Isaías 31 - Kaxinawá Bíblia (BR)

Deus yukama Egito anua merabe yuka ikaibu Deusũ betxipaiama inikiaki, na hãtxarã

¹ Tsuabũra mã Egito anu merabe yukai mã buaiburã, mã peirashãkãwã! Cavalo itxapa mã hayatiru inũ, haki tarãbaĩti itxapa mã hayatiru inũ, cavaloki katsaumebaĩmisbu mirima mã hayawẽ taea ana tsuki dateama haki txiti itã shinãkĩ mã ikũwãtirubia harã, hamẽki, Israelĩ Deus meribi anu txĩtũkĩ mã shinã betsa wai uĩmakĩ benakatsi ikamarã.

² Hakia ha Deusrã, unanepahairaki. Hamapai tibi atiruki. Txakabu watiru unaĩkiki. Hawara yuitã maewakĩ ana shinã betsa waismaki. Huni txakabubu hatuki sinatakĩ hatu kupishanikiki. Habũ txakabuwaibu tsuãra hatu merabewamisbu hatuki sinatariamiski.

³ Egito nawaburã, hunibu bestiki, deusmarã. Hatũ cavalorã, nami inũ shau besti hayaki, yushĩmarã. Deusũ hawẽ kushipa yunukĩ hatu kupiaitiã ikirã, eskashãkanikiki. Egito nawabũ hawẽ kushipawẽ mekenikabu inũ Israelĩ enabu hatuki iruaibu ha dabe mawai dasibi hanus di ishãkanikiki, benui keyuirã.

⁴ Senhor Deusũ ea yuikĩ: “Ea Senhor Deus kushipahaira dasibi binu keyua Mati Sião anua enabu Israelbu hatu merabewai hui ẽ eskakirãshanaii. Inu betsa leão inawã txashuwã bitã piaya txashuwã mekenikabũ leão datekĩ kushimanũ itã hanus itxatã sai sai abiabu leão hawa dateama imis keskai eari haska keskariai ẽ hushanaii.

⁵ Isapã hawẽ bake mekea ha mamaki nuyakaũmiski. Haska keskariai Senhor Deus dasibi binua Jerusalém mekei ẽ haskashanaii. Earã, ẽ hawẽ mekenãki. Ẽ hawẽ piskumanikaki. Ẽ hawẽ mepamanikaki. Nuitapaibu ẽ hatũ pashawanikaki”, ea wakubainikiki.

⁶ Israelĩ enabuũ, mã habũ Deus berabĩwãkĩ mã danã paepawabiairã, shinã betsatã Deus anu berikãwẽ.

⁷ Ouro mane inũ prata mane matũ mekẽnẽ dami watã kẽwaĩ mã txakabumisrã, hawatiãra matu dasibibũ matũ dami danãkĩ mã putaya

⁸ mã haska waitiã Assíria nawabu matxatu txaipawẽ debushãkanikiki. Habu haskairã, hunibũ kushipawẽ ikama ishanikiki. Detenameaibutiã ha nawabu hatunabu pashashãkanikiki. Detenamenika betsabũ ha berunã betsabu detenamenikabu hatu tsuma wakĩ escravo washãkanikiki.

⁹ Hatu haska waibũ hatũ shanẽ ibuhaira date paepai kaĩkaini kushikaĩshanikiki. Hawẽ detenamenika shanẽ ibu beshmasbũ hatũ unãti tari bandeira pusteya pekama haki petxitã kushiriabaĩshãkanikiki. Jerusalém anushũ txiwẽ hatu kupikĩ kuati Deus hayaki, hanu haki sinataibu hanushũ hatu kupitirã. Haska hãtxakĩ Senhor Deusũ mestẽwaĩmaki.