha inũ, Deusũ hãtxa shabakabi ẽ mia yusĩbia hawa ea nĩkakĩ mĩ shinã betsa wama ishanaii— aka

¹⁶ hakia hune yubakĩ Zedequiasĩ Jeremias hãtxa wakĩ yuikĩ: —Senhor Deusũ nuku hiwea inãmiswẽ taeshũ ẽ mia yubaii. Mĩ ea shabakabi yuibiaya hau mia tenanũbũ ẽ mia hatu yunu taskama ishanaii. Ha dikabi habũ mia tenãkatsis ikaibu anu ẽ mia yunuama ishanaii— aka

¹⁷ haska yubai nĩkatã Jeremiasĩ yuikĩ: —Israelĩ enabu mekenika Senhor Deus kushipahaira dasibi binuatũ hãtxa ẽ mia yuai nĩkawe. Babilônia shanẽ ibuhairatũ detenamenikabu shanẽ ibubu anu mia inũ minabũ yura hawaira dateama mĩ hatu inanainã, mã mawama ishãkanaii. Ha inũ, na maewã hawa kuabuma ishãkanikiki.

¹⁸ Hamẽ mĩ yura mĩ hatu inãmakẽ ha maewã Caldéia nawabũ hatũ kushipawẽ atxitã txiwẽ kuakĩ keyushãkanikiki. Miarã, mĩ haskatã pashatirumahairaki— aka

¹⁹ Zedequiasĩ kemakĩ yuikĩ: —Enabu Judá hatiri Caldéia nawabube husiyamabuwẽ taea hatuwẽ ẽ datehairaii. Habũ ea atxitã ẽ yura ea itxakawatxakayamatirubuki— aka

²⁰ Jeremiasĩ kemakĩ yuikĩ: —Haskamaki. Caldéia nawabũ mia hatu yunuabumaki. Senhor Deusũ hãtxa ẽ dama mia banabimashu ha besti nĩkakĩ txibãwẽ. Haskatã pe hiwekaini mĩ hawa mawama ishanaii.

²¹ Hamẽ mĩ yura mĩ hatu inãkatsi ikamakẽ mĩ haskashanaikiri Senhor Deusũ ma ea uĩmakĩ unãmashinaki.

²² Caldéia nawabu na maewã anu hikishũ Judá enabu shanẽ ibuhairatũ hiwe hawẽrua anua aĩbuaibu detenamenikabũ hatu dasibibu atxishũ kaĩmatã Babilônia shanẽ ibuhairatũ detenamenikabu shanẽ ibubu hatu inãkĩ yunuabu ha aĩbuaibũ yuikĩ: “Hawẽ haibuhairatũ parãkubaĩkĩ nukũ shanẽ ibuhaira maemamakãshuki. Hawẽ tae pupus anu seukua keska haska katimakẽ haki petxibaĩkĩ ma henebainabuki”, akĩ mikiri yuishãkanikiki— atã

²³ Jeremiasĩ shanẽ ibu hãtxa heneriama yuikubaĩkĩ: —Mĩ aĩbuaibu dasibi inũ mĩ bakebu dasibi Caldéia nawabu habu hatu inãkĩ yunushãkanikiki. Hakia mĩ shanẽ ibuhairabia mĩ hawa pashama ishanaii. Mia atxitã Babilônia shanẽ ibuhaira anu mia nitxĩtã mĩ maewã txiwẽ kuakĩ keyushãkanikiki— aka

²⁴ hanushũ Zedequiasĩ kemakĩ Jeremias yuikĩ: —Mĩ hiwea mĩ mekekatsis ikairã, na haska sharabu hãtxa mĩ ea yuishu tsua yuiyamashãwẽ.

²⁵ Ẽ mibe hãtxashu ẽ shanẽ ibu beshmasbũ nĩkabirã mia yukai beshãkanikiki. Habũ mia akĩ: “Haskara shanẽ ibuhaira Zedequias mĩ yuishinamẽ? Hamẽ hatunã, hawa mia yuishinamẽ?” iwanã, “Mã haskara yubakashina dasibi nuku yuiwe. Nũ mia yubaiwẽ taeshũ nũ mia tenãmaki”, akĩ mia yukashãkanikiki.

²⁶ Mia haska wabiabu hatu kemakĩ eska hatu yuishãwẽ: “Haria ẽ mawayamanũ Jônatasã hiwe anu ea ana yunuyamawe”, akĩ, “Haska besti shanẽ ibuhaira ẽ ea ashiãki”, akĩ hatu yuishãwẽ— abaini kashĩke

²⁷ Zedequias Jeremiasbe hãtxashina nĩkatã shanẽ ibubu beshmasbu dasibibũ uĩtanũ ika Jeremias anu bushũ yukati betsa betsapa yukabiakubainabu, haska Zedequias ma yunushina besti Jeremiasĩ hatu yuia hatũ hãtxa tsuã nĩkama ishiãwẽ taeshũ Jeremias hawa wama unanuma henebainabu

²⁸ shanẽ ibuhairatũ hiwe hawẽrua mekenikabũ hemaĩtĩ kenebauni anu habianus Jeremias hiweyukẽ habiatiãri Caldéia nawabu detenamenikabu beshũ Jerusalém atxinibukiaki.