Isaías 65 - Kaxinawá Bíblia (BR)

Yushĩ betsa kẽwãmisbu Senhor Deusũ hatu txitenikiaki, na hãtxarã

¹ Senhor Deusũ kemakĩ yuikĩ: “Habu ebe hãtxakĩ ea hawa yukaismabia habu eki nukunibuki. Habũ ea benaismabia habũ ea betxinibuki. Nawa shukua betsabũ ea hawa ea akabumabiakẽ kaĩtã eã hatu yuikĩ: ‘Ẽ nenuki. Ẽ matu nĩkaii’, ẽ hatu aniki.

² Ha enabu sinatapabũ ea nĩkabumabiakẽ hawẽtsaĩs ea anu hatu txĩtũwanũ ishũ ẽ hatu meshãshũbia hawa ea nĩkama haska hatũ bai txakabu besti tanakĩ hatũ shinanẽ besti haska betxipaiai aki hawẽ kẽmisbuki.

³ Ha Israel enabunã, shabakabi eabi eki sinatakĩ ea danaĩ heneisbumaki. Hatũ bai nemakishũ yushĩ betsabu besti kẽwanũ ishũ hatũ inabu menushũmisbuki. Mai bawa txi tapu watã hakishũ hatũ inĩti kuashũmisbuki.

⁴ Ha enabunã, mashash tãpe merã yurabu mai wamisbu anu meshu merã bua hari tsaushũ mawabũ yushĩ kẽwãkĩ hatu shinãmisbuki. Ha dikabi ina yawa nami hau piyamanũbũ ẽ hatu nemabiani hawa eki dateama pimisbuki. Yushibu hatu nami inãtã hanushũ hatũ kẽtiki hawẽ hene hushketã ha nami hene atimapa akubaĩmisbuki.

⁵ Na enabu pepamabia mapubaũkĩ hatu yuikĩ: ‘Earã, ẽ meribihaira Deusunaki. Neri eki kematã ea mekĩ metsayamakãwẽ’, ibiairã, ha huniburã, txi ketiãbu bari txaitanai hi ikĩ hawẽ kuĩwẽ ea detxeshãwãmis keskabuki”, itã

Nai inũ mai Senhor Deusũ ana bena wanũbarikiaki, na hãtxarã

¹⁷ “Mã ea haska wabiaibũ ẽ matu ashũshanai nĩkakãwẽ. Nai inũ mai ẽ ana bena washanaii. Habu dukũ dasibi ẽ hatu dami wani hakimashãkanikiki, tsuã ana habukiri shinãmarã.

¹⁸ Habu dami wakĩ ẽ ana bena washanaiwẽ taea benimai shinã txãkãkubaĩkãwẽ. Ha Jerusalém ana bena wakĩ benima paketi besti ẽ matu washũshanaii. Ha mae anu yurabu hawẽ hiweaiburã, ana hawa bika teneama benima besti hiweshãkanikiki.

¹⁹ Jerusalém ibubis ẽ bena washinawẽ taea ẽ benimahairashanaii, hanu enabu shinã txãkaĩ ea hiweshũshanaiburã. Ha mae meranuarã, ana hawa kashai inũ bibiski iki bika teneaibu ana tsuã hatu nĩkama ishanikiki.

²⁰ Ha mae anurã, bakeishta kaĩ bena shaba eskarabes ana mawama ishãkanikiki. Ha inũ, huni ewabu hatũ hiwea txaipa keyuriama mawama iriashãkanikiki. Ma 100 anobia habu mawairã, berunã keskas mawashãkanikiki. Hamẽ tsuabura 100 ano kariama mawaiburã, yupuawẽ besti mawashãkanikiki.

²¹ Ha inũ, betsarã, yura betsã hiwe bena watã ha merã hiwekũkaĩshanikiki. Hanushũ uva bai washũ banatã hanushũ hawẽ bimi pikubaĩshanikiki.

²² Ha inũ, betsarã, huni betsã hamẽ hiwe wama hawẽ hiwekẽ yura betsã mebiãma ishanikiki. Ha inũ, tsuara betsã bai wakĩ banakẽ huni betsã mariastũ ana piãma ishanikiki. Enaburã, hatũ hiwea txaipakubaĩshãkanikiki, hi kushipa mawaisma keskairã. Ẽ hatu katunirã, hatũ mekẽnẽ dayashũ pi benimashãkanikiki.

²³ Ana hamẽmẽs besti dayama ishãkanikiki. Hatũ bakebu mesteburiama inũ yushaburiama ana mawama ishãkanikiki. Hatũ ibubu inũ, hatũ bakebu inũ, hatũ bababu inũ, dasibi hatunabu pakubainaibu habiaskasri hiwepakeshãkanikiki, eã ẽ hatu duawakubainaiwẽ taearã.

²⁴ Habũ ea kenakĩ ea ea ariabuma eã dukũ hatu kemakĩ: ‘Hawamẽ?’ ẽ hatu wakubaĩshanaii. Ebe hãtxakĩ hawarakiri ea yuka keyuriabuma ẽ hawaira hatu nĩka keyukubaĩshanaii.

²⁵ Kamã inu lobo pubẽbia txashuwã bakebe ketashameshũ hawama pishanikiki. Inu betsa leão ana pubeãma ina awa bene keskakĩ basi pishanikiki. Dunu pianãtũ pitirã, mai kuru besti ishanikiki. Dasibi ẽ mati meribi pepa anu mapuaburã, ana hawa bika tenei txakabuama dasibi pe besti ishãkanikiki”, ikĩ Senhor Deusũ hawẽ hãtxa yuikĩ mestẽwaniki.