Isaías 33 - Kaxinawá Bíblia (BR)

Nukũ Shanẽ Ibũ nuku meke taewai hushanikiaki, na hãtxarã

¹ Mã hatu txakabuwamis tsuã matu kupikĩ txakabuwariama, mã peirawa! Hawa banabimama huni betsa parãtã mã hatu atximis maturi tsuãra matu parãshanairã, mã peirawa! Matũ dukũ hatu txakabuwakĩ mã keyushĩkẽ maturi txakabuwakĩ yamawashãkanikiki. Hawa hatu banabimama mã hatu atximakĩ keyushĩkẽ maturi atxitã iyuriashãkanikiki.

² Senhor Deusuũ, miki txiti ikĩ nũ mia manaii. Nukuwẽ nuiriwe! Penama tibi mĩ kushipawẽ merabewakĩ nuku uĩmakubaĩwẽ. Nũ bika teneaitiã nuku merabewakĩ piskumakubaĩwẽ.

³ Ha mae anu hiweabu mĩ hatuki sinatai nĩkabaini pashamisbuki. Mĩ nuku merabewai huaya nawa shukubaunabu detenamenikabu pashai sa ibaĩshãkanikiki.

⁴ Hanua nawa betsaburi shini mirima keskabu bekĩ ha nawabuki hatuki sinatai niri ibirã hatu maematã hatũ mabu pepa hatu mebĩshãkanikiki.

⁵ Naiurirã, Senhor Deus shanẽ ibu dasibi binu keyua hiweaki. Ha nukũ Deusũnã, Sião anu hawa kanetiruma inũ hawẽ yunuti kushipa pepawẽ atxishanikiki.

⁶ Bari tibi hawenabu hawa putama hatu mestẽwãkubaĩmiski. Hawẽ unanepati inũ hawẽ txakabu inũ pepa unãtirã, harã, keyuisma pepahaira hiweatũ nuku piskumatiruki. Deusũ matu hawẽ datemairã, hawẽrua pepa meseki.

⁷ Nĩkakãwẽ. Huni detenamenikabu kushipabu bai tanabirani sai sai ikaibu habu haki sinataibube unanuma hiwenũ ika hatube yubakabiatãshina ha shanẽ ibu hãtxashunikabu ma kashakanikiki.

⁸ Hatũ bai anu ana hari mapuabuma inũ tsua hanu buabumaki. Hatube yubakai hãtxanamekĩ daya yuishinabu ma meshteabuki. Tsua hatuki mesekĩ hatu nĩkabumaki.

⁹ Ha mai pakea anu hiweaburã, punu nukai huĩti nishmatã kashakanikiki. Líbano hi shukua hamẽ hawẽ pei hawẽrua ibiaima ma shanai dakekanikiki. Napãpa Sarom hawẽrua ibiamis betsai ana hawa hayamaikiki. Basã mae inũ Mati Carmelo mai pepahairabia betsai hanu ana hawa hayama mai berẽ aka keskabuki.

¹⁰ Haskabiaibũ Senhor Deusũ yuikĩ: “Natianã, eska ẽ aka ẽ matukiri shinaiĩ. Eã ẽ hatu binu keyua shanẽ ibu kushipahaira dasibibu ẽ kushipa ẽ hatu unãmakatsis ikaii.

¹¹ Mã haska yubakamis inũ mã haska dayamisrã, matuburã, mã sheki shaka keska inũ mã txaka itxawashũ putamisbu keskabuki. Ẽ shũ akaya txi ketikaĩkĩ dasibi atxi keyutiruki.

¹² Enabuki sinataibu ha nawabu ẽ txiwẽ hatũ yura menua mapu bestitirubuki, musha meshteimabu txiwẽ kua keska hatu wakinã.

