Isaías 30 - Kaxinawá Bíblia (BR)

Egito merabe yukabiai hamẽshãkanikiaki, na hãtxarã

¹ Deusũ hawẽ hãtxa mestẽwãkĩ yuikĩ: “Ẽ yusiã nĩkaisbumã bakebuũ, mã peirashãkãwã! Ebe hãtxai yubakamabia mã ibubis yubakaii. Haska eã daya shinãkĩ ẽ matu yunuamabia ibubis matumebi daya tibi akatsis ikĩ mã katumisbuki. Haska shinãkĩ mã itxawamisrã, txakabu itxapa mãtxiã keska wakĩ mã ewawaii.

² Bebũkiri ebe hãtxakĩ ea yukama hawa shinãma hawaira Egito anuabu merabe benai hari iruti keska shanẽ ibuhaira Faraó anu mã benamiski, Egito anu hari irui utati keska anu hanu irunũ ikarã.

³ Faraónẽ kushipa iruti mã benabiai ka iruti hayamakẽ hawẽ taea mã dake bestishãkanaii. Hawẽ hanu irui utati mã benabiai ka matu ashuãmawẽ taea mã babukirãshanaii.

⁴ Egito maewã dabe Zoã inũ Hanes anu hari matũ shanẽ ibu hãtxashunikabu mã yunubia

⁵ ha nawabũ hawa matu merabewama hamẽ matũ shanẽ ibubu bushiãbu dakebirãshãkanikiki. Hawa merabe inũ benima matu beshuãma txakabu inũ dake pae matu beshũshãkanikiki.”

⁶ Egito nawabũ hau hatu merabewai benũbũ, tsuabũra hatu benai buirã, eskashãkanikiki. Hatũ jumento inũ hatũ camelo kamaki hatũ mabu inũ hatũ inãkuĩ pepa peumatã ha mai pakea Egito mae anu hamẽ bushũshãkanikiki, eska anu kapukebaĩkinã, hanu tsua hiweama sul anu yuinaka mese pubẽ itxapa hiweabu anu inu betsa leão hi hi ikai inũ, dunu paepa pianãbu inũ, yuinaka sheanã nuyabaunaibu anu nashui ikaĩkinã.

⁷ Egito ana kushipa hayama inũ hawa hatu merabewatirumawẽ taeshũ hawẽ kena betsa dabikĩ: “Yuinaka mese atimapa hawauma hi hi ikai keskaki”, akinã.

⁸ Isaíasĩ, uĩwẽ. Na habiatiã hi besha sapa bishũ haki keneriwe. Eska netãkĩ kenebaĩkinã, ha kene txanipaketi hawa tushkutima inũbariai wawe.

⁹ Ha yura hiweabu yusĩ nĩkaisma sinatapabu inũ Deusũ yusiã txibã pewaisma unaĩsmapabuki, habũ Deusũ yusiã hawa nĩkakatsi isbumarã.

¹⁰ Ha habũ haskashanai bebũkiri unãmisbu habiabũri hatu yuikĩ: “Nama keskakĩ ana uĩyamakãwẽ”, ikĩ hanushũ Deusũ hãtxa yuishunikaburi yuikĩ: “Haska txanima mã uiaĩ ishanai nukuki txaniyamakãwẽ. Hawara nũ ikai hawẽ nuku dake wama nuku hãtxa pe besti wakãwẽ. Nũ kanebiaya haskaira nuku nemayamakãwẽ.

¹¹ Nenu ana mapuama nuku dapashkarikãwẽ, Deusũ bai kayabi meshtebainirã. Israelĩ enabũ Deus meribi bebũ ana nuku nitxĩyamakãwẽ”, ikaibũ

¹² haskaibuwẽ taeshũ Israelĩ enabũ Deus meribitũ hatu yuikĩ: “Bebũkiri haska ẽ matu yuibia mã ha danaiĩ. Detenamei itimaskai inũ txakabuwabauni haki besti txiti ikĩ hatũ matu merabewatiru keska mã ha benaii.

¹³ Haskawẽ taea ha txakabu tibi mã akairã, hawẽ kupiti mã biairã, matunaki. Mae mishkiwẽ kenebaunibu keyatapabia txakabui taei tuash ikũkaini hakiri mã shinãmakẽ pikutã hawaira di iki berãmetiru keska mã haska keskaki.

¹⁴ Mai shumuwã txakabui pusi tureke tureke itxakayama hawa hawẽ ture betsa bitã txi dekẽ hawẽ beatirubuma inũ ture betsawẽ ũpash kini anua mã ũpash bitirubuma keska mã haska keskai yamashanaii.”

¹⁵ Ha Israelĩ enabũ Deus meribitũ hatu yuikĩ: “Eanu txĩtũtã unanuma mã bashikuairã, mã piskushanaii. Ha unanuma mã hawẽ hiwei hawa dateama mã haki txiti ikairã, hanu mã hawẽ kushipaii”, ẽ matu wabia hakia matubu mã haskakatsi ikamaki.

¹⁶ Haska shinãma hãtxakĩ yuikĩ: “Nenua ẽ haskakatsi ikamaki. Cavaloki katsaumetã ẽ pashai kaii”, mã ikaya Peki. Txanima haskai mã pashatirubuki. Ana matũ yuikĩ: “Cavalõ tarãbaĩtiki tsautã nũ kushimabaĩshanaii”, mã ikaya Peki. Txanima mã kushikaini pashayarã, haburi kushibaĩkĩ matu txibãshãkanikiki.

¹⁷ Huni bestitxai matuki tanakirã matu mese wabirana 1.000 yurabu hawẽ datei mã pashashanaii. 5 hunibu matuki tanariakirã matu mese wabiranabu hatuwẽ datei dasibibu mã pashariashanaii. Matu haska wabu eskarabeshaira mã tesheshãkanaii, mati keyatapa binu keyua mamaki hi bestitxai nia keskai inũ hawẽ unãmati mati pishta anu tari bandeira pũtea niwẽ pea pea amis keskairã.

¹⁸ Mã haskabiashanaya Senhor Deusũ matu manaikiki, hawẽ nui pae matu uĩmakatsirã. Haska matuwẽ nuitxakayamai matu uĩmakatsi ikikiki, ha Deus yunuti kushipa kanetiruma hayawẽ taearã. Senhor Deus dasibi tsuabũra mã manakaibuwẽ taea hawẽ benimakanikiki.