Jeremias 37 - Kaxinawá Bíblia (BR)

Senhor Deus hau yukashunũ shanẽ ibuhaira Zedequiasĩ Jeremias ea anikiaki, na hãtxarã

¹ Jeoaquimnẽ huni bake Conias Judá enabu mai pakea anu hiweabu shanẽ ibubiakẽ atxitã Josiasĩ huni bake betsa Zedequias hau ha hatũ shanẽ ibunũ, iwanã, Babilônia shanẽ ibuhaira Nabucodonosorĩ Zedequias shanẽ ibu wabainimakẽ

² hakia haska hawẽ hãtxa Senhor Deusũ Jeremias yuikĩ yunumakubainai keska Zedequias inũ hawẽ yununika beshmasbu inũ yurabũ hawẽ hãtxa nĩkakĩ hawa txibãkĩ ashuãbumakẽ

³ haskabiakĩ: “Jeremias uĩ butãkãwẽ, hau nukukiri nukũ mekenika Senhor Deus nukukiri hãtxashununã”, iwanã, hau yuishũtanũbũ Selemiasĩ huni bake Jucal inũ Maaséiasĩ huni bake hawenabu Deusbe hãtxashunika Sofonias shanẽ ibuhaira Zedequiasĩ hatu yunua buabu

⁴ habiatiãri Jeremias atxitã bitxiriabuma hawa wabuma yurabu mapuabu anu nashui ika niaki haki nukutã

⁵ hanua habiatiãri Egito anua Faraónẽ detenamenikabu itxapa tashnibirãkĩ Jerusalém merabewanũ ika beaibu Caldéia nawabu detenamenika itxapabũ Jerusalém kebauni nati ishũ hatu tsaka tsaka akaibũ Egito nawabu beaibu bana nĩkatã hatube detenamakatsi ikama hatu henebainaibũ

⁶ hanua Deusũ hãtxa yuishunika Jeremias Senhor Deusũ yunukĩ ana yuikĩ:

⁷ “Ea Israelĩ enabu mekenika Senhor Deusũ eska ẽ mia yuiaii. ‘Hau ea yukanũbũ Judá enabu shanẽ ibuhairatũ hatu yunua beabu Zedequias eska ea yuishũwẽ: Matu merabewanũ ika Faraónẽ detenamenikabu itxapa tashnibiabirani beshiãbu hatũ mai pakea Egito anu ma ana txĩtuãbuki.

⁸ Hakia Jerusalém atxishũ hatu detenũ ika Caldéia nawabu bebiashina ana bushiãburã, ha Caldéia nawabu ana Jerusalém anu beshãkanikiki. Haskabirã ha maewã atxi keyutã txiwẽ kuashãkanikiki.

⁹ Ea ẽ Senhor Deusũ bebũkiri ẽ matu yuiai ea nĩkakãwẽ. Caldéia nawa detenamenikabu ma bushiãbu ana beabuamaki, iwanã, ikũwãkĩ haska shinãyamakãwẽ. Txanima ana beshãkanikiki.

¹⁰ Matu detenũ ika Caldéia nawa detenamenikabu dasibi ana beabu mã hatu detekĩ keyutiruki. Hakia mã hatiri hatu detetxaka habu mawama isĩ tenei maniabu shushai shinã mestẽwãtã benibaũ ana bei hikishũ matũ maewã kuakĩ keyushãkanikiki’, akĩ na haska hãtxa ea hatu yuishũwẽ”, aka

Bitxiti hiwe merã Jeremias bitxinibukiaki, na hãtxarã

¹¹ Faraónẽ detenamenika itxapabu beaibu Caldéia nawabũ nĩkatã Jerusalém dapikea Caldéia nawabũ hatu henebaini ma bushiãbũ

¹² Benjamimnẽ enabũ mai pakea anushũ hawẽ betsabũ mai pashkaimabu hawenari ibu watã hanu paketã hiwenũ ika Jerusalém anua Jeremias tashninũ ika kaya

¹³ hanu hikiti shui hawẽ kena “Benjamim” anu kematanaya Hananiasĩ baba, Selemiasĩ bake hawẽ kena “Jerias” hikiti shui mekenikabu hatũ shanẽ ibũ Jeremias niti atã ha akĩ yuikĩ: —Caldéia nawabuki mĩ hatuki dasi kaii!— aka

¹⁴ Jeremiasĩ kemakĩ yuikĩ: —Ẽ hari haska kainamaki, Caldéia nawabu anu kairã!— aka haska wabia nĩkamas Jeremias atxitã shanẽ ibu beshmasbu anu iyushũ hatu yuikĩ:

¹⁵ “Tashnikainũ ikaya ẽ iweshuki”, hatu wa habu Jeremiaski sinatahairakĩ hau bitxinũbũ shanẽ ibu beshmasbũ hatu yunua kusha kusha atã keneshunika Jônatasã hiwebiakẽ ma bitxiti hiwe washiãbu anu iyushũ bitxiabu

¹⁶ hiwe namã mai merã dĩtu pishta meshu tẽ ikai anu nitxĩshũ mekeabu shaba itxapa hari Jeremias ikũkainaya

¹⁷ hanushũ hau bitxiti hiwe anua Jeremias kaĩmabaĩkĩ hawẽ hiwe ewapa hawẽrua anu hau iwenũbũ shanẽ ibuhaira Zedequiasĩ hatu yunua bitxiti hiwe anua iweabu Zedequiasĩ Jeremias hune yukakĩ: —Senhor Deusũ hãtxa kaka bena mĩ ana hayamẽ?— aka Jeremiasĩ kemakĩ yuikĩ: —Haa. Mĩ eskakiaki, ẽ mia yuiai nĩkawe. Mĩ pemaki. Babilônia shanẽ ibuhairatũ mia atxishanikiki— atã

¹⁸ Jeremiasĩ hatũri yukakĩ: —Ha bitxiti hiwe anu hawawẽ dabanã ea bitximabumẽ? Mikiri hawa txakabuhaira ẽ akimamẽ? Mĩ yununika beshmasbukiri hawa txakabuhaira ẽ ariaimamẽ? Tsua nukunabu ẽ txakabuwaimamẽ? Hawa matukiri txakabu ẽ hayamaki.

¹⁹ Ha dikabi Deusũ hãtxa yuishunikabu txanitxakakĩ matu yuikĩ: “Babilônia shanẽ ibuhairatũ hawẽ detenikabu iweshũ matu inũ matũ mai pakea matu detei nenu beama ishãkanikiki”, akĩ matu yuikubainaiburã, hania haburã?

²⁰ Shanẽ ibuũ, ẽ mia merabe yukaii. Mĩ ea ashũtirumẽ? Haria ẽ mawayamanũ Jônatasã hiwe anu ea ana hatu yunuyamawe— abia

²¹ nĩkatã shanẽ ibũ hiwe hawẽrua mekenikabũ hemaĩtĩ kenekauna anu mekeshũ shaba tibi misi ewapa bestitxai hau inãkubainũbũ shanẽ ibuhaira Zedequiasĩ hatu yunua harishũ mekekubaĩkĩ misi hayayukẽ misi wanikabũ bai anua shaba tibi misi ewapa bestitxai beshũbirãbiranabu shanẽ ibũ hiwe hawẽrua mekenikabũ hemaĩtĩ kenekauna anu Jeremias hiweyukẽ,