Isaías 44 - Kaxinawá Bíblia (BR)

Senhor Deus ha besti Deus kayabikiaki, na hãtxarã

¹ Senhor Deusũ hatu yuikubaĩkĩ: “Jacó enabu mã Israelbu inũ, mã ẽ tsuma ẽ katuabuũ, natiã ẽ hãtxa nĩkakãwẽ.

² Ea ẽ matũ damiwakĩ bawanika Senhor Deusũnã, mã kaĩriama matu pe ewawakĩ ẽ matu merabewakubainiki. Jacó enabu Jesurum nĩkaisma mishtĩbuũ, ẽ matu katuni, mã ẽ tsumaburã, dateyamakãwẽ.

³ Mã haskawẽ taeshũ hanu tsua hiweabumanu mai hawa beneisma anu pashku wakĩ ẽ ũpash tuea habashanikiki. Matũ bababu pepawẽ duawakĩ hiwea bena inãkĩ ẽ hatu yunushanaii.

⁴ Habu yumei pairã, basi heshe sa itã yumemis keskai inũ hi hene keshakea hawẽ tatxa heneya ewai keska habu kushipashãkanikiki.

⁵ Hanushũ betsã yuikinã: ‘Earã, ẽ Senhor Deusunaki’, ikaya betsã hamebi yuikĩ: ‘Ẽ Jacó baba betsaki’, ikaya betsã hawẽ mekẽ anu kenekĩ netãkĩ: ‘Earã, ẽ Senhor Deusuna kayabi ẽ hawẽ yuraki’, akĩ hawẽ kena ana txitxikĩ Israelĩ kenayabi netãriashanikiki.

⁶ Senhor Deus Israelĩ shanẽ ibu inũ hatũ merabenanika dasibi binuatũ yuikĩ: “Earã, ea dukũ ẽ hiweni inũ ẽ hawẽ henea debesekeaki. Tsuã ea binua Deus kayabi betsa hayamaki.

⁷ Tsuã ẽ akai keska atiru hayamẽ? Ha haska haya hãtxakĩ hau ea tapĩmanũwẽ. Dami wakĩ taewani inũ u unu iki kai inũ ma hawara tashni kema bebũkiri yuikinã, tsua txanikĩ yuitirumẽ? Haskarã, tsua hayamaki. Eã besti ẽ atiruki.

⁸ Ẽ haskakẽ benimai dateyamakãwẽ! Nenumahairatiã yui ea ẽ txaninirã, matubunã, mã unaiĩ. Mã haska ekiri txanitirubuki. Deus kayabi betsa hayamẽ, mã unanã? Hayamahairaki. Hanu pashati betsa ẽ uĩsma ẽ hawa unãmaki.”

Habũ kẽwãti dami wamisbu Deusũ hatu dananikiaki, na hãtxarã

⁹ Tsuabũra habũ yushĩ dami wamisburã, haburã, hamẽki. Ha inũ, habũ yushĩ dami watã betxipaibiamisbu, hamẽriki. Tsuabũra ha dami hamẽbiakẽ kẽwaĩburã, haburã, bekũ inũ shinaũmabuki. Haskaburã, hatu usaĩ hatuki kasheti sharaki.

¹⁰ Tsuãra mane dami wakĩ yushĩ ha kẽwãti wakĩ hanushũ haki payumis anushũ hawẽ kẽwãti deus wairã, ha huninã, hanu hamapai dayatitiãbiakẽ benumiski.

¹¹ Ha dasibi habuã ha dami kẽwãmisburã, habu hatuki kasheti besti ishãkanikiki. Ha habũ yushĩ dami wamisburã, hunibu bestiki. Hanu Deusũ hatu unãti waitiã dasibi ha bebũ mapushãkanikiki. Hatu haska wa babui date paepashãkanikiki.

¹² Habũ mane dami wamisbu hatũ dayati mabu shinãkãwẽ. Mane payukĩ txiwẽ kuamisbuki. Hanushũ hawẽ pewakatsi mane kushipa betsa pewati tsumashũ mastatiwẽ mastakĩ pure pure akĩ hatũ pũyã kushipawẽ dayamisbuki. Hakia ha mane dami wanika piama dayakĩ hawẽ kushipa keyui inũ ũpash akama hĩ imiski.

¹³ Ha dikabi habũ hi dami wamisbu shinanãkãwẽ. Haska wakatsi ikĩ hi tanatiwẽ tanamisbuki, hawẽ kenetiwẽ ha tanamabaũkĩ dami wakatsi bishakinã, hawẽ keneti betsa compassowẽ ariakinã. Haska watã hi dami wanikã tanamabauni dayakĩ hi huni keska hawẽ yura hawẽrua watã hatũ yushĩ kẽwãti hiwe anu nitxĩmisbuki.

¹⁴ Haska inũ, betsarã, tsuãra kusha banaima uĩ yumewaima txipu ha kusha ewaima hayatã deratirubuki. Hamẽ haska wama ni shukua anua cedro kasmai hi betsa ewapa hamebi yumeima mekekubaĩkĩ ewapahaira deratirubuki.

¹⁵ Hanushũ yurabũ hawena watã mekinã, karu wamisbuki. Tuash betsa kuatã hawẽ yumisbuki. Tuash betsa kuatã hawẽ misi bawamisbuki. Tuash betsa dami wakĩ hawẽ deus watã ha namã beti itã kẽwãmisbuki.

