Hechos 8 - Kaxinawá Bíblia (BR)

¹ Hanushũ Estêvão hau tenãnũbũ Saulõ habiaskari xinãyã anibukiaki. Habias shabatiã Jerusalém anushũ Jesus ikũwaĩbu habũ ikũwãbumã hatuki sinatakĩ itxakawatxakayamakĩ taewaibũ Judéia mai pakea anu inũ Samaria mai pakea anuri Jesus ikũwaĩbu dasibi pashai sa ibainaibũ habu Jesusũ kuxipayabu besti kaĩama inibukiaki.

Jesus ikũwaĩbu Saulõ hatu itxakawakubainikiaki, na hãtxarã

² Hanua tsuabura huni duapabu Estêvãowẽ nui haya kashabetanã maiwanibukiaki.

³ Ha hatu haska waibutiã Saulo hawẽ haibuaibubetã Jesus ikũwaĩbu itxakawakĩ hatũ hiwe tibi anu hikishũ huni inũ aĩbu itxapa pashariabuma hatu atxishũ kaĩmakĩ hatu sharabaĩbaĩkĩ bitxiti hiwe merã hatu bitximakĩ habũ Jesus ikũwaĩbu hakimawanũ, iwanã, Saulõ Jesus ikũwaĩbu yamawakĩ keyupai inikiaki.

Samaria anushũ kakape hatu yusĩnibukiaki, na hãtxarã

⁴ Hanua habu Jerusalém anua pashai kaĩbainimashũ hanira mae tibi anu hikishũ Deusũ Messias Cristo mekenã hawẽ kakapekiri hatu yuikubainaibũ

⁵ merabenã betsa Filipe mae ewapa betsa Samaria anu kashũ Messias Cristokiri hatuki txanikĩ taewakĩ

⁶ hanushũ haska tsuã atiruma dami atimaska betsa betsapa hatu ashuaĩ uĩkĩ ha yurabu itxashũ Filipẽ hãtxa dasibibũ nĩkahairaibũ

⁷ yushĩ txakabũ yura betsa betsapabu hatu nuitapawamis Filipẽ hatu shushawakĩ kaĩma ha yushĩ txakabu bis iki tashnibainaibũ hatu kaya wakĩ yura betsaburi babunibu inũ biyushkinibu hatu kaya waya

⁸ ha mae anushũ Filipẽ hatu haska washunai uĩ hawẽ xinã txãkaĩ benimahairanibukiaki.

⁹ Hamẽ betsarã, Filipẽ hatu yusĩ kariamakẽ huni betsa Simão ha mae Samaria anushũ hawẽ mukawẽ unãkĩ hawẽ hatu shuũ akĩ yurabu paraĩ keĩ shanẽ ibukĩ hatu mesewamistũ

^10-11 bari itxapa hawẽ mukawẽ hatu parãkubainaiwẽ taeshũ hakiri yura dasibi shanẽ ibubu inũ hatube hiweabu dasibibũ txibãkĩ kẽwaĩ hakiri yuinamekĩ: —Simãonã, Deusũ kuxipa itxapa hayaki— ikĩ hawẽ hãtxa nĩkakĩ ashũpakemisbũ

¹² hakia Deus shanẽ ibuaikiri inũ Jesus Cristõ kakapekiri Filipẽ hatu yuiai nĩkatã ana Simão nĩkama huni itxapabu inũ aĩbu itxapabũri Jesus ikũwaĩbu Filipẽ hatu naximaya

¹³ hanushũ Simãonẽ dikabi ikũwãyã naxima Filipebe kakũkaũkĩ haska tsuã atiruma dami atimaska betsa betsapa akai uĩ Simão e ikũkainaya

¹⁴ hanushũ haska habũ Samaria anushũ Deusũ kakape Jesuskiri hãtxa ikũwãkĩ ma txibaĩbũ haska kakaibu Jerusalém anushũ nĩkatã Jesusũ kuxipayabũ hau Pedro inũ Joãonẽ hatu merabewatanũbũ hatu hari nitxiãbu buabũ

^15-16 tsuabũra Jesus ikũwaĩbu Filipẽ bebũkiri hawenabu unãti wamakĩ Shanẽ Ibu Jesusũ kenawẽ hatu naximaxina habu betsa Deusũ Yushĩ Pepatũ hatu atxiriamakẽ haska hatu wabu buxĩshũ ha Samaria anushũ ikũwãxinabu hatukiri Pedro inũ Joãonẽ Deus hau hawẽ Yushĩ Pepa binũbũ hatu yukashũtã

¹⁷ hanushũ hawẽ Yushĩ Pepa atximakĩ hatu mamepishũ hatu yukashunaya ha Yushĩ Pepatũ hatu merabewai hatuki hikiakeakenikiaki.

¹⁸ Hanushũ Jesusũ kuxipayabũ ikũwaĩbu hatu mamepiaya Deusũ Yushĩ Pepa hatuki hikiai Simãonẽ uĩ: “Eãri ha kuxipa peiwẽ binũ”, iwanã, Pedro inũ João

¹⁹ yuikĩ: —Na haska kuxipa eari ẽ hayanũ ea inãkãwẽ, mã hatu akai keska wakĩ yura betsaburi mamepishũ Deusũ Yushĩ Pepa ẽ hatu hikimashununã, na pei itxapa ẽ matu inaĩnã— hatu waya

²⁰ hanushũ Pedrõ kemakĩ: —Deusũ kuxipa inãkuĩki. Peiwẽ taeshũ mĩ bikatsis ikaiwẽ taea mĩ peiya hanu txiwẽ ikũwãbuma Deusũ hatu kupishanai anu mĩ katiruki.

