Isaías 54 - Kaxinawá Bíblia (BR)

Israelbu Deusunabu hawẽ aĩ keska hatuwẽ nuikĩ henetirumakiaki, na hãtxarã

¹ Senhor Deusũ matu yuikĩ: “Aĩbu tsuãra henebiabainitũ ha aĩbu betsa beneyabiakẽ ha aĩbu hawẽ benẽ henebaĩyamatũ bake itxapa bikĩ mĩ hatu binũshanaii. Mĩ haskawẽ taea aĩbu bake bitiruma inũ mĩ hawa bake kaĩ isĩ meismaã, mĩ bakeumabiarã, benimai shinã txãkaĩ sai sai iki kãta txakayamariwe”, mia waikiki.

² Mĩ tari hiwe mĩ hanu hiwea ana hãshekakĩ hashpa ewapa wariwe, hawa dateama ana pũtebaũkĩ hawẽ dispi txaipa washũ mestẽwãkĩ hawẽ nitxĩti tibiki masta akeakewe,

³ txipu yusiuri inũ yusmauri minabu pai manibaũkĩ nawa shukua itxapa hatu atxitã natiã ha mae hanu tsua hiweabuma anu habũ maewatã hiweshanaibuwẽ taearã.

⁴ Miki hawa kashekĩ mia usãma ishanaibuwẽ taea hawa dateyamashãwẽ. Miki sinatama ishanaibuwẽ taea dakeyamashãwẽ. Mĩ txipash yumetxakai txakabuni hawẽ dakemisrã, hakimawe. Mia itxakawakĩ mĩ benẽ henebaĩkĩ mia dakewanirã, ana has shinãyamawe.

⁵ Mia hatũ dami wanitũ natiã ana miki nukukĩ mia aĩwãkĩ akawatã mia haska duawakĩ dasibi mĩ hiwea betsahaira washanikiki, hawẽ kena Dasibi Kushipa Binuhaira Senhor Deusũnã. Mĩ mebikinanika Israelĩ Deus meribi ha dasibi mai hirabi dami wani Deusũnã, mia haska washanikiki.

⁶ Matu mã Israel aĩbu txipash henebainibu mã bika teneai keskaki. Hakia matũ Deusũnã, ana matukiri shinã betsai petã matu kenakĩ yuikĩ:

⁷ “Ẽ matu heneyubaĩshanaii, hatishuĩra kamarã. Hakia ẽ nui pae ewapawẽ ana txĩtũkirã matuki nukui ẽ matube ketashameyushanaii.

⁸ Hawaira matuki sinatakauã matuki dakei matu anua ẽ irubiaima hakia ẽ nui ikibi ini ha ẽ nuimis ẽ ana matu uĩmashanaii”, ikikiki, matũ mebikinanika Senhor Deus hãtxai txanirã.

⁹ “Haska inũ, Noé hiweatiã hene ewawatã mai hirabi atxi keyushĩshũ txipu Noé yubakĩ: ‘Ẽ ana hene ewawakĩ mai atxi keyuama ishanaii’, ika ẽ yubakani keska natiã habiaskari ẽ yubakariaii: ‘Ẽ ana miki sinatama ishanaii. Ha inũ, ẽ ana pubẽkĩ mia date date akama ishanaii.

¹⁰ Mati matipa ibubis maebiai inũ mawa matekei niri ibiaya hakia ẽ nui ikibi ika miwẽ taearã, hawa betsai maetiruma inũ ẽ yubakani hawẽ unanuma hiwemati hawa betsa wakĩ ẽ maewatirumariki’ ”, iki Senhor Deus miwẽ nui hãtxaikiki.

Jerusalém bena wakĩ betsahaira washanikiaki, na hãtxarã

¹¹ Ana mia yuikĩ: “Mae danãkĩ mia itxakawakĩ nuitapawanishũ tsuã mia daewai miwẽ nuisbumabiakẽ, eã mĩ mishki bemaki mia hawẽrua wakĩ bui nãke dekẽ hi hi ikaiwẽ ẽ mia bepush shanaii. Mishki hawẽ mestẽwãti safira nãke txashakapawẽ ẽ mia mabuyashanaii.

¹² Mĩ hiwe keyatapa hanushũ uĩbaũti rubins tashi hushinipawẽ ẽ dapush shanaii. Hawẽ beputi rubins tashiwẽ ẽ bepush shanaii. Nẽkati karuhairawẽ dasibi mĩ mae hirabi ẽ mia kenebaũshanaii.

¹³ Hanushũ eanã, mĩ bakebu dasibi ẽ tapĩmashanaii. Habu dasibirã, benimai hawẽruai unanuma hiweshãkanikiki.

¹⁴ Ẽ yunuti pepa kushipatũ mia mestẽwã ana mia itxakawakĩ tsuma wama inũ mĩ ana hawaki dateama ishanaii. Mĩ date paepamis ana txĩtũkirã mia atxiama ishanikiki.

¹⁵ Tsuãra mia ana detenũ ikairã, haskaiburã, eã ẽ ana mia hatu yunuamaki. Hakia tsuãra mia detenũ ikaiburã, miã ibubis mĩ hatu maemashanaii.

¹⁶ Habũ mane mabu wakĩ habũ shũ shũ akĩ hawẽ detenameti mabu betsa betsapa wamisburã, eã ẽ hatu dami watã kaĩmamiski. Hunibu habũ hatu tenãkĩ hau hatu yamawakĩ nishma wanũbũ eã ẽ hatu dami watã kaĩmariamiski.

¹⁷ Hakia miarã, piawẽ mia yamawatirubu hawa hayamaki. Habũ mikiri hawara yuikĩ txiteaibu hamẽki. Na ẽ hãtxa ẽ matu inainã, tsuabũra ea ikũwãkĩ txibaĩbu eã ẽ matu binumakĩ maemama ewẽ taeshũ matũ pepa mã bishanaii”, iki Senhor Deus hãtxakĩ mestẽwaĩkiki.