Isaías 40 - Kaxinawá Bíblia (BR)

Deusũ Jerusalém anu hiweabu ana hatu merabewakĩ hatu daewashanikiaki, na hãtxarã

¹ Eska matũ Deusũ matu yuikiki: “Enabu merabewai hatuwẽ nuikĩ ea hatu daewashũkãwẽ.

² Hãtxa duapawẽ Jerusalém anuabu merabewakĩ ea hatu hãtxa washũkãwẽ. Hatu yuikinã, matu tsuma wanishũ matu dayamamisburã, ma keyuaki. Mã kanetxakayamakubaĩmiswẽ taeshũ ẽ kupiti kushipahaira bestikima ẽ ma matu tenemakubainimaki. Haska memakĩ matũ txakabu ẽ ma matu pakamaimaki”, ikaya

³ haniara hui tashni sai ikĩ yuikĩ: “Hanu tsua hiweabumanu bai pewakĩ Shanẽ Ibũ bai pesashũshãkãwẽ. Hanu hawa hayamahaira anu bai yushtuma wakĩ kayatapĩbaĩkĩ nukũ Deus bai pewashũshãkãwẽ.

⁴ Napaku tibi pewakĩ mai mata wakĩ mati matipa pãpa wakĩ mai shãtu shãtupa inũ mati matipa betsa wakĩ dasibi sapa wabaĩkĩ pewashũshãkãwẽ.

⁵ Mã ma haska washũkẽ hanushũ Shanẽ Ibũ hawẽ kushipa pepa hatu uĩmai huaya dasibi yurabu haki itxashũ uĩshãkanikiki. Hamebi Shanẽ Ibũ haska yuikiki”, ikaya

⁶ haniara hui ana tashni sai ikĩ ea yuikĩ: “Sai iwe!” ea waya Eã yukakĩ: “Harakiri sai ipa?” ẽ aka ea yuikĩ: “Yurabu dasibirã, basi keskabu bestiki. Hatũ kushiparã, ni hua keska bestiki.

⁷ Shanẽ Ibu Senhor Deusũ hatu mamakishũ shũ akaya basi txushi inũ hua utsi shanamiski. Yuraburã, txanimahaira basi keskabu bestiki.

⁸ Basi txushiaya hua utsi shanamiski. Hakia nukũ Deusũ hãtxarã, ha besti hawa betsama mestẽ ipakenũbarikiki”, ikĩ

⁹ Sião yuikĩ: Siãonã, mati keyatapa hawẽ henea mamaki mapeketã hui kushipawẽ sai ikĩ kaka pepa txaniti hatu banabimariwe. Jerusalémnẽ, hawa dateama mĩ hui tashnimakĩ kaka pepa Judá maewã tibi anu hiweabuki hatuki eska txaniriwe: “Na habia matu dapiki, matũ Deusrã!” hatu wakinã.

¹⁰ Uiã. Shanẽ Ibu hawẽ kushipaya hawẽ pe yunutiwẽ hatu pe mekei ma huikiki. Hawenabu merabewakĩ hatu piskumatã hatũ manakuti pepa hatu inãshanikiki.

¹¹ Txashuwã mekenikatũ hawẽ txashuwã shukua hatu mekemis keska wakĩ txashuwã bake bitã hawẽ shutxi anu ikubaĩkĩ inũ dama kaĩ benabu meke pewamisbu keska wanũ ika ma huikiki, nukũ Shanẽ Iburã.

Israelĩ Deus ha kayarã, kushipahairakiaki, na hãtxarã

¹² Ianẽwã itamamai panirã, tsuã hawẽ mekẽ hanakubaĩkĩ ma tananimẽ? Nai natukanã, tsuã hawẽ mekẽnẽ meshãtã ma tanakubainimẽ? Mai mishpu kuru mai hirabi anuarã, tsuã itxawashũ kukiki ma tananimẽ? Mati tibi betsa betsaparã, tsuã ma itxawashũ ma hawẽ shãkama keyunimẽ?

¹³ Senhor Deusrã, tsuã hawẽ shinã unãti wakĩ merabewanimẽ? Tsuã merabewakĩ yusinimẽ?

¹⁴ Hau Deusũ nĩkatã yunu pewanunã, tsuã hawẽ shinã betsa inãnimẽ? Kaneama pepa inũ txakabu hau unãti wanunã, tsuã yusinimẽ? Damini inũ yumeai hau unanũ, tsuã tapĩmanimẽ? Hau unanepanũ, tsuã hawẽ shinã tapĩmakubainimẽ?

