Isaías 60 - Kaxinawá Bíblia (BR)

Senhor Deusũ Jerusalém ana bena wakĩ hawẽrua washanikiaki, na hãtxarã

¹ “Jerusalém anuabuũ, benimai benirikãwẽ. Senhor Deusũ ana matu merabewai tashnitã hawẽ kushipa bĩ keska matu anu atximakĩ ma matu anu txasha waikiki.

² Yamepanã, mai bepuaki. Meshu tẽ ikaitunã, nawa shukuabu atxiaki. Hakia Senhor Deusũnã, hawẽ txasha matu anu peshakĩ hawẽ kushipa matu uĩmaiwẽ taea

³ ha uĩtã nawa shukuabu tibi matũ mekenã uĩ beshãkanikiki. Shanẽ ibuhairabũ matũ kushipa penai keska uinũ ika matu anu beshãkanikiki.

⁴ Bewenikitã matu dapi uĩbaũkãwẽ. Uĩkãwẽ, dasibi haska tibi itxatã matu anu beshãkanikikirã. Matũ huni bakebu txaihaira hiweabu beshãkanikiki. Matũ aĩbu bake mishtĩbu hatu pũtsaumeshũ hatu iweshãkanikiki.

⁵ Matũ bakebu beaibu mã uiãyã benima paẽ matu atxia mã huĩti shinã txãkã paepashanaii. Maewã ianẽwã kesha anu hiweshũ mabu pepa itxawaimashũ beshũ matu inãshãkanikiki.

⁶ Midiã nawabu anua inũ Efa nawabu anua camelo bei txitxikinãbirãkĩ mabu peutã beaibu mã uĩshanaii. Ha inũ, Sabá mai pakea anushũri camelo mirimaki ouro inũ inĩti pepa peumatã bemashãkanikiki. Habu bekinã, Senhor Deusũ kushipa kẽwãkĩ yuibirãshãkanikiki.

⁷ Dasibi Quedarĩ enabũ txashuwã shukua matuna ishanikiki. Nebaiotẽ enabũ txashuwã bene tibirã, matuna iriashanikiki. Haratura bitã ea Senhor Deusũ txi tapukishũ mã ea menushũkĩ ha inãkuĩwẽ mã ea benimawatirubuki. Mã ea haska washunaya ẽ Templo ana hawẽruahaira wakĩ ẽ matu uĩmashanaii.

⁸ Tsuabumẽ, ha nai kuĩ keska nuyabaunaibu inũ deiwã hatũ shui anu hikiai keskaiburã?

⁹ Haburã, shashuwã tibi itxatã beaibu maewã Társis anua shashuwã betsa betsapari bebukirãkĩ matũ bakebu txaikea matu iweshũkĩ hatũ ouro inũ hatũ prata hatu bemashãkanikiki, ea Israelĩ Senhor Deus meribitũ ẽ matu kushipahaira wai ea duawanũ, ika beirã.

¹⁰ Matunabuma nawa betsabũ matũ mae kene ana benibaũshãkanikiki. Ha habu shanẽ ibuhairamisbũ matu dayashũkĩ matu duawashãkanikiki. Ea Senhor Deus matuki sinatakĩ ẽ matu kupibiani natiã ẽ duapawẽ ana ẽ matuwẽ nuishanaii.

¹¹ Matũ mae beputirã, bepemanasa ishanikiki, ana bariri inũ meshu merã bepuamarã, ha nawa shukua shanẽ ibuhaira tibibũ hatũ mabu pepa matu hanu hikibirãkĩ hau bebirã bebirãshanũbunã.

¹² Mai pakea betsã habũ matu betxipaisma habu yamai ana hayama ishanikiki”, iwanã,

¹³ Senhor Deusũ ana Jerusalém yuikĩ: “Ha hi hawẽrua kushipa tibi Líbano mati matipa anua matu anu beshãkanikiki, ẽ Templo ana hawẽrua wakĩ hanu ẽ tae ẽ hanashanai anu ea betxipaimati wakinã.

¹⁴ Habũ matu itxakawapaunibũ bakeburã, matuki mesei matu bebũ beti iki beshãkanikiki. Habũ matu danãhairabiapaunibu matũ tae namã dãti ishũ yuikĩ: ‘Mã Senhor Deusũ maewãki. Siãonã, Israelĩ Deus meribitũ maewãki’, akĩ matu kenashãkanikiki.

¹⁵ Ana tsuã matu henebainama inũ danãkĩ matu besti shunũbainama ishanikiki. Hakia eã matu hawẽrua wakĩ ẽ matu ikibi imashanaii, hanua benimai henepaketima matu wakinã.

¹⁶ Nawa shukua tibibũ hatũ piti pepahaira beshũ matu inãshãkanikiki. Nawa shanẽ ibubũ hatũ mabu hawẽrua karuhaira matu beshũshãkanikiki. Matu haska waibu uĩkĩ ea Senhor Deus ẽ matũ piskumanika mã unãshanaii, Jacó merabenanika kushipahaira earã, ẽ matũ mebikinanikarã.

¹⁷ Mã haskawẽ hiwenũ ẽ matu pewashũshanaii. Ana mane bronze matu inãma hawẽ shãtukũ mane ouro karuhaira ẽ matu inãshanaii. Ana mane kushipa ferro matu inãma hawẽ shãtukũ mane karu prata ẽ matu inãshanaii. Ana hi besha matu inãma hawẽ shãtukũ bronze ẽ matu inãshanaii. Ana mishki matu inãma hawẽ shãtukũ ferro mane kushipa ẽ matu inãshanaii. Eanã, ha unanuma hawama hiwetiwẽ ẽ matu shanẽ ibumashanaii, yunuti parananaĩsmawẽ matu yunumakinã.

¹⁸ Matũ mai pakea Israel anua itimaskai detenamebaunaibu mã ana nĩka taskama ishanaii. Habianuri matũ mae ana yamawama inũ hiwe di akama ishãkanikiki. Hakia matũ maewã kenekauana kenakinã: ‘Hanu Mekea Kayabi Pepaki’, akĩ hawẽ beputirã, ‘Benimakĩ Kẽwãtiki’, ashãkanikiki.

¹⁹ Ha haskaitiã ea ẽ matũ Senhor Deus ẽ txasha ikibi ishanaiwẽ taea ana hawa bari txashai inũ ushe meshu merã txasha hayamabiakẽ mã manuama ishanaii.

²⁰ Ea ẽ matũ Senhor Deus ẽ txasha ikibi ishanaiwẽ taea matũ bari hawa nuka taskama inũ matũ ushe hawẽ txasha keyui nukama ishanikiki. Hawara bika betsa betsapa mã tenekubaĩmis haskaitiã keyushãkanikiki.

²¹ Dasibi matunaburã, huni duapa pepabu besti ishãkanikiki. Matũ mai pakea mã ana bishanairã, matuna inũbarikiki. Mibã meshtetã eã ẽ matu banani keska hawẽ kataku hukũmis keska mã ishanaii. Ẽ kushipa uĩtã hau ea duawashanũbũ ẽ mekẽnẽ ẽ dayamis keska ẽ matu pepa wamis uĩshãkanikiki.

²² Mã yura itxapama shuku pishtabia pairã, 1.000ti tibi matu tanashãkanikiki. Mã itxapama pishtabia mã maewã tsekashanaii. Haska ẽ yubanirã, ea Senhor Deusũ akatsi ẽ txanini ishanikiki, hanu hatiãra tashniaitiã hawaira ikirã, haskashanikiki”, inikiaki.