Isaías 11 - Kaxinawá Bíblia (BR)

Jessé baba betsa hawẽ yunuti kushipa pepawẽ shanẽ ibuhairakĩ hatu unanuma hiwemashanikiaki, na hãtxarã

¹ Jessé enabu Assíria nawabũ hatu itxakawakinã, hi derakĩ hatu hawẽ buru keska besti wanibuki. Hakia ha hi buru anua ana takushanikiki. Hawẽ tatxa anua hawẽ tapũ betsa hukũmis keskai huni betsa ana kaĩshanikiki.

² Deusũ Yushĩ kushipa habe ketashametã putama eska wamakubaĩshanikiki. Ha huni Deusũ Yushinĩ merabewa haratu bai pepa inũ haratu bai txakabu unãmatiru wakĩ inũ, hawẽ unanepati inãkĩ inũ, hawẽ shinã bebũkiri pewanika inãkĩ inũ, kushipa inãkĩ inũ, Senhor Deuski mesetirubu unãmanika ishanikiki.

³ Hatũ hatu unãti wakinã, bemakis hawẽ beruwẽ besti uĩtã hatu unãti wama inũ, haska betsabũ yui kakaibu nĩka bestitã hatu unãti watiruma ishanikiki.

⁴ Hakia nuitapai babubu hatu merabewakinã, yunuti pepa kushipawẽ hatu unãti wakĩ haska betsabũ hatu itxakawaibu hatu nemashũkĩ ha nuitapaibu hatũ mai pakea anua hatu pewashũshanikiki. Hawẽ hãtxa mestẽti kushipa keskawẽ mai anushũ habũ hatu detenamemaibu hatu kupishanikiki. Hawẽ hãtxa kushipawẽ huni txakabubu hatu tenãshanikiki.

⁵ Tari saweaki hawẽ nanesheketi sawekĩ mestẽwã keska wakĩ yunuti kushipa pepa inũ hãtxa txanima sawekĩ akawashanikiki.

⁶ Hanua Jessé baba ma pe shanẽ ibuaya kamã inu txashuwã bakebe dasitã menamei unanuma hiweshãkanikiki. Ha inũ, inu keneya daka anu cabra bake habe beua huĩrukũshanikiki. Ha inũ, ina awa bake leão inu dapikea yumeshanikiki. Ha inũ, dasibi yuinaka mese pubẽ inũ pubẽma bakeishtã hatu mekekĩ nimakubaĩshanikiki.

⁷ Ina awa inũ urso ana sinatai pubeãma ibunameshãkanikiki. Hatũ bake hatu dapi mapua huĩrukũshãkanikiki. Leão inawanã, basi besti pishanikiki, ina awã pimis keska wakinã.

⁸ Bakeishtã txutxu heneriama dunu paepahaira cobra kini dapikea beyus shanikiki, ana menameamawẽ taearã. Hawa dateama bakeishtã dama txutxu heneatũ cobra daka kini merã hawẽ mekẽ mistushanikiki.

⁹ Ianẽwã matahairamis keskai mai pakea hirabi anu dasibibu ẽ unanepa hayatã ea ẽ Senhor Deus unãshanaibuwẽ taea ẽ mati meribi anua ana hawa sinatai itxakanikama ishãkanikiki.

¹⁰ Ha haskaibutiã ha Jessé tatxa ha hawẽ tapũ betsa benetã yurabu shukua tibibu hatũ Deus hatu unãmati ishanikiki. Habũ hatũ shanẽ ibu benakinã, hawẽ mae pehaira txashakapaki nukunũ ishũ benabaũshãkanikiki.