Hechos 26 - Kaxinawá Bíblia (BR)

Paulõ ikũwaĩbu itxakawabiaya Jesusũ katunikiri Agripa yui txaninikiaki, na hãtxarã

¹ hanushũ Agripã Paulo yuikĩ: —Hani mĩ hawa txakabuismakiri nuku yuiwe— aka —Peki— iwanã, hatu mekẽ sanãshũtã Paulõ hatu yuikĩ:

² —Shanẽ ibuhaira Agripaã, haska ekiri kayaibukiri mia bebũ nishũ ẽ haskakũkaĩmis ẽ mia hãtxa waĩwẽ taea ẽ benimaii, na haska judeu shanẽ ibubu ekiri txakabu txanitxakakĩ eki kayaiburã. Ẽ haska hayamaki.

³ Mianã, dasibi judeubũ beya unãkĩ haska betsa betsapa xinaĩ nũ ha irabemis mĩ unãhairaiwẽ taeshũ txanima ẽ hãtxa mĩ nĩkatiruki. Ẽ hãtxa teneshũ ea nĩkayuwe.

⁴ Dasibi judeubũ ea unã keyukanikiki, ẽ hatube hiwekũkaunirã, ẽ mae anuabu inũ hanua ẽ yumeni Jerusalém anuabunã.

⁵ Ha dikabi ẽ berunãtũ Moisés nukũ shenipabu yusĩni habũs xinã pashkama txibãhairakĩ nũ mekehairamis ẽ fariseu ikũkaini ea uĩkubainishũ mia yuitirubumẽkaĩ. Hakia ekiri xinaĩ hãtxatirubumamẽkaĩ.

⁶ Haskawẽ taeshũ ẽ haskarakẽ daki ea unãti watã kupikatsi haska nukũ shenipabu Deusũ yubani ikũwãkĩ ẽ manai ea aki ikanikiki. Hanushũ mawabu ana hatu bestẽwaĩ kai Deusũ nukũ shenipabu yubani ẽ ikũwaĩwẽ taeshũ ea kupikatsis ikanikiki.

⁷ Israelĩ bakebu 12 shukuabu tibitũ haska uĩkatsi manakĩ bariri inũ mexu merã Deus kẽwãkĩ duawakubaĩmisbu keska wakĩ haska manakabu keskari eãri ẽ ikũwaĩwẽ taeshũ haska bestiwẽ taeshũ habũ ea txitei kayanamei ikanikiki— iwanã, itxaburi uĩbaũkĩ ana hatu yuikĩ:

⁸ —Haskakĩ mã ikũwãbumamẽ, matubunã, mawabu Deusũ ana hatu bestẽwãshanairã?— iwanã

⁹ —Eãnã, txanima haskakiri xinã pewariamarã, ẽ hatu ayuniki, hatu yamawakatsis ikinã, Jesus Nazaré anua ikũwaĩbuki sinatairã.

¹⁰ Na haska akinã, Jerusalém anushũ ẽ aniki, Deusbe nukunabu hãtxashunika shanẽ ibubũ hatũ kuxipawẽ ea yunuaburã. Jesus ikũwaĩbu itxapa atxishũ bitxiti hiwe merã ẽ hatu mistukubainiki. Hanushũ hatu tenaĩbũ eã hatu nemama habiaskari xinãkĩ pesshũ ẽ hatu uĩs bestikubainiki.

¹¹ Hatu haska wakinã, hawa betsa tukama hanu itxamisbu hiwe tibi anushũ Jesus ikũwaĩbu hau henenũbũ hatu itxakawatxakayamakĩ beshtehairakatsis iki ẽ hatuki bene bene ikĩ hawa hatu henekatsi ikama judeubumã mae anuri pashaibu habiaria hatuki sinatahairakĩ hatu atxinũ, iwanã, ẽ hatu katxibãkubainiki.

¹² Deusbe nukunabu hãtxashunika shanẽ ibubũ haska nũ akai keska nũ anũ ea hatũ kuxipaya wakĩ yunuabu Damasco bai tanabaini ma ẽ kemaya

¹³ bai putxinĩ ma bari mananãbibiakẽ kakĩ ẽ uĩayã naiuria bĩ kuxipahaira bari binuatũ ea inũ ẽ haibuaibu nuku datxashaya

¹⁴ hanua dasibi maĩ nũ di ikaya nukunabũ hãtxa Hebreowẽ tsuãra ea yuikĩ: “Sauloõ, Sauloõ, haskakĩ mĩ ea itxakawakubainai? Mimebi mĩ txakabuaii, tsuki ikama ibubis mushaki iki ikasirã”, ea wa

¹⁵ eãri yukakĩ: “Shanẽ ibuũ, mĩ tsua iki ikai?” ẽ wa hanushũ ea yuikĩ: “Habia ea ikũwaĩbu mĩ hatu itxakawakubainairã, ẽ Jesuski.

¹⁶ Beniriwe, ẽ mia anu hushukirã. Mia katutã haska mĩ ekiri dayakũkaini txanikũkaĩshanũ ẽ mia uĩmashu inũ txipu betsa ẽ mia uĩmashanairã.