¹⁵ Deusũ shinanã, eskaki. Nawa shukua tibi uiainã, ũpash tusua keska bestiki. Balança anu mai mishpu bestitxai hana keskabuki. Ianẽwã anu natukã mai tibirã, hawẽ karurã, mashi beru bestitxai keskaki.

¹⁶ Mai pakea Líbano dasibi ni shukua anua haska Deusũ yuinaka betxipai keska menushũtirubu damaki. Ha inũ, habianuri karu washũ ha yuinaka menutirubu damariki.

¹⁷ Nawa shukua tibi dasibi hiwebaunaburã, ha bebunuarã, hawamahairabuki. Hatũ habukiri shinanã, hawenarã, hamẽ hawa karumahairaki.

¹⁸ Matubũ Deus mã unãti wakĩ shinanã, haratu keskamẽ? Haratu dami besu keskamẽ?

¹⁹ Huni yura dami wanikatũ huni keska wakĩ dami wamisrã, haska keskamẽ, Deusrã? Tsuãra mane dami wakĩ huni wa hanushũ ouro pewanikatũ hawẽ yura ourowẽ pushatã prata mane dispi txiwetameya sawemakĩ hawẽ yura kaĩmamiski.

²⁰ Hamẽ habu pei heshe hayamatũ hi kushipa katutã hi dami wanika unãhairai betxitã yunukĩ dami hamebi tĩ itiruma hatu amamiski. Haska keskamahairaki, nukũ Deusrã.

²¹ Matubunã, haskarã, mã unãmahairamẽ? Haska yuiniburã, mã nĩkaismamẽ? Bebũkirirã, matu yuiama inibumẽ? U unu mai dami waitianã, nĩkakĩ mã unãma inimẽ?

²² Nukũ Deusrã, naĩ mai atxia mamaki hawẽ shanẽ ibu hanu tsauti hayaki. Hari tsaushũ hunibu uĩkinã, shini keska hatu uĩkiki. Naiwẽ hatu atxi keyukĩ hawẽ hatu bepu keyuaki. Tari hiwe txumia hatu pũtea keska wamiski.

²³ Huni shanẽ ibubiakẽ betsa wakĩ hawama hatu wamiski. Mai anu yununika kushipabubiakẽ hatu mitanuma wamiski.

²⁴ Haburã, mibã betsa dama banabu hatũ tatxa mai anu hawẽ tapũ hayariama mestẽriama keskabuki. Deusũ hatu mamaki shũ aka txushimis keskabuki. Uiyabi niwewã bekĩ hawẽ pei shana nuyamabaĩmis keskabuki.

²⁵ Deus meribitũ hunibu yukakĩ: Matubunã, ẽ tsua keska mã ea shinaĩ? Tsua ea keska itirumẽ?

²⁶ Bewenikitã naiuri matũ beruwẽ uĩkãwẽ. Ha dasibirã, tsuã dami wanimẽ? Haska bishi tibi txasha kaiãkeakeai hatũ kenawẽ ẽ hatu kenamiski. Haskawẽ taea Deusũ hawẽ kushipa tibiwẽ hatu mekea hatũ txasha hawa benutirubumaki.

²⁷ Jacó enabu Israelbuũ, haskai mã ha ikai? Haskakĩ mã eska yuiai?: “Ẽ hiwe txakabiakẽ Senhor Deus ewẽ nuikĩ ea merabewamaki. Deusũ ea shinãmaki”, ikĩ

²⁸ matubunã, mã unãmamẽ? Mã nĩkaismamẽ? Nukũ Senhor Deus ikibi ini mai hirabi bawakĩ dami wanirã, harã, punu nukatiruma inũ hĩ itirumaki. Haska dasibi shinãkĩ unã keyuai tsuã nĩkakĩ tana keyutirumaki.

²⁹ Punu nukabu ana hatu kushipa inãkĩ babubu merabewakĩ ana hatũ yura kushipa wamiski.

³⁰ Berunãbubia punu nukai huĩti nishmatirubuki. Kushipabubia hĩ iki di itirubuki.

³¹ Hakia tsuabura Senhor Deuski txiti ikaburã, ana kushipa bena hayakubaĩkanikiki. Kushikaini hawa punu nukatiruma inũ bai tanabaini hawa babutirubumaki, ixmĩ hawa peshukuama nuyakaunai keskairã.