Isaías 49 - Kaxinawá Bíblia (BR)

Bĩ ewapa txaka keska nawabu txai hiwebaunabu anu Senhor Deusũ hawẽ tsuma yunushanikiaki, na hãtxarã

¹ Senhor Deusũ tsuma txani: “Ianẽwã kesha anu mae tibi anu hiwebaunabu inũ dasibi mã txaihaira anu hiweabuũ, ẽ hãtxai ea nĩkakãwẽ. Ẽ kaĩriama ẽ ewã bake nãti merã ẽ nanea Senhor Deusũ ea katukĩ ẽ kena kayabiwẽ ea kenaniki.

² Ẽ hana betsa wakĩ ẽ hãtxa nupe txaipa kenuhaira keska ea waniki. Hawẽ mekẽwẽ mekekĩ hunekĩ ea aruniki. Pia kenu dabeya keska ea watã hawẽ pia aruti kapãkã merã ea aruniki.

³ Ea haska watã Senhor Deusũ ea yuikĩ: ‘Israelĩ, mĩ ẽ tsumaki. Miwẽ ẽ kushipa hatu uĩmakĩ ẽ hatu tashnimashũshanaii’ ”, ikaya

⁴ ea hawẽ tsumapã shinãkĩ: “Hamẽ ẽ daya ẽ benui hawa biamabia dayahairakĩ ẽ kushipa ẽ hamẽ puta bestimaki”, ẽ ibiaya txanima dasibi ẽ akairã, Deusũ tsuma keyuaki. Deusũ besti hawẽ kushipawẽ ea manakua ẽ uĩshanaii.

⁵ Senhor ẽ Deuski. Haskawẽ taeshũ ea duawaya hawẽ kushipa hanua ẽ bimiski. Ẽ hawẽ tsuma ikũkainaya Jacó enabu Israelbũ shinã betsa watã hau hanu bei haki dasishanũbũ Senhor Deusũ ea yunukatsi katutã ẽ ewã bake nãtiki ea dami wakĩ naneniki, ikaya

⁶ Deusũ yuikĩ: “Hau Jacó enabu shukua pakea tibi habu Israel teshenibu habu besti anu merabewakĩ ea anu mĩ hatu txĩtũmashanũ mĩ ẽ tsuma katushũ ẽ mia yunuama iniki. Hakia txaihaira mai pakea anu hiweriabu haska haburi mekekĩ piskumakĩ mĩ hatu yusĩbaũshanũ bĩ ewapa txasha keska ẽ mia yunuriaii”, ikaya

⁷ Deusũ enabu shukua betsabũ habu hatu itxakahairawamisbu inũ, shukua betsabũ danãkĩ hatu betxipaisbuma inũ, huni pubẽ shanẽ ibubũ hatu atxitã hatũ tsuma escravo hatu wamisbu Senhor Deus mekenã mebikinanika Israelbũ Deus meribitũ hawenabu hatu yuikĩ: “Ea Israelbũ Senhor Deus meribitũ ẽ matu katuni hãtxai ẽ yubakamis ẽ matuwẽ meneshanaii. Ẽ matu haska washanaiwẽ taeshũ shanẽ ibubu inũ hatũ huni bakebu shanẽ ibubũri matu uĩ e itã matu bebũshũ kẽwaĩ dãti ishãkanikiki”, itã,

Jerusalém ana hatu benimakatsi Senhor Deus txaninikiaki, na hãtxarã

⁸ Senhor Deusũ ana hatu yuikĩ: “Ẽ yubakaniwẽ taea ẽ duapa matu uĩmakatsi ikĩ ẽ matu kemaniki. Ha shabatiã matu piskumakatsis ikĩ ẽ matu merabewaniki. Matuwẽ yubakatã mestẽwãkatsis ikĩ matu pe arukĩ ẽ matu merabewaniki. Matũ mai pakea txakabuwanibu matu ana ibu wamatã ẽ matu hatu pewamashũriakatsis ikaii.

⁹ Habũ matu bitxinibu keska hatu yuikĩ: ‘Mã ma hatishũ bika teneshinaki. Ana hawama tashnirikãwẽ.’ Mã meshu merã mapua keskaburã, ana hawaki dateama kaĩbaĩshãkãwẽ. Bai tibiwẽ bukĩ piti tibiki mã nukushanaii. Hanu tsua hiweabumanu mati tibi anuari matũ inabu piti hayashãkanikiki.

¹⁰ Mã hawa buniama inũ mã ũpash manuama inũ, bari txashahairakĩ matu kuama ishanikiki. Eã matu betxipaikĩ ẽ matu iyuaiwẽ taeshũ matu mekeshũ iyukĩ hanu txatxa tibi ũpash haya anu ẽ matu iyukubaĩshanaii.

¹¹ Mati matipa anu bai hayamabiakẽ matu bai tapĩshũkĩ bai txakabu ẽ matu pãpa washũkubaĩshanaii.

¹² Uĩkãwẽ! Txaihairakea matu merabewanũ ika bekanikiki, nortekiria inũ bari hikiaikiria inũ mai metuhaira Sinim anua beirã.

