Isaías 35 - Kaxinawá Bíblia (BR)

Sião mae anu yurabu ana txĩtũshãkanikiaki, na hãtxarã

¹ Hanu tsua hiweabuma anu mai tsusĩ benimashanikiki. Hua hawẽrua tueaya benimashanikiki.

² Hua itxapa hawẽrua tueaiwẽ mai tsusĩ benimai shinã txãkãshanikiki. Hi hawẽrua Líbano keska hanu tsua hiweama anu Deusũ hawẽruahaira washanikiki, Mati Carmelo inũ napãpa Sarom hawẽ mai pepa keska wakinã. Deusũ haska wakeakeaya dasibibũ hawẽ kushipa hawẽrua uĩshãkanikiki, nukũ Senhor Deus haska shanẽ ibu pepahaira ikũkainayarã.

³ Hanushũ babubu hatu shinã txãkãwãkĩ punu nukabu hatu kushipa wakãwẽ.

⁴ Datebu hatu yuikinã: “Ana dateama benimarikãwẽ! Na habia matu dapiki, matũ Deusũ matu piskumakatsirã. Matu meketã matuki sinataibũ haska betxipaimisbu keska habũ txakabumiswẽ hatu kupikĩ tenemashanikiki.”

⁵ Hanushũ bekũbu bepeshetã uĩshãkanikiki. Patabu pape ikĩ nĩka pewashãkanikiki.

⁶ Mestẽtiya tiri iki mapuabu txashu ishtxumisbu keskai bĩtu bĩtu itã titi ishãkanikiki. Huyubu hãtxa pesei sai sai ishãkanikiki. Hanu tsua hiweabuma anu mai tsusĩ anua hene tuebaini pashkukaini kushibaĩshanikiki.

⁷ Hanu tsua hiweabuma anua betsai iã tsaushanikiki. Mai tsusĩhairabia hanu pashku debu itxapa hayashanikiki. Natiã hanu kamã inu besti hiwemis anurã, tsu ati tawa inũ ha una wati basi pepa beneshanikiki.

⁸ Habianuri kapuketi bai betsa hawẽ kena kenakinã, “Bai Meribi Deusunaki”, ashãkanikiki. Tsuabũra hatũ txakabu pewai txukisbuma ha baiwẽ butirubumaki. Nĩkaisbumari hanu mapui hawẽ kapuketirubumariki.

⁹ Ha bai anu inu betsa leão hayama inũ yuinaka mese pianãbu hari buama ishãkanikiki. Ha bai meribi anurã, txakabũ hatu tsumani Deusũ hatu peka ana txakabuuma hanu mapui txĩtũbirãshãkanikiki,

¹⁰ tsuabura Deusũ hawenawakĩ hatu binirã. Hawẽ maewã Sião anu hikibaini kãtai benibaĩshãkanikiki. Hari hikitã hiwea benimai heneama ipakeshãkanikiki. Haburã, benimai shinã txãkã bestishãkanikiki, haria ana kashai bika tenei eẽ ikama yamakaini pes dakashanikiki.