Hechos 28 - Kaxinawá Bíblia (BR)

Natukã Malta anu Paulo niti iyunikiaki, na hãtxarã

¹ Hanu dasibi hasama maxĩ nũ mapekei keyukẽ natukã hawẽ kena: “Maltaki”, ikĩ nuku yuiabu nũ nĩkaya

² ha uĩa nuku aka shũska nũ matsi teneaya hanu yura betsa hiweabu dasibi nukuwẽ nuikĩ nuku duawakĩ karu itxapa kuashũ nũ yui bunũbũ nuku kenabu

³ hari kashũ Paulõ metash itxawashũ txi anu mãtxĩkĩ kuaya metash anua txi kuai anu shana mebirani dunu pianã tashnikirã ixtxukirã hawẽ mekẽki pikĩ mukua dunukẽ

⁴ ha hanua yurabũ hawẽ mekẽ anu dunu dunua uĩ hawẽ datei yuinamekĩ: —Na hunirã, pubẽkĩ yura betsa tenaĩmamẽkaĩ. Iãnẽwã anua pashabiashukẽ dunu yunukĩ nukũ mekenika yushĩ pepatũ hiwea inãma kupikikirã— ikaibũ

⁵ hakia hawaira Paulõ hawẽ mekẽ meixkukĩ txi anu dunu putatã hawa meama kayakẽ

⁶ hanushũ dasibibũ xinãkĩ: “Meshashatã hawaira mawaimẽkaĩ”, ishũ manahairabiaibũ hawama kayakẽ haskaya xinã betsa watã habũ yuikĩ: —Ha hunirã, yushĩ kuxipamẽkaĩ, dunũ pibia isĩ teneama kayabĩ!— akaibũ

⁷ hanua habia iãnẽwã kesha txaima natukã shanẽ ibu hawẽ kena Públio hawẽ mae ewapa kesuakea anua hushũ nuku iwãkĩ mapemaxĩshũ shaba dabe inũ besti hawẽ hiwetãshũ nuku pimakĩ pewakĩ nuku duahairawaya

⁸ hatu haska waitiã Públiõ epa yuna inũ txishu tenei dakakẽ Paulo yuiabu uĩ kashũ hau merabewanũ Deusũ kuxipa yukashũtã hau shushanũ haki mepitã mea hawaira maiãyã

⁹ natukã Malta anushũ nĩkakĩ keyubauni hau eari shushawanũ ika isĩ teneaibu bebirã bebiranaibu hatu shushawai ushe dabe inũ besti Malta anu nũ hiweyuniki.

Roma anu Paulo hikinikiaki, na hãtxarã

^10-11 Malta anushũ nuku duahairawaibũ ui inũ niwe txakabu maĩkũkainaya niwe shashu ewapa betsa Alexandria anuari Romano yushĩ hi dami dabe hatũ kena Castor inũ Pólux shashu hawẽ debukiri netãnibu ma niwe pepa taeaya ha shashuwẽ ana nũ inai taekainaya nũ haya katanũ tari inũ piti nuku inãkuĩtã nuku haya nitxiãbu

¹² hanua hawẽ pukei kaĩkaini natukã ewapa Sicilia anu mae betsa Siracusa anu hikitã hanua shaba dabe inũ besti nũ manayuaya

¹³ hanua ana kakĩ iãnẽwã patãkubaini Itália mai pakea anu mae betsa Régio anu hikiriatã ushaxini sulkiria niwe pepa ana bei taeaya ana kai usha dabetã hanira hawẽ mabu mapemakatsi mae betsa Putéoli anu hikishũ shashu anua bututã

¹⁴ hanua Jesus ikũwaĩbuki nũ nukua nuku pimayuaibũ semana bestitxai hatuki nũ bayua hanushũ Romakiri maĩ soldadobũ nuku iyukĩ taewaibũ

¹⁵ Roma anushũ ikũwaĩbũ nũ huai bana nĩkatã bai putxinĩ nukuki nukukatsi beaibũ hanua inãnanãmisbu hawẽ kena Ápio anu nũ hatuki nukua nukube ana bui txĩtũbainaibũ mae betsa hawẽ kena Três Vendas anu ikũwaĩbu betsa beaibukiri nũ hatuki nukuria haibu itxapabu uĩ Paulo benimai xinã txãkãkĩ Deus kẽhairawaya

¹⁶ ana kai mae ewapa Roma anu nũ hikia huni bitxinibu betsabu Romano shanẽ ibubũ hau hatu ana bitxinũbũ hatũ soldadobu yunutã hakia Paulo haska wama hau tari meribi hiwe betsa anu soldado bestitxai habe meneshekerabetã hau mekekubaĩshanũ yunuabu