¹⁶ Ha yurabu hatiribũ hi sẽke betsa namakis tuash atã karu watã hatũ nami hawẽ shuishũ pi yani wai pepemisbuki. Ha inũ, hawẽ yuii hãtxai: “Haska karu dekenepamẽ? Ea hawaira shana waikiki”, imisbuki.

¹⁷ Hanua ha hi tuash betsa teshea dami wakĩ hawẽ kẽwãti deus watã ha namã beti itã kẽwãkĩ yuikĩ: “Hawara bika ẽ teneai ea nemashũkĩ ea piskumawe. Mĩ ẽ deuski”, akĩ yuimisbuki.

¹⁸ Ha huniburã, hawa unãma inũ hawa tapiãbumaki. Beruyabia uĩkĩ pewama beshush hairabuki. Hatũ shinã hatu bepuhaira hawa nĩka pewatirubumariki.

¹⁹ Haska wabiakĩ hawa hawẽ shinãwẽ tapĩ pewama yuikĩ: “Ha hi sẽke namakis betsa tuash atã ẽ ketiã hi iki dekẽshũwẽ misi ẽ bawashuki. Ẽ nami shuishũ piriashuki. Hamẽ ha tuash betsa ẽ ha kuama bitã dami atimapa wakĩ kẽwãti yushĩ watã hi hamẽ ẽ kẽwaiĩ”, itirubuki.

²⁰ Txanimahaira txi mapu pia keska wamisbuki, hatũ shinã txakabũ hatu parãhaira pepa haska henetã txibainã. Ha huniburã hatũ txakabuwẽ taea haskatã pashatirumahairaki. Hawara hunĩ dami watã hawẽ mekẽnẽ tsumatã hawẽ shinã pemawẽ taea hawa shinã pewama ha dami hatu uĩmairã, ha huni txanitxaka bestikanikiki.

Senhor Deusũ hatũ txakabu buashũtã Israelbu ana hatu mekenikiaki, na hãtxarã

²¹ “Mã Israel Jacó enabuũ, mã ẽ tsumabunã, ea shinãkãwẽ. Ẽ matu dami wani mã ẽ tsumabuki. Israelbuũ, ea hakimakĩ ea putayamakãwẽ.

²² Eanã, haska txakabukĩ mã ea nĩkaisbuma matũ txakabu ẽ ma matu pua ashunaki, nai kuĩ dunua pua ibaini yamabaĩmis keska wakinã. Ẽ ana ma matu mebikinaĩ ea shinaĩ txĩtũribirãkãwẽ, ea anu beirã”, ikaya

²³ Isaías benimakĩ yuikĩ: Senhor Deusũ hawẽ kushipa matu uĩmakĩ Jacó enabu Israelbu ma ana hatu mebikinãki. Naiĩ, Senhor Deusũ hatu haska waiwẽ taea benimakĩ kẽwãkãwẽ. Mai kini keyatapahairatuũ, benimai sai ikãwẽ. Mati tibi inũ ni shukua inũ dasibi hi mapubaunabuũ, hawẽ kushipa uĩ benima txakayamai kãtakãwẽ.

²⁴ Matũ mebikinanika Senhor Deusuũ, mã kaĩriama matũ yura yumewanitũ matu yuikĩ: “Earã, ẽ Senhor Deusũ dasibi dami wakĩ nai hirabi kesukauana wakĩ inũ mai dikabi tashnimatã ẽ mestẽwaniki, tsuã ea hawa merabewamarã.

²⁵ Ha inũ, huniburã, ẽ hatube hãtxamabia haskashanai txanimisbũ hãtxaibu nĩkakĩ unãtã hatũ shinã ẽ nemamiski. Habu unanepai txanimisbu hatũ shinã ẽ hawama wamiski. Huni unanepakĩ yusiaĩbu ẽ hatu hamakiri yuimamiski, unanepakĩ atirububiakẽ hatũ hãtxa inũ hatũ shinã hamẽ wãkinã.

²⁶ Hamẽ habũ ea txanima txibaĩburã, hatu haska wama hatu hãtxa kayabi yuimakĩ ẽ hatu menemakubaĩmiski. Ẽ hatu yunua habu ẽ hãtxawẽ yubakaiburã, hawara akaibu pe kaĩkũkaĩmiski. Hamẽ eanã, Jerusalém yunukĩ ẽ pewairã, ana txĩtũbirã hanu ana hiweshãkanikiki. Judá maewã tibirã, ana benibaũshãkanikiki. Mae txakabuwanibu eã ẽ hatu benimakĩ keyushanaii.

²⁷ Ianẽwã netsukĩ ẽ tashka watiru inũ hau hene tibi ũpash hayayamanũ ẽ yunutiruki.

²⁸ Hanushũ Pérsia shanẽ ibuhaira Ciro yuikĩ: ‘Miarã, mĩ ẽ hatu mekeshunikaki. Dasibi haska ẽ betxipaiai miã mĩ ea ashũshanaii’, akĩ ẽ yunushanaii. Ha inũ, Jerusalém yuikĩ: ‘Miarã, mĩ ana mae benikishanaii’, akĩ ẽ yuishanaii. Ha inũ, Templo yuikĩ: ‘Mĩ mestẽwãti mishki habũ buyabirãshãkanikiki’, akĩ ẽ yuiriashanaii.”