Isaías 42 - Kaxinawá Bíblia (BR)

Hawẽ tsuma katunikiri Senhor Deus hatuki txaninikiaki, na hãtxarã

¹ Deus hatuki txani: “Uĩkãwẽ. Ẽ tsuma ẽ katunirã, ẽ betxipaiai ea benimawamiski. Ẽ Yushĩ kushipa ẽ yunua merabewaya ha ẽ tsumapã hawẽ yunuti kushipa pepakiri yurabu shukuabu tibi yuibaũshanikiki.

² Hawẽ hui kushipawẽ hawa hãtxama unãshubira hãtxai hawẽ hãtxa kaiaĩ bis bis ikamakẽ bai namaki mapushũ nĩkama ishãkanikiki.

³ Txanimahaira hawẽ yunuti kushipawẽ txakabu maemakĩ binuriama yurabuwẽ nuikĩ tawa yushtu puaka keskabu huĩti babubiabũ hatu danãma ishanikiki, bĩ pahi ibubis nukabiaya nukawama keska wakinã.

⁴ Hanushũ hawẽ yunuti kushipawẽ txakabu binuriama hawa huĩrukuãma inũ hawa punu nukai unãyamasama ishanikiki. Nawa shukua betsa betsapabu Ianẽwã Mediterráneo kesha anu hiweshũ ẽ tsumapã hãtxa nĩka pewashãkanikiki”, aka

⁵ Ha Senhor Deusũ nai hirabi dami wakĩ kaĩmani inũ, mai dami wakĩ tashnimani anu haki hamapai benemisbu inũ, yurabu haki hiweabu hiwea hatu inãkĩ hatu huĩsinamamistũ hawẽ tsuma yuikĩ:

⁶ “Ea Senhor Deusũ ẽ mekẽnẽ mia metsũshũ ẽ mia kenaniki, hau mia ikũwaĩ mĩwẽ taea ea anu piskushanũbunã. Mia haska wamakatsi mĩwẽ ẽ yubakaniki, nawa shukuabu tibi unãti wati bĩ peshea keskakĩ mĩ hatu txasha washanunã.

⁷ Haska wakĩ beshushbu mĩ hatu uĩmashanaii. Bitxiti hiwe merã hatu bitxiyamabu mĩ hatu tashnimashanaii, tsuabura meshu anu hiwea keska hatu tashnima keska wakinã.

⁸ Earã, ẽ Senhor Deuski, ẽ kena kayabirã. Hau tsuara betsã ẽ kushipa hawena keska wakĩ hau marias duawayamanũbũ ẽ hatu yunuismaki, hãtxa pepawẽ ea besti duawakatsi ikama dami yushĩ duawaibuwẽ taeshunã.

⁹ Uatiã ẽ matuki txaninirã, dasibi bebũkiri ẽ yuini ẽ ma akĩ keyuaki, menekinã. Na habiatianã, ana haskashanai bebũkiri kaka bena ẽ matu tapĩmaii, matu bebũ tashniriama bebũkiri mã unãkubaĩshanũbunã.

Deus kẽwaĩ kãtai hawẽruakĩ benimawatikiaki, na hãtxarã

¹⁰ Kãtati bena betsawẽ Senhor Deus kãtashũkãwẽ. Nenumahaira mai kesua anushũ kẽwãbaũkãwẽ. Tsuabura mã ianẽwã shashuwãwẽ mapuabu inũ, mã ianẽwã merã yuinaka hiweabu inũ, mai pakea tibi ianẽwã kesua anu mã yurabu hiweabunã, Deus kẽwãkãwẽ.

¹¹ Mai tsusĩ hawama anu inũ ha maewã wanibu, hau benimanũbũwẽ. Quedar nawabu hatũ tari hiwewẽ hiweabu hau benimarianũbũwẽ. Mae tibi anu hiweaburã, shinã txãkaĩ hau kãtanũbũwẽ. Ha dikabi mati keyatapa betsa binu keyua mamaki mapeketã nia mĩ huiwẽ benimakĩ mimawakãwẽ.