¹⁷ Ena mia watã judeubu anu inũ judeubuma anu hanu ẽ mia yunuai anu mĩ ka ẽ mia mekepakeshanaii, mia txakabuwatirubumarã.

¹⁸ Habu anu ẽ mia yunua kashũ hatu xinã betsa wamakĩ hau unaĩsmapakĩ Satanás ana txibãyamanũbũ ẽ Epa Deusũ hãtxa mĩ hatu yusĩkubaunũ judeubuma betsa betsapabu anu ẽ mia yunuaii. Harishũ hatu beru bepesha keska watã ana mexu merã kama keska hakia bĩwẽ kai keskaibu mĩ hatu waya hatiritũ ea ikũwaĩbũ hatũ txakabu ẽ hatu buashunaya Deusũ hatu hiwekuĩmashanikiki, hawa hatu kupiamarã, hawenabu meribi wakinã”, ea waniki.

¹⁹ Shanẽ ibuhaira Agripaã, haska nũ uĩsma nai anua namai keska ẽ uĩxina txibãnishũ ẽ txibãkubaĩmiski, xinã betsa wamarã.

²⁰ Harishũ Damasco anushũ dukũ kakape hatu yusĩ taewatã txipu Jerusalém anushũ yusĩriatã Judéia mai pakea hirabi anuabu judeubu inũ judeubuma ẽ hatu yusĩkĩ: “Xinã betsa wakãwẽ”, ẽ hatu wa tsuãra xinã betsa watã Deusũ bake ikũwãkĩ hatũmebi hatũ hiwea bena hayakĩ uĩkubainimabuki, ẽ hatu unãmakubainarã.

²¹ Ẽ hatu haska wamiswẽ taeshũ Templo anushũ judeubũ ea atxishũ ea tenãnũ ika iyamabuki.

²² Haskakẽ Deusũ ea merabewaya hawa xinã betsa wama shanẽ ibubu inũ shanẽ ibuma hatuki txani Moisés inũ Deusũ hãtxa yuishunika betsabũ haska bebũkiri kenenibu ishanai

²³ yuikĩ: “Messiasrã, nuitapatã mawai kaikiki. Hanua ha dukũ mawa bestẽkaina ha dukũ nuku bebushuni kaikiki. Haskaxĩshũ nũ judeubu inũ judeubuma hawẽ pashati bai shaba kayabi ibubis Messias txani kaikiki”, inibu habiaskari haskakiri ẽ hatu yusĩkubaĩmiski— akaya

Shanẽ ibuhaira Agripa Paulõ Jesus ikũwãmakeanikiaki, na hãtxarã

²⁴ Paulõ haska hawẽ hiweakiri yuiai nĩkai Romano shanẽ ibu Festo e itã unãshubima yuikĩ: —Pauloõ, mĩ patapaki. Kene itxapa unaĩ mĩ unaĩsmapakũkainaii— aka

²⁵ Paulõ kemakĩ: —Shanẽ ibu pepahaira Festoõ, ẽ unaĩsmapakiri hãtxamaki. Txanima shabakabi hãtxa kayabi besti ẽ matu yuiaii.

²⁶ Haskarã, ha shanẽ ibu Agripã Deusũ hãtxa unaĩwẽ taeshũ dateama haskakiri hãtxakĩ ẽ yui ikaii. Haska eã ẽ hakiri xinãnã, unã keyuriaikiki. Txanima Jesus hawa huneama habiaskariai hiwekũkainiki— iwanã,

²⁷ Agripakiri besushũ yuikĩ: —Shanẽ ibu Agripaã, Deusũ hãtxa yuishunikabũ keneni haskakiri ẽ mia yuiairã, mĩ ikũwaĩ? Ẽ xinãnã, mĩ ikũwaiĩ— aka

²⁸ Agripã kemakĩ: —Mĩ xinãnẽ, mĩ hawaira ea Cristo txibãmakatsis ikai?— aka

²⁹ Paulõ ana yuikĩ: —Hawaira kasmai txipu kasmai mia inũ dasibibũ natiã habũ ea nĩkaibu ẽ ikũwaĩ keskakĩ mã Jesus haibu warianũ Deusũ hau matu kenarianũwẽ, hakia na ẽ ika keskai mane dispiwẽ matu tsuã meneshamarã— hatu wa

³⁰ hanushũ hatu haska wai nĩkatã judeu shanẽ ibu Agripa inũ Romano shanẽ ibu Festo inũ Berenice inũ shanẽ ibu betsabu hatube tsauwa

³¹ tari meribi benibaĩ hamauria Paulokiri habu hãtxanamekĩ yuikĩ: —Ha hunĩnã, hawa txakabuwaismawẽ taeshũ tenãtima inũ bitxiti merã bitxitimaki— ikaibũ

³² hanushũ Agripã Festo yuikĩ: —Ha huni hawawama mĩ nitxĩtirubia hamebi: “Hau Césarn ea unãti washanũ”, ikĩ mia yukaxinarã, hari nitxĩyushãwẽ— akabu