Isaías 1 - Kaxinawá Bíblia (BR)

Judá enabu txakabuhaira hiwenibukiaki, na hãtxarã

¹ Haska ikũkaĩshanai Amozĩ bake Isaías nama keskawẽ Deusũ hawẽ hãtxa shabakabi bebũkiri unãmanikiaki, hawenabu Judákiri inũ hatũ maewã Jerusalémkiri hatũ shanẽ ibuhairabu Uzias inũ, Jotão inũ, Acaz inũ, Ezequias Judá anu habu shanẽ ibuhairakubainaibutianã.

² Nai inũ maiĩ, matũ Senhor Deusũ matu yuiai nĩkakãwẽ. “Matũ bakebu ẽ hatu yumewabia habu huni ewatã hakia habũ ea danaĩ eki sinatakanikiki.

³ Awa bene ana pubẽmawakĩ hawẽ hubu meshteabu ana pubẽma hatũ ibu unãti wamamisbuki. Ha inũ, jumentõ ha hiwe anu hanu ibuã ushãmis unãriamiski. Hakia Israel enabu wakĩ ẽ hatu katubiani ea unãbuma inũ ekiri daki shinã hayabumaki.”

⁴ Mã hunibu txakabuhairarã, mã peirakãwã! Mã yurabu atimapa txakabu bestiwẽ kemui mã hiwearã, matũ ibubũ txakabuwakubainibuwẽ taea mã hawẽ bakebũ habias txakabu txibaĩbu inũ, mã hawẽ bababũ haska ariaiburã, haska wakĩ mã ma Senhor Deus heneaki. Israelĩ Deus mekenã meribi mã hayabia putatã mã ma shunũbainaki.

⁵ Maturã, haskai mã danananaĩ sinatai henekatsi ikamamẽ? hawẽ ea kupi sharawe, ikarã. Matũ yurarã, tsuã hani matu ana kushati hayamaki. Matũ bushka ma matu makush makush akabu mã isĩ teneaii. Haskawẽ taea matũ kushipa benui mã ma babui keyuaki.

⁶ Maturã, matũ bushka yura hirabiyabis mã hawa pe hayamaki. Mã dasibi dete keshtuki, matu kushakĩ matu pesha pesha akaburã. Mã haskabiakẽ tsuã matu daũkĩ matu tsamiãbumaki. Mã isĩ tenehairai hawẽ mã mainũ sheniwẽ tsuã matu dapushabumariki.

⁷ Matũ mai pakea anu ana tsua hanu hiwetima wakĩ ma txakabuwakubainimabuki. Matũ maewã tibi txiwẽ ma matu kuaĩmabuki. Mã uĩbiaya matũ berubi matuki sinatamisbũ matũ mibã mã banaima habũ pikanikiki. Sodoma maewã Deusũ yamawani keska matũ mai pakea dasibi matunari ma hayamaki.

⁸ Sião maewã anurã, hawa betsa bashikuamahairaki. Habu henebainimaburã, uva bai anu peã shubu besti hayaki. Barã betsa pepino beshea bai namakis anuri peã shubu besti hayaki. Ha maewã keshebauna hiweaburã, matuki sinataibu besti hayaki.

⁹ Senhor Deus dasibi binuatũ hawa nukunabu eskarabes nuku hatube teshewama inirã, na habiatianã, ha nawabu Sodoma inũ Gomorra anu hiweabu Deusũ hatu yamawani keska nũ ikeanaii.

Ana txĩtũtã Deus kayabi kẽwãtikiaki, na hãtxarã

¹⁰ Maewã Sodoma shanẽ ibu inibu keskabuũ, Senhor Deusũ hãtxa nĩkakãwẽ. Maewã Gomorra anua keskabuũ, nĩka pehaira wakãwẽ, nukũ Deusũ matu yusiainã.

¹¹ Senhor Deusũ matu yuikĩ: “Haskakĩ hatira matũ inabu ea inãkĩ mã ea menushũmismẽ? Matũ txashuwã bene inũ ina awa bene babupã sheni mã ea menu keyushũmisrã, ma ẽ habu hatsãki. Haskawẽ taeshũ ina awã himi inũ, txashuwã benẽ himi inũ, cabra bakẽ himi txanima ana habu uĩkatsi ikama ẽ danãhairaii.

¹² Matubu ea bebũ hushũ mã ea uĩmairã, tsuã ẽ hiwe anu matu bitxia mã ikai? ẽ hemaĩtĩki meseama hanu mapubaũkĩ mã ea itxakawairã.

¹³ Matũ inãkuĩ ẽ ana betxipaiamaki. Ana hamẽ ea beshũyamakãwẽ. Habũ kuĩ inabainairã, ẽ ana shetekĩ tenetirumahairaki. Matubu ushe bena tashniai tibitiã inũ, huĩrukũti sábadotiã matunabu itxawatã keĩ benimai mã besimiski. Hakia mã hiwe txakamiswẽ taea ha besi mã imis betxipaiama ẽ danãhairaii.

¹⁴ Ushe bena tashniaitiã inũ haska itxatã mã pi beyuskũkainairã, mã haskabiakubainaiwẽ taea ẽ matuki txikishtxakayamaii. Mã haskakĩ ea bika tenemai ẽ ana haska tenetirumahairaki!

¹⁵ Matũ mekẽ meshãtã ebe hãtxakĩ mã ea yukabiaya ẽ matukiri uĩkatsi ikamahairaki. Mã ea yuka txakayamabiaya mã mekẽ himi haswẽ taeshũ ẽ matu hawa nĩkamaki.

