Isaías 58 - Kaxinawá Bíblia (BR)

Samake kayabikĩ uĩmairã, eskatikiaki, na hãtxarã

¹ Senhor Deusũ ana ea yuikĩ: “Dateama sai itxakayamatãwẽ, mimawati trombeta txã akai keska wakĩ mĩ hui kaĩmakinã. Enabũ kanekĩ txakabuwamisbu ha akĩ Jacó enabu hatũ txakabu hatu txitekĩ ha atãwẽ.

² Ẽ hiwea bai unaĩ benima bestinũ ishũ shaba tibi mã ea benakubainaii, mae pepawẽ hiwea ikasi pepai inũ ẽ yunuti hãtxa txakabuwama kaneama ikasriairã. Ẽ yunuti kushipa pepa ea yukatã ea beparãkĩ ea uĩmai benimabirani ea anu bemisbuki.

³ Haskabiai matu yuinamei: ‘Haskai hamẽ nũ samakemismẽ, Deusũ nuku uiãmabiakenã? Haskai hamẽ ibubis nũ bika teneai, Deusũ nuku tanamabiakenã?’ iki mã haska hãtxamiski. Ha shabatiã samaketi ẽ meribi wabianikẽ hanu ea samakeshunama ha shabatiã mabu inananãkĩ matũ dayakapabu itxakawakĩ mã hatu yunutxakayamamiski.

⁴ Ha shabatiã samakeirã, mã eskamiski, ha iki kũyã ikirã, detenameirã, pubẽkĩ matũ mekẽnẽ hatu kushakinã. Ha shabatiã samakei mã haskamiswẽ taeshũ ebe hãtxakĩ mã ea yukaibu ẽ matu hawa nĩkaismaki.

⁵ Matũ mã shinanã, mã samakeaiwẽ ea benimawairã, eska dakati dabanẽ mã ikai, bika teneirã, matũ bushka tiniã daka tawa puaka keska dakarã, tari besha sheni sawetã mapu maputukutã dakarã, ‘Haska dakashũ Senhor Deus ẽ benimawaii’, ikĩ mã yuimiski, samakekinã.

⁶ Haskatimahairaki! Samakea kayabi eã ẽ betxipaiairã, eska tibi shinaĩ itiki. Nĩkairakãwẽ. Mane dispi txiwetameya nasa keska wakĩ yunuti txakabu pekakãwẽ. Hatu bika tenemakĩ mã huni betsa neshakĩ akawarã, ana hatu bika tenemama henekãwẽ. Hatu itxakawaibu merabewakĩ hatu mepãmakãwẽ. Tsuãra hatu yunutxakai mã pubẽmisrã, yamai beshtekerikãwẽ.

⁷ Tsuabura buniaibu matũ piti pashkashũ hatu pimakãwẽ. Nuitapai hiweuma mapuabu matũ hiwetã hatu ishũ hatu ushãkãwẽ. Tsuara tariuma matũ tari betsa hatu sawemakãwẽ. Minabu kayabi hatu merabewakĩ heneyamakubaĩkãwẽ.

⁸ Mã haska wakĩ samakekĩ ea uĩmakubainaiburã, matũ akarã, penai shaba txashamis keska ẽ matu washanaii. Hamapai bika mã teneai hawaira mã shushashanaii, dete bui keskairã. Kaneama mã pepa wamisrã, mia bebũ tashniaya ẽ kushipa pepawẽ matu mekeshũ ẽ matu unãmakubaĩshanaii.

⁹ Hanushũ ebe hãtxakĩ mã ea kenaya nĩkatã ẽ matu kemashanaii. Hawara mei datei bis ikĩ mã ea hawaira yukaya eã matu kemakĩ: ‘Ẽ nenuki’, ẽ matu ashanaii. Hawara atimapã matu tsuma mã yamawakĩ keyuai inũ, huni betsa mã ana hatu itxama inũ, metukĩ mã ana hatu yuãma inũ,

¹⁰ buniaibu miã kayabis mã hatu merabewakĩ pimai inũ, hawara bika teneaibu mã hatu merabewamisrã, haskai mã pe hiwea meshu merã bĩ txasha keska matu uĩshãkanikiki. Kanei mã txakabubiashĩkẽ tsuã ana haska shinãma bari mananãbi bari peshea keska pe besti matu uĩshãkanikiki.

¹¹ Mã haskakenã, earã, matube ketashamea matu mekekubaĩkĩ hanu buniaibutiã mã pinũbũ hanu tsua hiweabuma anu piti hamẽ ikai ẽ matu washũshanaii. Matũ yura babuaya ẽ matu ana kushipa washanaii. Mã mibã bana matu nashima keska wakĩ ẽ matu duawashanaii, txatxa ũpash hawa hene netsutima keska wakinã.

¹² Matunabũ mae tekekĩ di anibu nawasãtã ana benishãkanikiki. Ha mishki matũ shenipabũ anibu nenumahairarã, ha mishki tsamabaunibu ana matu pewashũshãkanikiki. Ha matũ mae ana pewakĩ ma haska waibũ matunabu hatu kenakĩ: ‘Mae sheni pewakĩ kenebaunibu beninikabu inũ hiwe tekekĩ di anibu ana benibaunikabuki’, hatu washãkanikiki”, itã,

Sábado huĩrukũtirã, meribikiaki, na hãtxarã

¹³ Senhor Deusũ ana hatu yuikĩ: “Ẽ huĩrukũti wani sábadotianã, haki mesekubaĩkãwẽ. Ha shaba meribi ẽ wanirã, enaki. Haskawẽ taea ha shaba meribitiã hanu matũ daya tibi hanu mã ana hawa metirubumahairaki. Hanu huĩrukũti shaba ẽ wanirã, benimati shabaki. Ha shaba meribitianã, ea ẽ Senhor Deus mã ea habi duawai keskaki. Ha sábadotiã matũ hawara daya shinãma inũ, matũ mabu inananaĩ shinãma ea benakĩ ea duawa bestikubaĩkãwẽ.

¹⁴ Mã haskakubainaiburã, ea anua matũ benima pae mã bikubaĩshanaii. Matuki sinataibu ẽ kushipawẽ matu maemamatã matũ mae anu ana iyushũ ẽ matu shanẽ ibu washanaii. Matũ shenipabu Jacó ẽ yubani keska matubu ẽ matu inãshanaii, mã hawẽ benimashanũbunã”, ikĩ Senhor Deus kayabitũ hawẽ hãtxa haska mestẽwãkĩ yuikiki.