¹³ Mã txai hiweabunã, haska ẽ ashiã mã nĩkashanaii. Ha inũ, mã urama hiweabunã, ẽ kushipa unãkĩ mã uĩshanaii”, ikaya

¹⁴ Sião anu huni txakabu hiweshũ txakabuwamisbu datei habu saki saki ikaibũ habu patapai txakabumisbu date paepakĩ habũ yuikĩ: “Deusũ txiwẽ nuku kupikĩ yamawai inũ hawẽ txi nukaisma ikibi ikanurã, nukuburã, tsuabu nũ hari hiwetirubumẽ?” ikaibũ

¹⁵ eskabu besti hiweshũ yuimisbu, habu pashatiruki. Habu pe hiwekũkaĩkĩ hãtxa txanima yuimisbu inũ, habu mabuwẽ kemui hiwekĩ betsabu itxakawaisbuma inũ, mabu inãkuĩ bitã hatu hawẽ parãkĩ hatũ shinã betsa wamaisbuma inũ, pubẽbũ shinã habũ nĩkatã hatu txibaĩsma inũ, txakabuaibu hatu uĩkĩ txibãkatsi ikama bekua keskashũ shinãmisburã,

¹⁶ haburã, txanima hatũ hiwea mestẽki. Hanu pashai hiwei meketiruburã, hatũ hiwe kushiparã, mishki hiweki. Habu hiweabu anurã, piti hamẽ ikai inũ ũpash hawa yupama ishãkanikiki.

¹⁷ Isaíasĩ ana hatu yuikĩ: Dasibibũ ha shanẽ ibuhaira hawẽ kushipa txasha txasha ikai matũ beruwẽ mã ana uĩshanaii. Txaihaira hiwebiabaũshũ hawẽ mai pakea ana sheka ibubis mã uĩshanaii.

¹⁸ Haska betsa betsapawẽ matu bika tenemabu ha shinaĩ mã hawẽ datei hiwemis shũ yuikĩ, “Habũ nukũ pei imposto bitã tanamisburã, hania? Habũ nukũ pei imposto bitã hawẽ shãkama unãtiwẽ unãmisburã, hania? Nukũ uĩbaũti hiwe keyatapa anushũ habu nukuki sinataibu beaibu betxinũ ishũ uĩmisburã, hania?”

¹⁹ Hãtxa atimapaibube ana hatube husia hiweama inũ nawabũ hãtxa bikahaira mã haskatã nĩkatirubuma anu mã ana habube hiweama ishanaii.

²⁰ Sião maewã uĩkãwẽ, hanushũ Deus kẽwaĩ nũ besi peaiburã. Ha Jerusalém maewã kushipa hanushũ tsuã matu ana bikawatiruma anu shinãkãwẽ. Ha maewanã, tari hiwe pũtekĩ mestẽwã keska tsuã hawẽ nitxĩ tibi betsetirubuma inũ hawẽ dispi tesatirubuma keskaki.

²¹ Hanu Senhor Deus hawẽrua kushipa pepa nukube hiweshũ nuku uĩmashanikiki. Ha maewã anu hene hashpa habai kushipai hayashanikiki. Hanu matuki sinataibu habũ matu detenũ ika hatũ shashuwã tueĩ mapuabu kushipabu ha henewẽ ana hikitã mapuama ishãkanikiki.

^22-23 Ha shashuwã natxãkãki hawẽ dispi tibiki ha tari haki pũtea niwe bekĩ ana pũtes wamawẽ taea ha tari pea pea itiruma ishanikiki. Hatũ shashuwã ana harakiri katirumakẽ haki inatã habu nukuki sinatamisbũ mabu pepa dasibi mapematã mabu nũ pashkaibũ bekũbu inũ tekeyabũri habuna bishãkanikiki. Ha haskaibutianã, Senhor Deusrã, nukũ Shanẽ Ibu inũ, nukũ unãtinanika inũ, nukũ hãtxa pewatã txibãmanika ishanaiwẽ taea hatũ nuku piskumashanikiki.

²⁴ Haskaibutiã ha maewã anu hiweabu betsa taska: “Ẽ isĩ tene hayaki”, iwanã, yuiama ishãkanikiki. Jerusalém anu hiweabu txakabumisbu Senhor Deusũ hatũ txakabu ana shinãma hatu buashũshanikiki.