Isaías 7 - Kaxinawá Bíblia (BR)

Ha dukũ Deusũ hãtxa Isaíasĩ Acaz yuinikiaki, na hãtxarã

¹ Jotãonẽ bake Acaz, Uziasĩ babarã, Judá anu hatũ shanẽ ibuaya habiatiãri Síria nawa shanẽ ibuhaira hawẽ kena Rezim hawẽ mae anu shanẽ ibuaya hanua Israel shanẽ ibuhaira Remaliasĩ bake Peca hatu shanẽ ibushunaya ha dabe dasitã Jerusalém hatu detetã mebinũ ika ibiaibũ hakia haska washũ atirubuma inibukiaki.

² Haskaibutiã tsuãra shanẽ ibuhaira Acaz inũ hawenabu anu hatu banabimakĩ: “Síria nawabu Efraim enabube dasitã matuki yubakakanikiaki”, hatu wa hanua Acaz inũ hawenabũ haska nĩkatã datebauni huĩti bene bene iki hi shukua niwẽ hatu bubi bubi amis keskaibũ

³ hanushũ Senhor Deusũ Isaías yuikĩ: “Ha tari hanushũ patsamisbũ basi bai anu ha baiwẽ katãwẽ. Kai pashku debu anu shãtu wanibu anu ha deshũ anu mĩ huni bake Sear-Jasubebe hikikaĩ shanẽ ibu Acaz hari uĩ ka haki nukutã

⁴ eska yuitãwẽ: ‘Síria shanẽ ibu Rezim hawenabube inũ Remaliasĩ bake matuki sinatahairai txi tsistu dekẽbia ma nukai keskabuki. Haskawẽ taea mesei hatuwẽ dateama mimebi pe mekewe.

⁵ Síria nawa inũ Efraimnẽ enabu inũ Remaliasĩ bake shanẽ ibuhaira habũ matu txakabuwanũ ika yubakakanikiki. Habu hãtxai:

⁶ ‘Judá mai pakea anu hikibainã, hatu datetã nũ hatu maemarã, nukũ shanẽ ibu wakinã, Tabealĩ huni bake anãshãkãwẽ’, ibiaibũ

⁷ hakia Senhor Deusũ habukiri yuikĩ: ‘Tsuã taska haska watirumahairaki!

^8-9 Síria mai pakea maewã hanushũ shanẽ ibuhaira hiweshũ yunumisrã, Damascoki. Rezimnã, Damasco shanẽ ibuhairaki. Hamẽ Efraim mae pakea maewã hanushũ shanẽ ibuhaira hiweshũ yunumisrã, Samariaki. Remaliasĩ huni bake shanẽ ibuhairai Samaria anu hiweaki. Haskabiakubainaibũ 75 ano keyuriamatiã Efraim maewã yamashanikiki. Hamẽ maturi mã Deuskiri shinãkĩ pe mestẽwãmarã, maturi habiaskariai mesteãma mã keyushanaii’, matu waikiki. Atãwẽ.”

Emanuel kaĩshanaikiri Isaíasĩ ana Deusũ hãtxa Acaz yuinikiaki, na hãtxarã

¹⁰ Acaziĩ, Senhor Deusũ mia ana yuikiki. Nĩkawe:

¹¹ “Mĩ Senhor Deusũ hau haska tsuã atiruma mia ashunũ hawẽ unãmati hawara yukawe, na mai bemakia kasmai, mai uke merãhaira mai meranua kasmai, manaũrihaira nai anuarã”, aka

¹² Acazĩ Isaías nĩkatã kemakĩ: “Eã ẽ haska watirumahairaki, ẽ shanẽ ibu Senhor Deus unãti wakĩ hawẽ unãmati yukakinã”, ikaya

¹³ hanushũ Isaíasĩ ana yuikĩ: “Davi shanẽ ibuhairani anua hawẽ bababuũ, ea nĩkakãwẽ, matu yuinunã: Ẽ hunĩ mia yunubia danãkĩ mĩ ea bika tenemaii. Hakia ẽ Deus ana danãhairakĩ ẽ Deus mã bika tenemariaii.

¹⁴ Mĩ haska shinãbiaya Senhor Deus kayabitũ hawẽ unãmati hatũ matu uĩmashanikiki. Txipash tsuã txutariama anua huni bake nanetã kaĩshanikiki. Ibuã hawẽ kena kenakinã, Emanuel washanikiki.

¹⁵ Ha huni bake kaĩmashunã, bakeishtatũ awa txutxu tãki inũ buna bata pikubaĩshanikiki.

¹⁶ Hawa txakabu inũ hawa pepa unãriama haskaitiã ha mai pakea anushũ shanẽ ibuhaira dabetũ mia dateaiburã, hatũ mai pakea henebainabu ana tsua hayama ishanikiki.

¹⁷ Senhor Deusũ mia anu txakabuhaira hatiãra yunushanikiki, mĩ mae anu hiweabu inũ minabu mĩ hiwe hawẽrua anu hiweabu anu kaĩmakinã. Efraim inũ Judá mã pashkanitiã haska mã hiweisma txakabuhaira matu anu tashniai mã uĩshanaii. Na haska txanirã, Assíria shanẽ ibuhairatũ hatu ashanaikiri yuinikiaki.

¹⁸ Egito henewã kesha ukeri txai hiwebaunabu Senhor Deusũ hatu yunua haria ha yurabu ha baritiã txupe beas shãkanikiki. Assíria anu hiweaburi shara beasriashãkanikiki.

¹⁹ Habu itxatã hawairabirã hanu hunei mawa shãkĩ tibi hunei inũ, tãpe tibi anu huneriai inũ, ni mushaya tibi anuri hunei inũ, txatxa tsaua ina awã amis anu hanu huneshãkanikiki.

²⁰ Ha haskaibutiã Assíria shanẽ ibuhaira Hene Eufrates ukeri txaihairakea Senhor Deusũ hatu yunuyutã merabewakĩ Senhor Deusũ nupe kenu keshni ati keskakirã Assíria shanẽ ibuhairatũ Israelĩ enabũ bu inũ, hatũ keshni inũ, hatũ bikerã dani hatu berẽ akĩ hatu itxakawashanikiki.”

²¹ Ha hatu haska waibutiã tsuara hatũ mai pakea yamawaibutiã habu pashaimashũ hatũ mae anushũ hatũ ina awa bake yushã inũ txashuwã bake yushã dabe yumewatã

²² hatũ txutxu paipaima tsinikĩ hamẽ atã txutxu tãki pikĩ buna bata akubaĩshãkanikiki.

²³ Ha hatu haska waibutiãri ha dukũ uva bai 1.000 tashku banabu hawẽ karu 1.000 prata pei heshe ibiamis maei musha besti beneshanikiki.

²⁴ Mai pakea hirabi anu hari kairã, ha musha beneyamawẽ taea piaya kashũ yuinaka tsakati besti ishanikiki.

²⁵ Mati anu dayakĩ mai beresh atiwẽ urubiapaunibu maei musha mirima beneyamakẽ ana hari ka tsua dayatirumakẽ inabu awa inũ txashuwanẽ piti besti basi beneshanikiki.