Hechos 6 - Kaxinawá Bíblia (BR)

Sete merabewanikabu katunibukiaki, na hãtxarã

¹ Ha bari haskaibutiãri mirimabũ ana ikũwaĩ hatuki dasii itxakubainaibũ habianuri judeububia hatũ hãtxa Grego hãtxawẽ besti hãtxamisbũ ha hatubetãri ikũwaĩ judeubũs hãtxa Hebreowẽ besti habu hãtxamisbu hatube ha ikĩ yuikĩ: —Dasibibũ nũ Jesus matubetã ikũwãbiaibũ shaba tibi nuku pimakĩ nukũ aĩbu beneuma enaumabu piti nesheshũkinã, mã hatu pashka pewashunabumaki. Matunabu Hebreobu besti piti itxapa hatu nesheshũ inãkĩ nukunabu Grego hãtxawẽ nũ hãtxamis ha nukũ aĩbu beneumabu piti eskarabes nesheshũ hatu inãkĩ mã hatu nuitapawakubainaii. Haskarã, txakabuki— ikaibũ

² haskaibu hatu yuiabu nĩkatã ha 12 Jesusũ kuxipayabũ dasibi ikũwaĩbu hatu itxawashũ hatu yuikĩ: —Nukũ nũ matu piti pashkashũkĩ mekeshuna bestirã, nukunarã, pemaki. Ha dikabi matu haska besti wakĩ Deusũ hãtxa yusĩkĩ nũ henea pemariki.

³ Haskakenã, ẽ betsabu inũ ẽ puibuũ, hau huni betsabũ piti matu pashkashũkĩ inãkĩ pewakubainũbũ sete huni xinãyã inũ unãnepabu Deusũ Yushĩ Pepatũ kuxipayabu hau habũ matu pashka pewashunũbũ benakĩ katushũ ha daya hatu yunukãwẽ.

⁴ Hakia nukubunã, Deusbe hãtxakĩ heneama hanushũ hawẽ hãtxa pepa matu inũ betsabu yusĩkĩ nũ henetirumaki— hatu wabu

⁵ haska hatu yuiabu nĩkatã dasibitũ habias xinãwãtã hanushũ hatu katukĩ huni xinãyã inũ unãnepabu Deusũ Yushĩ Pepatũ kuxipayabu katukĩ hati anibukiaki. Estêvão inũ, Filipe inũ, Prócoro inũ, Nicanor inũ, Timão inũ, Pármenas inũ, nawa betsa Antioquia mae ewapanu hiweshũ judeubũ beya tapĩni Nicolau hati hatu katubaĩ

⁶ Jesusũ kuxipayabu anu hatu iyuabu hanushũ hatu unãti wakĩ mamepishũ Deus hatu yukashũkĩ hatũ merabewanikabu hatu wanibukiaki.

⁷ Hanushũ Deusũ hãtxa Jesuskiri kakape hatu yusĩpakekubainaibũ hatũ hãtxa nĩkakĩ Jerusalém anushũ ikũwaĩ itxai pakubainaibũ ha haskaibũ habiatiãri Deusbe hawenabu hãtxashunika itxapabũri Jesus ikũwãrianibukiaki.

Estêvão hawamahairabiakẽ atxishũ shanẽ ibubu anu iyunibukiaki, na hãtxarã

⁸ Estêvão Deusũ duawakĩ kuxipa paeya wakĩ pepawanikiri mia yuinũ nĩkawe. Hawenabũ berubi Estêvãonẽ dami tsuã atiruma atimaska wakĩ hatu uĩmakubainaya

⁹ hanua itxati hiwe hawẽ kena “Escravo Tsumawanibu Ana Tsumauma” hanu betsabu itxamisbu inũ, huni betsari mae Cirene anuabu inũ, mae ewapa Alexandria anuabu inũ, Cilícia mai pakea anuabu inũ, mai pakea Ásia anuabu habu Estêvãobe ha iki yuinameaya

¹⁰ Deusũ Yushĩ Pepatũ Estêvão unãnepa wakubainaiwẽ taeshũ tsuã Estêvão maemakĩ hãtxawẽ binũtirubumakẽ

¹¹ hawawẽ haska watima haki yubakatã habu betsã huni betsabu pakakĩ yuikĩ: —Nukũ shanẽ ibubu parãkĩ eska hatu yuitãkãwẽ: “Ha Jesuskiri yusĩmis Estêvãonẽ hãtxa txakabu yuikĩ Moisés inũ Deus dayuikĩ yuaĩkiki”, atãkãwẽ— hatu wa

¹² hatu haska wabu bushũ huni itxapabu yuikĩ mae shanẽ ibubu inũ Deusũ hãtxa kenenibu yusĩnanãmisbuki txani txakakĩ habu hatu sinatamabũ yurã kaiã ha iki berukui itimaskabaĩkĩ hanushũ Estêvão atxitãshũ shanẽ ibubu dasibi Sinédrio anu iyushũ

¹³ hanushũ hau Estêvãokiri txani txakatanũbũ parã hãtxa katutã huni betsabu hatu parãmakĩ yuimakĩ: —Na huninã, nukũ Templokiri inũ Moisés nuku yusĩni hãtxakiri yuaĩ hãtxai heneama nũ nĩkaii.

¹⁴ “Jesus Nazaré anuatũ Templo yamawatã nukũ beya betsa betsapa Moisés nuku yusĩni betsa washanikiki”, ikai nũ nĩkariakubainaii— hatu wabu

¹⁵ hanua shanẽ ibubũs Sinédrio anu tsaushũ Estêvão nia uĩkĩ hawã ikama hawẽ besu shabakabihaira Deusũ nai tsumã besu keska beisnibukiaki.