Isaías 55 - Kaxinawá Bíblia (BR)

Yura dasibibu hawẽ duapa Senhor Deusũ hatu uĩmakatsi hatu yubanikiaki, na hãtxarã

¹ “Tsuabũra mã ũpash manuaiburã, ea anu beshũ akãwẽ. Tsuabura mã pei hayamabia bekãwẽ, hawa pakama shekiwã trigo inũ, uva vinho inũ, awa txutxu bi beirã.

² Haskai mã hamẽ pei inananãmismẽ, pitimabiakẽ hamẽ putakinã? Haskakĩ matũ daya pei mã hatu inãmismẽ, hawa matu merabewakĩ shinã txãkãwatirumabiakenã? Ea nĩka pewakubaĩkĩ mã piti pepa pishanaii, hawara piti kemutapa mã betxipaiai pikinã.

³ Eki kemai ea anu beshũ ea nĩkakãwẽ. Ea nĩkahairakubaini mã hiweshanaii. Davi betxipaikĩ yubanishũ amakĩ ẽ meneshuni keska wakĩ matube yubakatã henepaketima ẽ matuberi yubakatsis ikaii.

⁴ Ẽ haibu Davi ekiri txanikaũti eã ẽ nawabu unãti wamaniki, shanẽ ibukĩ hau habu ekiri tapĩmashanunã.

⁵ Nawabũ matu unãbuma mã hatu kenaya habũ matu unãmabia nĩkanũ ika matu anu kushibirãshãkanikiki, ea Israelĩ Senhor Deus meribitũ ẽ kushipawẽ ẽ matu duawaiwẽ taearã”, ikai nĩkatã

⁶ Isaíasĩ hatu yuikĩ: “Mã Senhor Deuski nukukatsis ikairã, menã kenarikãwẽ, na habia txaima matu dapi nia mã haki nukutirukirã.

⁷ Huni txakabubũ hau hatũ hiwea txakabu inũ hatũ shinã txakabu henetã hau Senhor Deus anu benũbũwẽ. Mã haskaibuwẽ taea Senhor Deus matuwẽ nuishanikiki. Matũ txakabu henetã Deus anu txĩtũribirãkãwẽ. Harã, matuwẽ dabanã ikĩ matũ txakabu matu buashũshanikiki.”

^8-9 Senhor Deusũ ana hatu yuikĩ: “Ẽ shinanã, matũ mã shinãmis keskamaki. Ẽ haska amisrã, matũ mã amis keskamariki. Nai keyatapa nenumahairatũ mai binua keska ẽ shinãmis inũ haska ẽ amistunã, matũ shinã ẽ binuaki”, ikĩ Senhor Deusũ hawẽ hãtxa txanima mestẽwaniki.

¹⁰ Ana yuikĩ: “Ui inũ matsi tãki nai anua mai anu bututã ana hawẽri txĩtuãma mai metxa wakĩ pepa wa yunu banabu hukũmakĩ peshemamiski. Hanua hawẽ heshe ewatã kaniai ha bimi tsekatã misi watã pimisbuki.

¹¹ Habiaska keskariai ẽ hãtxawẽ ẽ hatu hãtxa wa hawa wariama ea anu hamẽ ana txĩtũtirumaki. Hakia haska ẽ uĩkĩ betxipaiai keska ẽ hatu yunua habũ akĩ menemisbuki.

¹² Nenu Babilônia anu mã Israelbu benibu ana matũ mae anu txĩtũbaini benimabaini bui matũ mai pakea anu unanuma mã hikishãkanaii. Mã haskabainaibu matu uĩtã mati matipa inũ mawa tibi matuwẽ benimai kãtaibũ ni shukuabũ matu uĩtã matuwẽri benimakĩ mekẽ paush paush akai keskai bubi bubi ishãkanikiki.

¹³ Hanu ana musha beneama hawẽ shãtukũ hi pepa beneshanikiki. Ana nishi mushaya beneama nishi hua pepaya benei mai beweshekeshanikiki. Haska tibi kaĩ beneai ea Senhor Deusũ unãmati uĩkĩ ẽ kena kushipa hawa tsuã yamawatiruma ikibi ika uĩshãkanikiki”, iniki.