Hechos 27 - Kaxinawá Bíblia (BR)

Roma anu Festõ Paulo yununikiaki, na hãtxarã

¹ hanushũ Romano maiwã kesua Itália mae ewapa Roma anu shanẽ ibu dasibi binuatũ hau Paulo unãti wanũ hari nuku nitxĩkatsi xinãxĩshũ hau nuku iyunũ capitão Júlio soldado hawẽ shukua ewapa kena César Augustonarã, Paulo inũ habu bitximisbu betsabu hatu Festõ inãkĩ yunukĩ: —Roma anu iyukĩ hatu mekehairakubaĩtãkãwẽ— aka

² mae Adramítio anua niwe shashu ewapa Ásia anu kaiwẽ haki nuku naneabu mai pakea Macedônia mae betsa Tessalônica anua nukũ haibu Aristarco nukube kaya iãnẽwã kesha patãkubaini

³ hanu ushaxini kai mae betsa Sidom anu nũ keti ikaya capitão Júliõ Paulo duawakĩ heneyua hanushũ Jesus ikũwaĩbu hawẽ haibuaibuki hau hatuki bayutanũbũ, iwanã, nemama kakẽ betxitã pimakĩ duawaxiãbu

⁴ hanua Sidom anua bestẽkaini kai natukã ewapa hawẽ kena Chipre nũ kapanã niwe beaiwẽ taea dũkebaini

⁵ mai pakea dabe Cilícia inũ Panfília besuuri iãnẽwã dũkebaini kai atimas mai pakea betsa Lícia anu hawẽ mae betsa Mirra anu nũ hikia ha shashu nũ hawẽ kai henetã

⁶ hanua maei niwe shashu ewapa Itáliakiri kai Romano soldadobu capitão Júliõ benabaũkĩ betsa Alexandria anua kai betxitã ana hawẽ kakatsi haki inatã nũ kai

⁷ unãshubirahaira kakũkaini ushakũkaini iãnẽwã patãkubaini dayatxakayamakubaini mae betsa Cnido besusi niwẽ nuku niti aka nuku haska wa yusmauri natukã betsa Creta dũkebauni mae betsa Salmona natukã kesua binubaini

⁸ niwẽ nuku kamama teshkitã unãshubira kai bikahairakũkaĩkĩ natukã Creta kesha patãkubaini atimas mae betsa Laséia dapi hawẽ kena Bons Portos anu nuku keti akabu nũ hikikẽ

⁹ niwe pepa manakubaini usha itxapakũkaini hawaira kainama judeubu samakemisbutiã ma binukẽ ui pakei taei niwẽwã bei meseaya haskawẽ taeshũ bebũkiri hatu nemakĩ Paulõ yuikĩ:

¹⁰ —Hunibuũ, haska ẽ xinaĩ matu yuinũ nĩkakãwẽ. Eã ẽ uĩaĩnã, nĩkamas nũ kaya niwe mesehaira bekĩ nuku shashu bitxia matũ shekiwã inũ nukũ mabu dasibi shashuyabi benui keyutiruki. Nukuri hasai nukũ hiwea nũ benuriatiruki. Buyamayunãkãwẽ— hatu wa

¹¹ hanushũ hatũ shashu bumis inũ shashu ibu niti ikatsi ikama capitão Júliõ habu besti nĩkaniki, Paulõ hãtxa nĩkamarã.

¹² —Nenu Bons Portos bai butua txakabuki. Haskanushũ nũ matsi binutirumaki— ikaya dasibibũ habiaskasri xinaĩ: —Haskakenã, nenua buirã, Creta natukanu Fenice mae anu bunãkãwẽ, hanu bai butua peki, noroestekiri inũ sudoestekiri uĩakiri hanu baxikutã nũ ui binuyunũbunã— ikaibũ

Niwẽwãnẽ hamakiri hatu iyunikiaki, na hãtxarã

¹³ hanua ana bunũ ishũ xinãtã buaibũ niwe kuxipama duakabi sulkiria pe shũku ikaya: —Peki. Eskawẽ nũ katiruki, hawa bikamarã— ika ana kai taei natukã Creta hawẽ kesha hawama nũ patãkubainaya

