Isaías 61 - Kaxinawá Bíblia (BR)

Israelbu hatu mekekĩ piskumakatsi hatuki Senhor Deus txaninikiaki, na hãtxarã

¹ Haskaya Senhor Deusũ ea katukĩ sheniwẽ ea mauka keska wakĩ hawẽ Yushĩ kushipa ea hikimatã ea yunukĩ: “Nuitapaibu hatu shinã txãkãwaĩ kaka pepa hatuki txanitãwẽ. Bika teneaibu hatu merabewatãwẽ. Hatu nãta iyukĩ tsuma wabainibu keska inũ hatu bitxinibu keska haska wakĩ ẽ hatu unanuma hiwematiru hatuki txanitãwẽ, haska wakĩ ẽ hatu pekatirurã.

² Ea ẽ Senhor Deus ha baritiã ẽ hatuwẽ nuikĩ ẽ hatu merabewashanai hatuki txanitãwẽ. Ha shabatianã, nukũ Deus ha nukuki sinatamisbu nuku hatu kupishũshanikiki, iki hatuki txanirã. Dasibi punu nukabu hatu merabewakĩ ea hatu daewashũtãwẽ.

³ Sião anu bika tenei hiweaburã, ana txi mapu hatu mapu tukumama maiti hawẽrua inãkĩ hatu sawematãwẽ. Nui kashatxakayamisbu hatu nese watã benimati sheni ininipa hatu inãtãwẽ. Tsuabura hawawẽ haskatima merabewakĩ benimawakĩ kãtati shinã txãkãti hatu yusĩtãwẽ. Mĩ hatu haska wa yurabũ hatu kenakĩ: ‘Ha hi kushipa tekeisma Senhor Deusũ bananishũ hawẽ kushipa hatu unãmati hiki’, akĩ hatu kenashãkanikiki.

⁴ Hiwe tibi di ini sheni ana benishãkanikiki, matũ shenipabũ hiwe txakabuwanibu pewakinã, ha maewã tibi ana nawasãtã pewatã mã hiwebaũshãkanaii.

⁵ Nawa betsabu matunabumã matũ txashuwã shukua inũ, matũ bai inũ, matũ uva bai habũ matu dayashũkĩ mekeshũshãkanikiki.”

⁶ Habũ matu kenakinã: “Habu Senhor Deusũ tsumaburã, hawenabu Deusbe hãtxashunikabuki”, matu washãkanikiki. Nawabu txaikeshũ hatũ hamapai ibubis matu beshuãbu mã hawẽ benimai shinã txãkãshanaii, hatũ tari hawẽrua inũ hatũ dauti pepa sawea mapuarã.

⁷ Mã enabu habu matuki sinatakĩ itxakawakĩ matu dakewakubainibu nuitapakĩ bika mirima mã mekubainima keska natiã ha binumakĩ matũ mae anushũ mabu karu mirima inũ benimai shinã txãkaĩ henetima bi mã hawẽ hiwekũkaĩshanaii.

⁸ Deusũ hatu yuikĩ: “Yunuti kushipa pepa ea Senhor Deusũ ẽ betxipaimiski. Hakia habu yumetsumisbu inũ yura betsa tenãmisbu danaĩ ẽ hatuki sinatamiski. Ẽ shinã haskawẽ taea enabu habu duawakĩ heneama pewẽ hatu manakukatsi iki ẽ hatube yubakakĩ mestẽwãkĩ ẽ akibi ashanaii.

⁹ Matũ bababu pakubaini pe hiweabũ nawa shukua tibibũ hatukiri pe shinãkĩ kẽwãkĩ yuikubaĩshãkanikiki. Senhor Deusũ hawenabu pewẽ hatu duawakubainai dasibibũ hatu uĩkĩ unãshãkanikiki”, ikaya

¹⁰ Haskakiri Senhor Deus yubakakũkainaiwẽ taea ea ẽ shinã txãkaiĩ. Hawẽ meketi haya ea inãkĩ piskumatã hawẽ yunuti kushipawẽ ea mekekĩ binumakĩ ea duawakubainikiki, huni aĩyãkatsi iki hawẽruakĩ maiti pepa sawemis keskai inũ aĩbu beneyanũ, iwanã, hawẽruakĩ dauti betsa betsapawẽ daumis keskairã. Haskawẽ taea ẽ Deuswẽ ẽ benima txakayamaii.

¹¹ Haska mibã mai anua hukuĩ peshei taemis keska inũ bai watã hawara heshe betsa banashinabu peshetã hukuĩ ewamiski. Haska keskari wakĩ Senhor Deusũ hawẽ kushipawẽ hawenabu hatu binumakĩ dasibi nawa shukuabu hatu kãtamakĩ kẽwãmashanikiki.