²¹ Haska inũ, mianã, mĩ xinãtxakai Deusũ unaĩwẽ taeshũ hawẽ kuxipa mĩ bitirumahairaki.

^22-23 Eã haska ẽ mia unãiĩ. Haska yushĩ txakabũ muka mĩ bini mĩ heneriamakẽ mia merãshũ ha mĩ txakabũ mia neshayuaki. Hakia xinã betsa watã mĩ txakabu mĩ putaya hau Deusũ mia buashunũ mĩ yuka mĩ txakabu mia buashũtirumẽkaĩ— aka

²⁴ Simãonẽ kemakĩ: —Txanima ẽ kanehairashuki. Ea Deus yukashũkãwẽ, hau haska mĩ ea yuiai keska wakĩ ea kupiyamashanunã— iki haska txaniaya hau Deusũ hawẽ txakabu buashunũ yukashũtã

²⁵ habianushũri Deusũ hãtxa yusĩkĩ kakape Jesuskiri hatu yusĩ menetã Jerusalémkiri ana txĩtũbirãkĩ mae betsa betsapa Samaria mai pakea anushũ Jesuskiri hatu yusĩkubirani Jerusalémkiri txĩtũbaini bui hikinibukiaki.

Etíopianawa shanẽ ibu betsaki Filipe nukushũ yusĩnikiaki, na hãtxarã

^26-28 Ha haska wawãxinabutiã Deusũ nai tsuma betsã Filipe yunukĩ yuikĩ: —Benitã Jerusalém anua kai sulkiri ha bai tanabaini Gazakiri kawẽ katãwẽ— aka Filipe benitã kai hanu tsua hiweabuma anu bai tanabainaya bai namaki Etíopianawa aĩbu shanẽ ibuhairatũ tsuma huni hawẽ pei mekeshunikatũ Jerusalém anushũ Deus kẽwãtani hawẽ mae anu ana txĩtũkaini cavalo dabetã tarãbainaiki nawa ina tsaushũ Deusũ hãtxa Isaíasĩ keneni yuikubiranai betxitã uĩayã

²⁹ Deusũ Yushĩ Pepatũ Filipe yuikĩ: —Kakaĩ haki kemai nukutãwẽ— aka

³⁰ haska nĩkatã hawaira kaĩ haki nukuaya Deusũ hãtxa yuishunika Isaíasĩ keneni yuiai nĩkakĩ Filipẽ yukakĩ: —Ha kene mĩ yuikubiranairã, mĩ nĩkai?— aka

³¹ Etíopianawã nĩkatã kemakĩ: —Haskatã tsuã ea hakiri yusĩ pewai ẽ nĩkatirumaki. Miã mĩ unaĩmẽkaĩ? Ebe inatã kakĩ ea tapĩmabaĩwẽ— aka —Peki— itã inatã habe tsaukainaya

³² habias kene yuishu Etíopianawã ana Filipe yuishũkĩ yuikĩ: ‘Txashuwã detenikatũ detenũ, iwanã, iyumis keska wakĩ tsuã nemama iniki. Ha inũ, txashuwã bake dani dameshteabu txashuwã hawã ikama pesmis keskai hawa yuiama iniki.

³³ Hanushũ itxakawakĩ nuitapawabu hawa yuiamakẽ tsua hawẽ nuikĩ merabewamari iniki. Haska wakĩ bakeuma tenãbu tsuã hanishũ hawẽ bababukiri hakiri hãtxatirubumaki, haska wakĩ hawẽ hiwea mebĩkĩ mai anua mesha keska wakinã’, akĩ yuishuna

³⁴ Filipe yukakĩ: —Tsukiri ha Deusũ hãtxa yuishunikatũ kenenimẽ? Ibubiskirimẽkaĩ? Huni betsakiriraka? Menã ea yuiriwe— aka

³⁵ Filipẽ unãmakĩ Deusũ hãtxa dama yuishurã, hawẽ yusĩ taewakĩ kakape Jesuskiri Etíopianawa tapĩmakĩ nĩkamakubaina

^36-37 ma hatishũra ka iãki kemakĩ haska Filipẽ dama yusĩshu Etíopianawã yuikĩ: —Uĩa. Ma mĩ ea yuikubiranai ẽ ikũwaĩwẽ taeshũ ana ẽ hawamamẽ, na hene anu mĩ ea naximatirurã?— atã

³⁸ hatũ cavalo tarãmabainai hau niti anũ hawẽ tsuma yunua niti amaya buturabekaĩ henẽ pukutã Filipẽ shanẽ ibu naximakĩ menetã

³⁹ hene anua neshekerabebiranaibũ hanushũ Deusũ Yushĩ Pepatũ Filipe dami wabaĩkĩ yamawabainaya ha shanẽ ibũ Filipe ana uĩyama hawẽ tarãbaĩtiki inatã ha kaikiri kai benimahairakainaya

⁴⁰ hanua Filipe Yushĩ Pepatũ iyushũ mae betsa Azoto anu butea hanua mae tibi anu hikiakeakekaĩkĩ Deusũ Katua Jesus mekenãkiri kakape hatu yuikubaini atimas mae ewapa betsa Cesaréia anu hikinikiaki.