¹⁴ hanua hawaira natukãkiria niwe mexupa kuxipa bekĩ iã namakis nukũ shashu nuku tu akubainaya

¹⁵ haska washũ ana tsitsũwãtũ ana ha kaikiri butima niwẽwãnẽ txixtekiri buaiwẽ taeshũ shashu hawẽ tuẽbaĩti heneabu niwẽ besti shashu bini bini abainaya

¹⁶ hanua natukã hatiuma hawẽ kena Cauda hunea hauri niwe shũku ikamauri dũkebaĩkĩ hawẽ hasai pashati shashu pixta daneshekea kai nuitapatã dayahairatã mapemakĩ nũ nanea:

¹⁷ “Nukũ shashu ewapa muxitiruki”, iwanã, shashu ibu dayashũmisbũ dispi kuxipawẽ shashu daweshekubaĩkĩ keyutã nespa hawẽ kena Sirte anu teshke itiruki ika datekĩ ha shashu dakereshkaĩ bitxai hau haki teanũ, iwanã, hi keku pukuabu hatũ mestẽwãkẽ niwẽ tu abaĩmis tari ewapari hawẽ hi mashkenãyãbi pekashũ butekĩ nũ peka niwẽwãnẽ shashu tu akubainaya

¹⁸ hanua ana penaya niwẽwã ana kuxipa bekĩ shashu dabe dabe atxakayamaya shashu narabeketirukẽ datekĩ shashu shãka duakabi wanũ ishũ ha mabu buaibu hatiri iã merã datekĩ pukukĩ taewaibũ

¹⁹ hanua usha dabexina ana penaya niwẽwã maĩriamakẽ ha niwẽ hawẽ tu abaĩmis tari ewapa inũ hawẽ txibu inũ hawẽ nabe inũ mashkenã dasibi dispiyabi shashu anua hatubetã mekenẽ dasibitũ shutukĩ iã merã nũ pukuabu

²⁰ hanushũ niwẽ nuku itxakawakubainaya mexu tibi bixi uĩyama inũ shaba tibi bari uĩyamari: “Nũ peamaki, haniara hasakĩ nukũ hiwea nũ benui kaii”, ikaibũ

²¹ natiã datekĩ hawa piabuma ikubainaibũ hanua Paulo hatu naxui ika benikaũ hatu yuikĩ: —Hunibuũ, ẽ hãtxa nĩkatã Creta anu mã baxikuxianã, bika txakabu mã meama ikeanaii.

²² Haskabiaya punu nukayamakãwẽ. Natianã, shashu besti benuaya nuku dasibi nũ mawama ishanaii. Matu yuinũ nĩkakãwẽ.

²³ Mexu merã ẽ Deus ha ẽ dayashũmis ea mekemistũ hawẽ nai tsuma yunua hushũ

²⁴ ea yuikĩ: “Pauloõ, dateyamawe. Romano shanẽ ibuhaira César mĩ uĩ kanũ Deusũ mia merabewakĩ ha dasibi shashũ mibe buaibu miwẽ taeshũ hatu tenãma ẽ hatu pasha washanaii”, akĩ ea yuishuki.

²⁵ Hunibuũ, ana punu nukama benimakãwẽ. Eãnã, ẽ Deus ikũwãyã haska ea yubashu ashanai ẽ ha xinaiĩ, nũ haskai kai hawẽ nai tsumã ea yuishurã.

