Hechos 3 - Kaxinawá Bíblia (BR)

Huni txãtu habiaska kaĩni Pedrõ beninikiaki, na hãtxarã

¹ Hanua shaba betsatiã ma 3:00 da tardekẽ judeubũ Deus yukamisbutiã Pedro inũ João Templo anu buaibũ

² habianuri huni betsa txãtu kaĩnitũ hau hatu pei ea anũ, iwanã, shaba tibi Templo hemaĩtĩ mixki kene hikiti shui hawẽ kena Formosa, nukũ hãtxawẽ yuia Hawẽrua anu hawenabũ iyushũ tsaũtãtãmisbu

³ Pedro inũ João hikinũ ika buaibũ huni txãtũ hatu uĩkĩ yukakĩ: —Ewẽ nuikĩ ea pei inãkãwẽ— hatu wa

⁴ habũ uĩkĩ dais keyutã Pedrõ yuikĩ: —Neri nuku uĩwẽ— aka

⁵ “Ea pei inãkanikiki”, ishũ beri ikama hatu uĩayã

⁶ hanushũ Pedrõ ana yuikĩ: —Ẽ peiumaki. Hakia ẽ ha hayarã, ẽ mia inaiĩ. Deusũ kuxipa ẽ hayawẽ taeshũ ẽ mia shushawatiruki. Jesus Cristo Nazaré anuatũ kena kuxipawẽ taea benitã niriwe— atã

⁷ Pedrõ hawẽ mekẽ yusiuriawẽ metsũshũ benia hawẽ tae inũ hawẽ hupushku hawaira mesteĩ hukuxitã

⁸ hanua ha huni txãtuni beni ixtxui ti itã ni taekaini Pedro inũ Joãobe Templo hemaĩtĩ anu hikikaini ixtxui ti ti ikaĩkĩ Deus kẽwãkĩ taewabainaya

⁹ dasibibũ uĩaĩbũ nikaĩkĩ Deus kẽwãbainai

¹⁰ habũ uĩ e iki datekĩ haskai haskashumẽ? ikĩ: —Ha hunĩ hatũ Templo hemaĩtĩ hikiti shui hawẽ kena Hawẽrua anu tsaushũ pei hatu ea amis ma shusha unaĩ habia ikikiki— ikaibũ

Bari utati hawẽ kena Salomão anushũ Jesuskiri Pedrõ shabakabi hatu yusĩnikiaki, na hãtxarã

¹¹ ha huni txãtu kaĩni ma shushawabu Pedro inũ João hatu dapashkama hatube nikẽ dasibi yurabu kuxibirã uĩ e ibirã ibirani Templo hemaĩtĩ kesha hanu bari utati hawẽ kena Salomão anu hatuki dasi itxabirãbiranaibu

¹² haskaibũ Pedrõ hatu uĩkĩ yuikĩ: —Israelbuũ, haskai nuku uĩ mã e ikanai? Na huni nũ shushawashu benitã nia uĩkĩ nukũ kuxipawẽ nũ ashu mã xinaĩmẽkaĩ? Deus keskakĩ nũ huni pepahairawẽ taeshũ nũ shushawashu mã daka xinaĩ?

¹³ Nũ haskamaki. Matu yuinũ nĩkakãwẽ. Habias nukũ shenipabu Abraão inũ, Isaque inũ, Jacõ Deus kẽwãpaunibũ na huni ma shushawashuki. Ha inũ, hawẽ bake abuhairakĩ Deusũ nukuwẽ taeshũ kẽhairawabiamiskẽ danãkĩ matubu haki sinatakĩ atxishũ nawa shanẽ ibuhaira anu mã iyua hanushũ Pilatõs xinã pewatã tenãkatsi ikama nitxĩpanã mã nemaimaki.

¹⁴ Hanushũ matũri Pilatos yukakĩ Jesus huni pepatũ hawa txakabuwaisma hau tashnimanũ Pilatos yunuama ha huni txakabu besti merabewakĩ mã yuka matu hawa washũama nitxĩshunimaki.

¹⁵ Haska wakĩ hatũ nuku hiwekuĩmashanai mã hatu tenãmabia mawa Deusũ ana nuku bestẽwãshuĩma nukubũ uĩkubainimashũ nũ unaiĩ.

¹⁶ Haskawẽ taeshũ Jesus ikũwãkĩ hawẽ kuxipawẽ na huni mã uĩmis hawẽ yura hirabi kuxipa wakĩ nũ ma shushawashuki, haska dasibitũ mã uĩaĩnã— iwanã, ana hatu yuikĩ:

¹⁷ —Enabuũ, Jesus ikũwãkatsi ikama hawẽ kuxipa unãkĩ kayati wakĩ tapĩriamabia matũ shanẽ ibububetã ha huni unãma mã tenaĩma txanima ẽ unaiĩ.

¹⁸ Ha mã haska waimakirirã, bebũkiri Deusũ hawẽ hãtxa yuishunika dasibibu hakiri txanikĩ nukunabu yuikĩ: “Hawẽ Messiasrã, nuitapatã mawashanikiki”, anirã, haska yuini keska wakĩ Deusũ ma hatu menemaimaki.

¹⁹ Haska xinãma Deus mã txibãkatsis ikairã, matũ txakabu henetã matũ xinã betsa watã Deus anu berikãwẽ, hau matũ txakabu matu buashununã.

²⁰ Deusũ matu hawẽ daewakĩ pepawakĩ benimawakatsis ikĩ hawẽ bake Messias Cristo bebũkiri katutã matu yubaniki, hau mã haki dasishanũbunã.

²¹ Hanua natianã, Jesusrã, naiuri kayuimaki. Haurishũ Deusũ mai anuabu hawẽ hatu pewamakĩ keyumakĩ manakamayuikiki, haska hawẽ hãtxa yuishunika meribibu hiweshũ nuku keneshũpaunibu keska wamayukinã.

²² Hanua Moisésri hakiri nukũ shenipabu hatu yuiriakĩ: “Hawẽ hãtxa yuishunika ea keska matu anua matũ Yavé Deusũ kaĩmashanikiki. Haska matu yunuai nĩkatã txibãkubaĩshãkãwẽ.

²³ Hakia hawenabu bababũ tsuabũra Deusũ hãtxa yuishunika Messias nĩkakatsi ikabuma Deusũ kupikĩ hatu yamawashanikiki, ana hawenabuma wakinã”, aniki.

²⁴ Moisés besti haska hakiri txaniama hakia hawẽ hãtxa yuishunika tibi Deusũ hatu yuimakĩ Samuelwẽ taewakĩ haska Deusũ hawẽ bake yunushanaikiri yusĩ haburi txanikubainibuki.

²⁵ Haska inũ, matu henekatsi ikama Deusũ hawẽ hãtxa yuishunikabu hãtxamai habuwẽ Deus matuki yubakaniki. Haskawẽ taeshũ matũ shenipabu Deusũ yubai nukũ shenipabu Abraãobe Deus hãtxakĩ matu heneama inũbariaikiri yuikĩ: “Mĩ baba betsawẽ taeshũ mĩ bababu inũ dasibi nawa betsa betsapabu shukua tibibu ẽ hatu pepawariashanaii”, aniki.

²⁶ Haskawẽ taeshũ Deusũ hawẽ bake bestẽwaĩmashũ mã hawenabu dukũ matukiri pe xinãkĩ matu duawakĩ taewaikiki, matũ txakabu henetã mã xinã betsa wanũbunã— hatu wai