Isaías 28 - Kaxinawá Bíblia (BR)

Samaria mai pakea haskashanai bebũkiri hatuki txaninikiaki, na hãtxarã

¹ Samaria anu hiweabuũ, mã peirawa! Efraimnẽ maewã Samaria hawẽ maiti hawẽrua keska wakĩ hawẽ kẽmisburã, harã, habu paẽmisbũ maeki. Hua hawẽrua keska ibiaima ana hawẽruama utsitã txapuai keska bestiki. Mati mapãpa anushũ hatũ yunu bai tenãmã mai pepa uĩmisbu hanu hiweabu vinhowẽ kemui haki neshenibũ akĩ heneisbumaki.

² Senhor Deusũ huni kushipa ma hatuki tanashũ pewani txipu Samaria anu yunushanikiki. Hawẽ kushiparã, barush ui mesehaira niri ikai keskaki. Niwe kushipahaira bekĩ dasibi txakabuwamis keskaki. Ui tueketã heneisma keskaki. Hene bai mata txakayamakĩ dasibi atxibaĩmis keskaki. Hawẽ mekẽnẽ mai txakabuwakĩ berãkĩ

³ Efraimnẽ mae hawẽ maiti hawẽrua keska anua paeĩ hawẽ kẽmisburã, hawẽ taewẽ pema pema akĩ yamawashanikiki.

⁴ Ha hua hawẽruabiaima ma utsiaya mananãshũ tenãmã uĩkĩ mai pepa anua yunu banaimabu keskabia hawaira keyushãkanikiki, ha figo bimi hanu ikaitiã ha dukũ hushiã uĩkĩ tsekashũ pimisbu keskairã.

⁵ Ha haskaitianã, Deus dasibi binua shanẽ ibui maiti pepa txashakapa hawẽrua sawea keska ishanikiki. Ha hawẽ mae tesheniburã, haburã, Deusũ kushipawẽ hawẽruai pepahairashãkanikiki.

⁶ Habũ unãti wanikabu tsaushũ hatu unãti waibu Deusũ hatu merabewakinã, hawẽ yunuti kushipa pepa hatu inãshanikiki. Hatuki sinatai beaibu hau nemanũbũ detenamenikabũ habũ mae mekeabu hatu kushipa washanikiki.

Bebũkiri Jerusalémkiri Deus yubakani shabakabi wakatsi hatu yuinikiaki, na hãtxarã

⁷ Betsabu ikirã, vinhowẽ paeã ni peama keshka keshka iki hanua shia paepa aki hawẽri paẽhairai berame berame iki di imisbuki. Habu hawenabu Deusbe hãtxashunikabu inũ Deusũ hãtxa yuishunikabũ ha shia paepa akawẽ taea ni peama keshka keshka iki inũ vinho aki paeãwẽ taea shinã pe watirubumaki. Nama keskakĩ habũ Deusũ yusiã uĩkĩ nĩkabiatã pe shinãtirubumaki. Paẽtã hatu unãti wakĩ haratu pe inũ haratu txakabumẽ, ishũ hatu unãtirubumaki.

⁸ Tapu tibikia paẽtã haki hanãbu hanã matai keyuawẽ taea hani shũpĩ betsa pisi mayama hayamaki.

⁹ Patapakirã habu eanu bea hãtxakĩ yuikĩ: “Neri tashnikirã nuku yusĩwẽ. Haska Deusũ mia uĩmai nuku yusĩwẽ. Nukuburã, nũ bakeishta keskamẽkainã,

¹⁰ dama hãtxa pesakĩ yuiai keskaburã: ‘ba, be, bi, bo, bu’ ”, nũ ikaii, hãtxa unanumas yuirã.

¹¹ Hakia haskabiai ha Samaria anuabũ ẽ yusiã pe nĩkabumakẽ nawabũ hãtxa nĩkatirubumawẽ habu Deusũ atxishanikiki, haska hãtxa nĩkabumawẽ hatu bika tenemakĩ Deusũ hatu hãtxa watiruma keska wakinã.

¹² Bebũkiri Senhor Deusũ hatu yuikĩ: “Nenu nishma daka anua mã huĩrukũtiruki. Nenu mã punu nukabu hanu bashikutã mã huĩrukuĩ dakatiru hayaki.” Ẽ hatu wabia habũ ea nĩkabumaki.

¹³ Haskawẽ taeshũ Senhor Deusũ hatu hãtxa wakĩ bakeishta tanaĩbu hatu ana yusĩshanikiki, habũ dama tapĩkĩ uiaĩbu keskarã. Haskawẽ taea haburã, ni peama petxiuri manãska tĩ ika keskabu ishãkanikiki. Betsabu deteaibũ, betsabu birũ merã hikitã hani pashatiruma keskabu ishãkanikiki.

¹⁴ Shanẽ ibukĩ hãtxa atimapawẽ yuikĩ mã Jerusalém mae yunumisbuũ, Senhor Deusũ hãtxa nĩkakãwẽ.

¹⁵ Matũ yuikĩ: “Hau isĩ txakabu hua nukuki nukuyamashanũ ika ha mawa mekenikabe nũ ma yubakaimaki. Mawa bumisbu anu nũ ma habe yubakaimaki. Nũ hawẽ irui meketiru mã benairã, txani besti nũ benaii. Hunenũ ika txaniwẽ besti nũ parananãkũkainaii”, ikaibũ

¹⁶ haskaibuwẽ taeshũ Senhor Deusũ hatu yuikĩ: “Mishki karuhaira ẽ katuni ha mishki uĩbaĩ hakimatima haki tsamabaũkĩ mestẽwãti Sião anu ẽ tashnimashanaii. Tsuãra ha mishki betxipaikĩ katutã hawẽ datetirubumaki, ma haki txiti ikarã.

¹⁷ Ha hiwe benikinã, hawẽ tanati mane shãkama dispi derũtãshũ tana pewamisbu keska hawẽ yunuti kushipa kanetiruma ishanikiki. Hawẽ tapa yushtuma keska wakĩ hawẽ hãtxa kanetirumawẽ ẽ ashanaii”, hatu wanikiaki. Txanitxakakĩ ha hune iruti mã benamisrã, barush ui ikĩ yamawashanikiki. Hene bai matabirãkĩ hanu mã hunemisbu matu betsekãbaĩshanikiki.