Isaías 6 - Kaxinawá Bíblia (BR)

Haska wakĩ hawẽ hãtxa yuishunika wakĩ Deusũ Isaías katutã yununikiaki, na hãtxarã

¹ Ha baritiã Uzias shanẽ ibuhaira mawaya Senhor Deus ẽ uĩmakiri matu yuinũ nĩkakãwẽ. Hawẽ tsauti keyatapahaira anu tsaua hawẽ Templo kesha tari di akĩ keyubima tsaua ẽ uĩmaki.

² Hawẽ nai tsuma betsabu serafin txi keska ha mamaki hayaki. Habu tibirã, 6 hawẽ pũyã peiyabuki. Hatũ pũyã peiya dabewẽ hatũ besu bepuabuki. Hanushũ pei dabewẽri hatũ yura bemakis bepuabuki. Hanua pei dabewẽri nuyabaũmisbuki.

³ Habu yuinamei hãtxabaũkĩ yuikĩ: “Meribi pepa, pepahaira Senhor Deus kushipahaira nukũ Shanẽ Ibuhairaki. Hatunã, mai hirabi dasibi hawẽ kushipawẽ atxi keyuaki.”

⁴ Hanua hui kushipa kaĩkaĩkĩ Senhor Deusũ kẽwãti hiwe beputi taka taka aki inũ habia hiwe uke merãri txi kuĩ keska mataya

⁵ eã shinãkĩ: “Earã, ẽ peirawa! Ẽ ma mawaii! Ibubis ẽ beruwẽ ẽ Shanẽ Ibuhaira Senhor Deus kushipahaira dasibi binua ẽ uĩshuki, ẽ huni hawa pepama ẽ keshawẽ txakabu ẽ yuimis inũ ha huni txakabubube ẽ hatube hiwearã.”

⁶ Haska uĩkĩ ẽ shinãbiaya habiatiãri ha serafin txi hi ikai betsa ẽ nia anu nuyakirã hawẽ mane tsumatiwẽ txi tsistu txi tapu anua tsumabirã

⁷ hawẽ ẽ kesha ea metsamatã yuikĩ: “Uĩwẽ. Na txi tsistuwẽ mĩ kesha ẽ mia metsamashurã, hawẽ mĩ txakabu ẽ mia hayama washũshuki. Mĩ txakabumis ẽ mia buashũshuki.”

⁸ Hanushũ ẽ nĩkaya Senhor Deusũ hawẽ hui kaĩmakĩ ea yuikĩ: “Tsuã nukũ hãtxa nuku yuishũtiru tsua nitxĩpa?” ikaya eã kemakĩ: “Earã, ẽ nenuki. Habia menã ea nitxĩriwe!” ẽ aka

⁹ hatũ ea yuikĩ: “Kashũ yurabu eska ea hatu yuishũtãwẽ: ‘Ẽ hãtxa nĩkabiai habũ hawa nĩka pewama ishãkanikiki. Uĩ bestishãkanikiki, habũ hawa tapiãbumarã.’

¹⁰ Hatu nĩkamamakĩ habũ shinã hatu beputãwẽ. Hatũ pabĩki inũ hatũ beru bepukĩ hatu hunebaũtãwẽ. Mĩ hatu haska wa uĩbiai inũ nĩkabiakĩ hawa ekiri tapiãma ishãkanikiki, hau ea anu beaibu ẽ hawa hatu shusha wayamashanunã”, ikaya

¹¹ eã yukakĩ: “Senhor Deusuũ, haskarã, hatiã kauã ishanimẽkaĩ?” akĩ ẽ yuka Senhor Deusũ ea kemakĩ: “Haskairã, na mae ewapabu ma yamawa ana hanu yura hayama inũ, hatũ hiwe merã tsua hiweama inũ, hatũ bai tibi ana hawa mibã hayamakẽ ishanikiki.

¹² Ha inũ, ea Senhor Deusũ ha yurabu ẽ hatu txai putakẽ hatũ mae anu hawa hayama shakakẽ hatiã ipakeshanikiki.

¹³ Ha yurabu décima parte ẽ hatu heneima haburi ẽ yamawaya haskaitiã ipakeshanikiki. Eska keskairã, hi keyatapa derabu hawẽ buru besti henemiski. Hakia hawẽ buru anua hawẽ tushpi betsa datakukirãmis keskai enabu anua hawẽ baba betsa meribi txakabuma tashnikaũshanikiki”, akĩ Deusũ ea waimaki.