¹³ Senhor Deusũ hawenabu bika teneaibu ana haska uĩkatsi ikama hatuwẽ nuikĩ ma hatu daewaiwẽ taea naiĩ, benimai sai sai ikãwẽ! Mati matipaã, benimai sai sai ikãwẽ! Maiĩ, benima paepai shinã txãkãkãwẽ!” ikaya

¹⁴ hakia Siãonẽri yuikĩ: “Senhor Deusũnã, ea henebainaki. Ẽ Deusrã, ea hakimaki”, ibiaya

¹⁵ Mĩ shinanã, aĩbu betsanã, hawẽ bake kayabi betxipaibiakĩ hakimakĩ henetirumẽ? Hawẽ bake kayabibia hakimatiruki. Hakia earã, Siãonẽ, ẽ mia hawa hakima taskatirumaki.

¹⁶ Eã ẽ mekẽki netãkĩ akawashũ ẽ mia iyuaii. Mia kenebauniburã, habias keska mikiri ẽ shinã hayaki.

¹⁷ Mia habũ benibaũkatsi shinaĩburã, hĩ hĩ ikanikiki, habũ mia txakabuwakatsi shinanibu keskamarã. Habũ mia txakabuwaniburã, ma hanira buabuki.

¹⁸ Bewenikitã mĩ mae uĩbaũwẽ, dasibi itxatã mia anu ana bei haskabirãkanimẽkainã. “Ea Senhor Deus ẽ hiweawẽ ibubis mia akatsi ẽ yubakaii. Dasibi habu beshunã, mane inũ tari hawẽrua mia sawemakĩ akawai bekanikiki, aĩbu beneyakatsi daumis keska mia wakinã.

¹⁹ Mĩ mae dasibi pure pure akĩ yamawakĩ txakabuwanibu mania anurã, natianã, mĩ mae ana hatiuirama pesheishta anu yura hiwebauni dama ishanikiki. Haska inũ, habũ matu yamawaniburã, ma nenuma buyamabuki.

²⁰ Matũ bakebu txai iyunibu ibuuma hãtxaibu mã nĩkashanaii, eskaiburã: ‘Na nukũ maerã, haskaira pesheishta daka. Nũ hanu hiwenũ hanu hiweti mae ewapa nuku ashũwẽ’, ikaibũ

²¹ matũ huĩti merã hãtxai: ‘Tsuã hatira bake ea washunimẽ? Haskatã bakeyakĩ ẽ bake bitirumaki. Ewẽ hiweniburã, hatu txai iyukĩ ma ea hatu henemabainibuki. Ha bakeburã, tsuã hatu yumewaimamẽ? Ea besti wakĩ henebainibuki. Na bakeburã, harakiria beshiãbumẽ?’ ” ikaya

²² Senhor Deusũ yuikĩ: “Hau mĩ huni bakebu hau pũtsaumetã iwekĩ mĩ aĩbu bakebu hau iatã mia anu iwenũbũ nawabu shukuabu ẽ hatu yunushanaii, mae tibi ẽ unãmati hatu uĩmakinã.

²³ Habu shanẽ ibuhairanibu betsairã, habu inũ hatũ aĩ matũri mã hatu tsuma washanaii. Matu dayashũkĩ matũ bakebu matu mekeshũshãkanikiki. Ha inũ, hatũ aĩbu bakebũ matũ bakebu matu txutxu amashũshãkanikiki. Matu bebũ maĩ beti ika dakashũ habũ matu kẽwãkĩ hatũ hanawẽ matũ tae tashushãkanikiki. Matu haska waibu uĩkĩ txanima ẽ matũ Senhor Deus mã eki txiti imis mã ana hawa eki dakeama ishanai mã unãshanaii.

²⁴ Detenamenika unaĩtũ detenamekĩ hawẽ hawara bishianã, tsuã mebĩtirumẽ? Huni pubenẽ tsuara atxitã kene merã bitxishinarã, haskatã kaĩkaĩtirumẽ?

²⁵ Senhor Deusũ mestẽwãkĩ yuiarã: “Ha detenamenika kushipatũ hawara huni betsana bishiã txanima ana mebĩshũtiruki. Ha inũ, huni pubenẽ hawẽ hawara biãbiashĩkẽ txanima mebĩtiruki. Habu matuki sinatai ha ikaibu ea ẽ matu hãtxashũshanaii. Eã kayabis matũ bakebu ẽ matu piskumashũshanaii.

²⁶ Habũ matu yunu yunu akĩ bika tenemamisburã, ibubis hatunabubetãri bika teneshãkanikiki, hatũ nami ibubis piai keska wakinã. Ibubis hatũ himiwẽ paẽshãkanikiki, vinhowẽ paeã keskairã. Haskaibũ ha dasibi yura hiwebaunabũ ea ẽ Senhor Deus matũ mekenã piskumanika inũ ea ẽ Jacó kushipahaira inũ ea ẽ matũ mebikinanika habũ ea unãshãkanikiki”, itã,