Paulõ Roma anushũ hatu yusĩkubainikiaki, na hãtxarã

¹⁷ hikixina usha dabe inũ besti binukainaya Roma anu judeu shanẽ ibubu hiweabu hau habe itxai benũbũ Paulõ hatu kena bea ma itxabu hatu yuikĩ: —Enabuũ, ekiri matu yuinũ nĩkakãwẽ. Nukunabuki inũ nukũ shenipabũ beya ẽ hawa wama kayabiakẽ Jerusalém anushũ ea atxishũ Romanobũ hau ea bitxinũbũ ea hatu mexui akimabu

¹⁸ ea unãti watã habũ ea nĩka haska tenãtimakẽ ea nitxĩpanãbũ

¹⁹ nukunabu shanẽ ibubũ ea betsa betsapawaibũ enabube yuãnanaĩ kayanamekatsi ikama hau nenushũ Romano shanẽ ibuhaira Césarn ea unãti washanũ Festo ẽ yukayamaki.

²⁰ Haskawẽ taeshũ mã ea uĩ ebe hãtxai benũbũ ẽ matu kenaxinaki. Nũ Israelbũ ha Deusũ nuku yubani nũ manakaibuwẽ taeshũ haskarawẽ dabanã ea mane dispi txiwetameyawẽ soldadobe ea meneshxinabumẽkaĩ, mã eki nukuyununã— hatu wa

²¹ ha itxabu betsã Paulo yuikĩ: —Judéia anushũ mikiri kene nuku bemabumaki. Ha inũ, nukunabu hukĩ mikiri hawa txakabu nuku yuiabumariki.

²² Na haska yusĩa bena mĩ ikũwaĩ mae tibi anushũ abuama danãmisbu nũ nĩkabiamis haskara mĩ xinaĩ nũ nĩkakatsi ikaii— aka

²³ hawatiãra ana itxashanaibu shaba katutã: —Hanu nuku ashãwẽ— abaĩxinabu judeu itxapabu hanu Paulo hiwe anu itxai beabu Deus shanẽ ibuaikiri yusĩkubaĩkĩ Moisés inũ Deusũ hãtxa yuishunika betsabũri kenenibuwẽ Deusũ Messias Jesuskiri Paulõ hatu ikũwãmakatsis ikĩ bari txai hatu tanamakĩ hatu yusĩbaiaya

²⁴ haska Paulõ hatu yusĩa hatiritũ ikũwaĩbũ hatiri betsabũri danãkĩ ikũwãbumakẽ

²⁵ haskakiri xinãma hatũmebi itimaskatã inũ bui beni taebainaibũ Paulõ eskakiri hatu yuikĩ: —Shabakabi matũ shenipabukiri Deusũ Yushĩ Pepatũ hãtxamakĩ Isaías yuimakĩ:

²⁶ ‘Kakaĩ ha yurabu yuiritãwẽ. Habũ hãtxa itxapa nĩkabiakubaĩmisbu hawa unãma ishãkanikiki. Itxapa uĩbiakubaĩmisbu hawa uĩama ishãkanikiki.

²⁷ Hau uĩyamanũbũ hatũ beru bekua keskabuki. Hau nĩkayamanũbũ hatũ pabĩki pabepukua keskabuki. Na yurabu bushka kuxibũ hawa tapĩkatsis ikabumaki. Hau ẽ hatu merabewakĩ shushawapanã ea danaĩ ea anu bekatsis ikabumaki’, aka matũ shenipabu yusĩtã Isaíasĩ nuku keneshuniki.

²⁸ Haskakẽ nukunabu nĩkabumakẽ natiã unuri Deusũ judeubuma hatu mekekatsis ikai hau habũ nĩkanũbũ hanuri bushũ hatu yusĩshãkanikiki, hawa niti ikamarã. Haskanikiri matũri xinãkãwẽ— hatu wa

²⁹ Paulõ haska hatu yusĩa nĩkabiatã habe kemanamebaini inũ buaibũ

³⁰ hiwe inãyuimabu pakakubaĩkĩ hanushũ bari dabe nitxĩ hanu haki bai buaibu dasibi haska habe hãtxakatsis iki buaibu hatu i pewakubainiki.

³¹ Tsuã hawa nemama Deus shanẽ ibushanaikiri shabakabi hatu yusĩkĩ Deusũ Messias Jesus Cristo mekenãkiri Paulõ hatu yusĩpakekubainiki, tsuã hawa bika tenemamarã. Teófiloõ, hatiski, Jesuskiri hawẽ tsuma kuxipayabu dayakubainibukiri hãtxarã. Lucas