¹⁶ Matũ mekẽ mepanui perikãwẽ! Ẽ uiaĩ anua hawara txakabu mã amis henerikãwẽ! Mã txakabuwai hanũ beshtekerikãwẽ!

¹⁷ Pepa besti atikiri tapĩrikãwẽ! Tsua ana parãtima menã pepati hawaira benakãwẽ! Hatu itxakawaibu hatu merabewakãwẽ! Yunuti hãtxawẽ taeshũ bake ibuuma hatu itxakawama hatu merabewa bestikubaĩkãwẽ! Beneyabiani ana beneumabu hawẽ hiweawẽ bika teneai merabewai hãtxashũkubaĩkãwẽ!” itã

¹⁸ Senhor Deusũ ana matu yuiai nĩkakãwẽ: “Matube hãtxakĩ matũ hiwea ẽ matu pewakatsis ikai nenu ea anu bekãwẽ. Matũ txakabu huni dama tenã himi shana biri ikai keskabiakẽ matu txuka pewakĩ matũ txakabu matu buashũkĩ hushupa keska ẽ matu henekatsis ikaii. Mã txakabumis atimapahairabiakẽ matu txuka pewakĩ matũ txakabu matu buashũkĩ hushupa keska ẽ matu henekatsis ikaii.

¹⁹ Shinã betsatã mã ea nĩkakubainaibunã, ha mai anua mibã pepahaira beneai haya mã pikubaĩshanaii.

²⁰ Hakia shinã betsakatsi ikama hẽ iyamai danananaĩ sinatai mã heneamarã, tsuã ana matu merabewama detenameaibu anua mã mawashanaii”, ikĩ ibubis Senhor Deusũ matu yuishuki.

Senhor Deus Jerusalémwẽ nuikĩ ana hatu pewashũshanikiaki, na hãtxarã

²¹ Haskatã maewã nĩkanikabia haskai shinã txakai mĩ ma aĩbu hininipa keskamẽ? Uatiã dasibi minabu pe hiweshũ pe besti aki hiwekubainibuki. Hakia eskatianã, mã huni sinatapabu bestiki.

²² Mĩ prata pei karu keska ibiani eskatiã maei mĩ txaka putamisbu keska bestiki. Mĩ uva vinho pepa keska ibiani ana haskama txĩtũtã mĩ ũpash paisma keska bestiki.

²³ Haska inũ, matũ shanẽ ibuburã, sinatapa yumetsubũ haibuaibuki. Ana pei mais hatu pewashũkatsi ikama hatu parãkĩ hatũ peiwẽ besti hatu itxakawakubaĩkanikiki. daketapai ea inãkuĩwẽ ika ea ikĩ bena bestikubaĩkanikiki. Bake ibuumabu hatu pe merabewati shinãbiai habũ hatu uĩs bestikanikiki. Ha inũ, aĩbu beneyabiani beneumabukiri habũ hatu merabewai pe hãtxashũkatsi ikama hatuki petxiabuki.

²⁴ Haskawẽ taeshũ Senhor Deus kushipa dasibi binuatũ hawẽ kushipawẽ Israel merabewamis hawẽ hãtxa kushipawẽ hatu yuikĩ: “Hatishũ besti matũ txakabu ẽ tenetiruki! Mã habu eki sinataiburã, matũ txakabu tanatã matube detenameai keskakĩ ẽ matu kupishanaii.

²⁵ Hanushũ ana matu kupi benawakĩ sinatakauã matũ txakabu atimapa tibi dasibi itxawatã txaka putamisbu keska pewakĩ ẽ kua keyukatsis ikaii.

²⁶ Matũ shanẽ ibu unãti wanikabu habu dukũ inibu keska ẽ ana matu katushũ yunushanaii. Matũ huni unanepabu habu dukũ inibu keska matu merabewakĩ ana ẽ matu katushũ yunuriashanaii. Haska tibi ẽ ana matu waya txipu tsuabũra matu uĩtã yuikĩ: ‘Ha maewã Jerusalém anurã, ana tsua itxakanika hayamaki. Ha maewã anushũ Deus besti txibãkubaĩkanikiki’, ishãkanikiki.

²⁷ Ẽ itxakanika hayama inũ ẽ mekenã pepatũ mã Sião anu hiweabu matũ txakabu ẽ matu putama ea anu mã ana txĩtũshanaii.

²⁸ Hakia itxakanikai sinatamisbu inũ txakabubu habu ea anu beabuma hatu kupikĩ ẽ yamawashanaii. Habũ ea henebaini mawashãkanikiki.

²⁹ Mã habũ ha hi itamama namã inũ hua bana betxipaikĩ hanushũ yushibu betsa betsapa mã kẽwãkubaĩmisburã, haburã, mã dakehairashanaii.

³⁰ Maturã, ha hi ewapa pei shanakaini hushĩmis keska mã ishanaii. Ha inũ, ha hua bana tsuã ũpash tatxa aisma keska mã ishanaii.

³¹ Ha shanẽ ibu kushipai kẽmisburã, ana haskama betsai basi txushiai keska ishanikiki. Hatũ dayarã, txi peshe peshe iki hawaira nukamis keska ishanikiki. Ha huni inũ hawẽ daya habia dabe hanu dabes ketia hi ikai tsuã hatu nukawatiruma ishãkanikiki.”