Isaías 63 - Kaxinawá Bíblia (BR)

Haki sinataibu Deusũ hatu kupinikiaki, na hãtxarã

¹ Isaíasĩ Deus yukakĩ: —Ha hawẽ tari tashipaki pukuima keska tari hawẽruahaira sawea bai tanabirani kushitxakayamakirani Edomnẽ mae ewapa Bozra anua huairã, tsua hui ikimẽkaĩ?— ẽ aka Deusũ ea kemakĩ: —Habia ea Israelĩ Deus ẽ hui kaii, matuki sinatamisbu matu maemashũtã ẽ kushipawẽ ẽ matu piskumashina matuki txani huirã— aka

² Isaíasĩ ana yukakĩ: —Haskai mĩ tari tashipamẽ, mĩ taewẽ uva bimi mĩ pema pema aka keskarã?— aka

³ Deusũ kemakĩ: —Txanima eã besti uva ẽ pemashina ikaii, tsuã ea dabewamarã. Sinata pae paekaĩ eki sinataibu ẽ hatu pema pema aka hatũ himi eki sa sa ikĩ ẽ tari txa akĩ himĩ ea irumawashinaki.

⁴ Eanã, ẽ yunuti kushipawẽ enabu Israel ẽ merabewashanai ha shabatiã ẽ ati wani ma hanu ikaya enabu ẽ hatu ana mebikinãshanaii.

⁵ Ẽ hatu uĩbauna hanu tsuã ea merabewatirumakẽ ea e itã ana: “Tsuaĩra ea merabewawa”, ibiatã ẽ mekẽnẽ ẽ hatu dete keyushinaki. Ẽ sinatahairaiwẽ taea ẽ kushipawẽ ẽ hatu maemashinaki.

⁶ Nawa shukuabuki sinatakaĩ hatuki di ikĩ ẽ hatu yamawashinaki, hatũ himi maiki hatu habamabaĩkinã— ikaya

Deusũ Israelbu hawẽ duapa hatu unãmanikiaki, na hãtxarã

⁷ hanushũ Isaíasĩ yuikĩ: “Ea hãtxairã, Deus nuikipakiri ẽ hãtxakatsis ikaii. Dasibi hatũ nuku ashũmis inũ, Israelĩ enabu hawẽ duapa keyutimawẽ nuku duawamis inũ, nukuwẽ nuikĩ nuku betxipaimiswẽ taea ha kẽwaĩ ẽ kãtakatsis ikaii.

⁸ Deusũ yuikinã: ‘Ha enabu ẽ bakebunã, hawa ea danãkĩ ea txakabuwama ishãkanikiki’, itã hatũ habu piskumaikiki,

⁹ bika betsa betsapa mekĩ teneaiburã. Habu hau hatu hãtxashunũbũ Deusũ yunuismarã, haburã, hatu piskumamaki, ibubis Senhor Deusũ hatu wakinã. Senhor Deus nukuwẽ dabanã ikĩ nukuwẽ nuikinã, nuku mebikinãmiski, nuku mekeshũ nuku ikuai keska wakinã. Haska nuku ashũkubaĩmis keska wakĩ nuku ashũkĩ heneama ikũkainiki.

¹⁰ Hatu haska wabia Israelbũ Senhor Deusũ Yushĩ sinatamakĩ dananibuki, nukũ mekenika meribi itxakinã. Haskawẽ taea ha danaĩbuki sinatakĩ hau hatu detenũbũ nawabuwẽ hatube detenamekũkainiki.

¹¹ Ẽ hatu haska wakubirana Israelbũ hatũ shenipabu Moisĩ hatu merabewakĩ Egito anua tashnimani habũ shinaĩ hatumebi yuka ikĩ: ‘Ha Moisés hawẽ txashuwã mekenika wakatsi ianẽwã anua neshenirã, hanimẽ, ha Deusrã? Hatũ hawẽ Yushĩ meribi kushipa Moisés inãnirã, hanimẽ?

¹² Hatũ hawẽ kushipa pehairawẽ Moisés mekekubainirã, hanimẽ? Hawẽ taea hawẽ kena pepa hakimatimawakĩ Ianẽwã Tashipa nukunabu pashkashunirã, hanimẽ?’ ikaibũ

¹³ hatũ Ianẽwã nuahairabiakẽ hawa hatu dashkibaĩ tĩ imama pukemakĩ cavalo mai metu anu kushikaĩmis keska hatu wanirã, hanimẽ?

¹⁴ Habu mekesushũ iyukubaĩkinã, ina awa napãpa anu butumis keska wakĩ Senhor Deusũ hawẽ Yushĩ kushipawẽ hatu nimakubainiki. Haska wakĩ hawenabu mekesushũ hatu iyukubaĩkĩ hawẽ kena pepa kushipa dasibibu unãmaniki.

Isaíasĩ Deusbe hawenabu hatu hãtxashunikiaki, na hãtxarã

¹⁵ “Senhor Deusuũ, hanu mĩ ika naiuri mĩ mae meribi pepa anu hari hiweshunã, nukukiri shinãwẽ. Hania? mĩ nuikipa pepahaira inũ mĩ kushiparã. Hania? mĩ hawẽ nuku shinãmisrã. Mĩ nukuwẽ dabanã imisrã, mĩ ma nuku hatsãmẽ?

¹⁶ Miarã, mĩ nukũ epaki! Nukũ shenipabu Abraão ana nuku shinãma ma nuku hakimabiaya nũ Israelbubia haskatã nukunabube nũ ana hatuki dasi unãtinãtimaki. Nũ haskabiaya Senhor Deusuũ, miarã, habia mĩ nukũ epaki. Nuku mebikinaĩ taenishũ nuku heneama mĩ nuku akubainaii.

¹⁷ Senhor Deusuũ, haskakĩ mĩ hãtxa nũ txibãbiaya mĩ kati bai mĩ nuku benumamismẽ? Haskakĩ miki meseti shinãmama nukũ huĩti mĩ nuku kushi wamismẽ? Mĩ nuikipawẽ taeshũ mĩ tsumabu hawaira hatukiri shinã betsa watã hatu pewariwe, minabu shukuabu tibi wakĩ mĩ hatu katunirã.

¹⁸ Minabu meribi mĩ hatu katuni ha mae anu hiwea hatishuĩra hatunawai hiweama ikimabuki. Nukuki sinataibũ mĩ Templo itxakawakĩ mia pema pema akaĩmabuki,

¹⁹ mĩ nukũ shanẽ ibumakẽ nuku akawakĩ inũ mĩ kena kushipa nũ hayama nuku wakinã.