²⁶ Hakia natukã betsa anu nuku teawai kaikiaki— hatu wa

²⁷ hanua Creta anua buimabu ma semana dabe kaya mexu betsatiã iãnẽwã deshũ betsa hawẽ kena Adriático anu niwẽ nuku shutukubaunaya iãnẽwã buspu tsaubaĩkĩ nuku dabe dabe akubainaya shashu ibu dayashũmistũ unãshubira bana nĩkatã xinaĩ: “Nũ ma mai kemaii”, ishũ

²⁸ hawẽ nua meti dispiwẽ mea 36 metro tanatã ana ha katxu shekekainaya ana mekĩ 27 metro tanariatã

²⁹ mixkiki keti ikĩ tsakai kaya datekĩ hawẽ shashu tsumakĩ mai betãti shãkama dabe inũ dabe shashu txishukiri pukuabu niti ikẽ hau Deusũ penaya uĩmakĩ hatu merabewanũ manai manixinaibũ

³⁰ shashu pixta butetã pashanũ, iwanã, shashũ dayamisbũ hatu paraĩ shashu debukiria hawẽ mai betãti betsari pukui itsai parananãtã pashai bupanãbũ

³¹ hakia haskaibukiri unãkĩ capitão Júlio inũ soldadobu Paulõ hatu yuikĩ: —Habũ shashu ibu dayashũmisbu habu besti pashaibunã, maturã, mã haskatã pashatirubumaki. Hatu nemakãwẽ— hatu wa

³² hawẽ bupanãbũ capitão datekĩ hawẽ soldadobu yunua ha dispiwẽ shashu pixta neshabu meshteabu iãnẽ pukukainaya

³³ ma pena kemaya hau pinũbũ Paulõ xinãkĩ hatu yunukĩ: —Menã dasibitũ hawara pirikãwẽ, mã haskai ikai ma semana dabe kabia usha tenekĩ uĩkubaĩkĩ mã hawa piama ẽ matu uĩaĩnã.

³⁴ Haskakẽ ẽ matu yunuaii. Punu nukama mã pashakatsis ikairã, pirikãwẽ. Mã nuitapabiai mã hawa txakabui benuama ishãkanaii. Ẽ hãtxa ẽ matu yuiai hakimayamakãwẽ— hatu washũ

³⁵ haska hatu yuitã Paulõ misi bishũ dasibibũ besuuria dakeama Deus kẽwãtã misi tũkeshũ pikĩ taewaya

³⁶ hanushũ unãshubira benimabaũ habũri piaibũ

³⁷ ha shashuwẽ nukubu nũ buaiburã, 276 yura nũ iniki.

³⁸ Hanushũ yaniwatã shashu ana shãkawakĩ shekiwã putakĩ teshe waxinabu ana hawẽ henekĩ pukukĩ keyuabũ

Shashu ewapa hawẽ buaibu dabekea hashka hashka inikiaki, na hãtxarã

³⁹ hanua penaya uĩbaũkĩ shashu ibu habu dayashũmisbubetã hanira kesha betsauri hanu unãbuma anu buabu hawa unãma hakia hawẽ deshũ anu maxi uĩtã: —Maxiuri nũ teai katirumẽkaĩ. Hauri bunãkãwẽ— hatu wa

⁴⁰ habũ habiaskari xinãkĩ hawẽ tsitsũti haimã nea pekashũ shashu debu anu ha niwẽ tu abaĩmis tari pixta ana pũtetã iã anu henekĩ hawẽ mai betãti dispi haki neshea meshteabu maxikiri tu iki nunukaini kemai taeaya

⁴¹ hakia hene hanus kuxibiranai anu uke merã maxi tsakai hanu uĩyama teshke ika ana harakiri katima hene kuxipai buspu tsaubirãkĩ shashu txishu tsaka tsaka akĩ hashka hashka akĩ taewaya

⁴² huni bitxiyamabu nunai hau pashai hunebaĩyamanũbũ yubakatã soldadobũ hatu detekatsis ikaibũ

⁴³ hakia Paulo hatu mekemakatsis ikĩ soldado capitão Júliõ hatu nematã nunanikabu habu dukũ hau pukubaĩ maxĩ mapekenũbũ hatu yunua

⁴⁴ nuna unãbumari ha katxu shashu nabe inũ shashu tuash ikaiwẽ hau bunũbũ dasibi nuku yunua haskai dasibi nũ nunubaini maxi metsatã nũ mapekebirãbirani keyuniki, pashai tsua hasamarã.