Isaías 9 - Kaxinawá Bíblia (BR)

Deus shanẽ ibuhairatũ bake hawẽ unanuma hiweti kaĩshanikiaki, na hãtxarã

¹ Galiléia mai pakea anu Zebulom maewã inũ Naftalĩ maewã anu ha dapi nawabũ Deus ikũwãbuma hiweabu, Hene Jordão kesha ukeri inũ Ianẽwã Mediterráneo kesha betsauri nawabu hiweabu Deusũ ha dukũ hatu itxakawabiapaunishũ ana betsatiã Deus habuwẽ nuikĩ hatu duahairawashanikiki.

² Ha yurabu meshu merã punu nuka mapua keskabu ẽ hatu merabewaya bĩ ewapa txasha tashnia ea hawa unãbuma ha nawabu meshu merã hiwea keskabũ ha bĩ uĩshãkanikiki.

³ Senhor Deusuũ, hawẽ benimati ewapa mĩ ma yunuaki, nũ hawẽ benimahairairã. Nukũ yunu tseka keyutã nũ benimamisbu keskai, dasibi mia bebunua benimashãkanikiki. Tsuabũra hawara mabu hawẽrua pepa hatu pashkashunabu bi benimai keskai mia bebunua benimatxakayamashãkanikiki.

⁴ Tsuãra hatu tsuma washũ hatu bika tenemaibu inũ, bika betsa betsapa habũ meaibu inũ, shanẽ ibubũ hatu itxakawamisburã, haburã, mĩ hatu nemakĩ putamashanaii, ha Midiã nawabu mĩ hatu yamawani keska wakinã.

⁵ Soldadobu detenamei hatũ bitxi tae keyatapa sawea barush barush ibaĩmisbu inũ, hatũ tari himi has mapumisbu haburã, txiwẽ mĩ hatu yamawakĩ kuashanaii.

⁶ Hamẽ betsarã, Deusũ hawẽ kushipawẽ dasibi betsa wakĩ bakeishta nuku inãshanikiki. Ha bake nuku anu yunua kaĩshanikiki. Hatũ kushipa bitã shanẽ ibuhairashanikiki. Hawẽ kena tibi inãkinã, eska washanikiki: Hawẽ yubakani nũ haskashanai unãmanika pehairaki. Deus kushipahaira tsuã binutirumaki. Epa hiweibi hiweaki. Hawẽ taea Deusbe unanuma hiwetiki.

⁷ Ha yumetã tsauirã, Davi shanẽ ibuni anu tsaushanikiki. Shanẽ ibuhairakĩ hawẽ kushipawẽ mai hirabi anu shanẽ ibukĩ tsuma keyubaũshanikiki. Hawẽ unanuma hiweaibu keyuama inũ hawẽ yunuti kushipa keyuama ipakeshanikiki. Ha shanẽ ibuhairairã, mestẽ tsuã maewakĩ tsekatiruma habias ipakeshanikiki. Deus kushipahaira dasibi binua hawẽ nui pae tsuã nuka watirumatũ nuku haska washũshanikiki.