¹² Ianẽwã kesha mai pakea tibi anushũ Senhor Deus pepawakĩ shabakabi duawakĩ hau kẽwanũbũwẽ.

¹³ Senhor Deus hawa dateama mẽtsisipa keskai kaĩkirãshanikiki, hatu maematanũ ika detenamenika keskai bebukainirã. Hatu maemanũ ika bui hari sai sai ibaĩmisbu keskakĩ hawẽ hui tashnimashanikiki, haska kaĩkĩ haki sinataibu yamawanũ ikarã.

¹⁴ Senhor Deusũ ana yuikĩ: “Hatishuĩra ẽ nishma dakani inũ ẽ pes dakanirã, ẽ hui ẽ ana meketirumaki. Hakia natiã aĩbu bake kainũ ika bis imis keskai inũ, ana teneama tsekerẽ imis keskai ẽ haskashanaii.

¹⁵ Mati keyatapabu inũ mati hatiubuma yamawakĩ dasibi ni hukũmisbu ẽ tsusĩwãkĩ keyushanaii. Dasibi hene netsukĩ mai tsusĩwãkĩ ẽ hawa hayama washanaii. Iã tibiri ẽ netsu keyuriashanaii.

¹⁶ Beshushbu hatu iyukinã, bai tanamabaĩkĩ hanu uĩ buisbuma anu ẽ hatu iyushanaii. Meshu anu buaibu hatu bebũshũ bĩ hatu txashawashũkĩ mai txakabu pãpa wakĩ bebũkiri hawamawakĩ ẽ hatu pewashũshanaii. Na habu haska tibirã, hawa yupatirubuma ẽ hatu ashũshanaii.

¹⁷ Ẽ hatu haska wabainaya dami yushĩ inũ hawẽ kẽwãti tibi tsuabũra hatu yuikĩ: ‘Maturã, mã nukũ deusbuki’, hatu amisburã, haburã, hatũ damiki dakekĩ henebaĩshãkanikiki”, itã

Israelburã, beshush keska inibukiaki, na hãtxarã

¹⁸ Deusũ ana hatu yuikĩ: “Patabuũ, nĩkakãwẽ. Beshushbuũ, shinãkĩ unãkãwẽ.

¹⁹ Israel ẽ hãtxa bunika wakĩ ẽ katubiani yura betsabu tsua haskamabiakẽ Israelbu ẽ hãtxa bunikabubia mã beshush keskabu inũ mã pata keskabu mã ẽ tsumabuki.

²⁰ Ẽ betsa betsapa matũ berubi ẽ ashuaĩ uĩbiakubirani ha shinãkĩ mã uĩkatsi ikabumaki. Nĩkabiakĩ mã hawa nĩka pewabumaki.

²¹ Ẽ matũ Senhor Deus piskumanikatũ ẽ yusiã hawẽruawẽ ẽ matu e imati ewapa ashũbiakubaina

²² hakia mã Israelburã, matuki sinataibũ matu anua yumetsukĩ inũ matũ hamapai mebĩ keyubaĩkĩ matu atxitã dasibi matu bitxikĩ iyumisbuki. Hari matu bitximabu tsua matũ merabenã kashũ matu kaĩmakĩ bepẽshuĩsmaki”, ikaya

²³ hanushũ Isaíasĩ hatu yuikĩ: “Matu haska wabia, haskakĩ uĩtã mã shinã betsa waisbumamẽ? Hamẽ haskashanaiburã, tsuã haska nĩkakatsis ikimẽkaĩ?

²⁴ Jacó enabu, Israelburã, hau hatu atxitã bitxishanũbũ tsuã hatu yununimẽ? Txanimẽ, Senhor Deusũ hatu anirã? Txanimaki. Habu Deuskiri txakabuhairakĩ hawa txibã pewama bai kayatapia hatu unãti wamabiakubaina hawa hawẽ yusiã nĩkakĩ txibãshunabumaki.

²⁵ Haskawẽ taeshũ Deus habuki sinatakĩ kupikĩ detenamenikabu Deusũ yunua hawairabirã txiwẽ hatu kuaniki. Hatu haska wabia hawa betsã taska uĩtã tapĩkatsi ikama inibuki.