Isaías 46 - Kaxinawá Bíblia (BR)

¹ hamẽ Babilônia anuabũ yushĩ dami Bel, hawẽ kena betsa Baal inũ Nebo datei saki saki iki maĩ tĩ imiski. Babilônia anuabũ hatũ yushĩ dami iyukinã, eska wabaĩmisbuki. Hatũ inapã mabu bumisbuki haki hatũ yushĩ dami peumatã bumamisbuki. Ina hi shãkama peumabainabu hĩ imisbuki.

² Ha yushĩ dami hawa hatu mekekĩ pashawatiruma maĩ niri ika mania mai pakea betsa anu bukĩ yushĩbiakẽ tupibaĩtirubuki.

³ Senhor Deusũ ana hatu yuikĩ: “Jacó enabu dasibi mã Israelbu habu matu deteama teshe wanibuũ, ea nĩkakãwẽ. Eanã, mã kaĩriama matũ ibube mekeshũ ẽ matu nimakubaĩmiski. Ẽ matu ikushũ iyuwawamiski.

⁴ Matu haska wamis shũ heneama mestebui mã buyabis bushka hushubiaya ẽ matu mekeriakubaĩshanaii. Eã matu dami wanishũ hawa matu heneama ẽ matube merabemisrã, eanã, matu tsumakubaĩkĩ ẽ matu piskumashanaii.

⁵ Ẽ hiwenirã, ẽ tsua keska mã ea shinãtirumẽ? Haratu ea keska ẽ kushipaya kaĩtiru mã shinaĩ? Hawa ea keska betsa tsua hayamahairaki.

⁶ Huni betsabũ hatũ ouro pei inũ hatũ prata pei itxapa itxawatã tanakĩ hawẽ shakama balançaki unãtã hatũ yushĩ deus wakatsi tsuãra mane mabu wamistũ hau dami washunũ yunutã pakamisbuki, ha yushĩ dami bitã ha bebũ beti ishũ duawakatsirã.

⁷ Ma hatu meneshunabu bikĩ iawãshũ hanu tsaũti washina anu tsaũmisbuki, haska waimabu anua hawa shekei maetirumarã. Hunibũ hui kushipawẽ hatũ yushĩ dami merabewati hawara yuka txakayamabiabu hawa hatu kematiruma inũ bika teneaibu hawa hatu piskumatirumaki.

⁸ Yushĩ dami kẽwaĩ txakabumisbuũ, ha yushĩ damikiri shinãkãwẽ. Namakĩ uiã keska wama shinã pehaira wakãwẽ.

⁹ Matũ shenipabu ikubiraniburã, haskakiriri shinãkãwẽ. Ea besti ẽ Deus kayabiki, betsa hayamarã. Ẽ habia Deuski, tsua betsa ẽ kushipa keska hayamarã.

¹⁰ Ẽ dami wakĩ taewani keyui kai yui ẽ txaniniki, earã. Haska tashniriamahaira haskanũbariai yui ẽ txaniniki. Haska wakatsi ikĩ yubakatã eã ẽ tashnimamiski. Haska tibi hau inũwẽ, akĩ eã ẽ yunua imiski.

¹¹ Bari huaikiria huni betsa ẽ ma kenaniki. Txaihairakea nawa tete keska hushũ haska ẽ yununi hatũ ea ashũshanikiki. Haska ẽ yubakani ẽ hãtxa menekĩ ẽ haska yuini dasibi hatũ ea ashũshanikiki.

¹² Hunibu huĩti kushibuũ, ea nĩkakãwẽ. Mã haska shinãmabiakẽ nawabu anua ẽ matu tashnimashanai ana txaihairamaki.

¹³ Eã ẽ matu tashnimabirãshanairã, ma kemaikiki. Mekekĩ hawairakirã ẽ matu piskumashanai ma txaimaikiki. Sião mekea haya wakinã, eã ẽ ashanaii. Haska watã Israelbu ẽ kushipa ẽ hatu anu buteshanaii”, itã,