Hechos 24 - Kaxinawá Bíblia (BR)

Hawa txakabuwama ixiãkiri Paulõ Félix yuinikiaki, na hãtxarã

¹ hanua ma cinco dia binukainaya Deusbe hawenabu hãtxashunika shanẽ ibuhaira hawẽ kena Ananias mae ewapa Cesaréia anu kakĩ judeu mekenika betsabu inũ huni unãnepa pe hatu hãtxashunika hawẽ kena Tértulo Jerusalém anua hatube kai hikitã Paulo txitenũ ika shanẽ ibu Félixsĩ besuuri itxabũ

² Paulo iweabu Tértulõ hakiri txitekĩ taewakĩ shanẽ ibu Félix yuikĩ: —Nukũ shanẽ ibuũ, mĩ pehairaki. Dasibi pewai duapai unãnepai mĩ shanẽ ibuaya miwẽ taea unãnuma nukũ mai pakea anu nũ pe hiwekũkaĩmiski.

³ Mĩ nuku haska waiwẽ taea xinã txãkãkĩ enabũ mia kẽwãkubaũmisbuki, mĩ nukũ shanẽ ibu duapahairarã. Eã ẽ mia habiaskari waii, Félixsĩ.

⁴ Hatishuĩra hãtxatxakayamakĩ mia bikawama eskarabes ẽ mia yuiai ea nĩkayuwe.

⁵ Na huni Paulorã, txanimahaira hakiri pemahaira nũ uĩaiĩ. Jesus Nazaré anuatũ yusĩa txibaĩbu hatu bebũshũkĩ mai hirabi anua judeubu manibaunabu bikawakĩ hatu yusĩ txakakĩ pashkakĩ hatu itimaska wakubaĩmiskiaki.

⁶ Haska besti wama nukũ Temploki meseama nuku txakabuwãxinaki. Haska waya nukunabũ atxiabu nukũ shenipabũ beya txibãkĩ unãti watã nũ kupipanã

⁷ soldado comandante Lísias hawẽ soldadobube kashũ hawẽ kuxipawẽ taeshũ nuku mebĩxĩshũ

⁸ nenu mia anushũ nũ txitenũ nuku yunuxinaki. Hanushũ mĩ miã Paulo yukashũ haska ẽ mia yuishu txanimamẽkaĩ mĩ unãtiruki— akaya

⁹ nĩkatã ha judeu shanẽ ibubu hatube itxabũ Tertulõ hãtxa abukĩ Félix yuikĩ: —Txanima habiaskaki— akaibũ

¹⁰ hanushũ Paulõri hau hatu hãtxa wanũ shanẽ ibu Félixsĩ yunukĩ teweshuna hanushũ Paulõ shanẽ ibu Félix yuikĩ: —Bari itxapa shanẽ ibukĩ enabu mĩ pe hatu mekekubaĩmis unaĩ benimakĩ haska ẽ hawa txakabuwaisma hamẽ ea txiteaibu hatũ hãtxa nemakĩ ẽ mia tapĩmai nĩkawe.

¹¹ Deus kẽwãtanũ ika ma 12 dia Jerusalém anu ẽ hikixinaki, haska txanima miari yuka ikĩ mĩ unãtiruki.

¹² Hanushũ Templo anua inũ hanu itxati hiwe anua inũ hanira hãtxai nishũ yurabu ẽ hatu itimaskawai tsua ẽ haska wai ea hawa nĩkabuma ixiãbuki.

¹³ Haskawẽ taeshũ ha hunibũ mia haskakiri yuiaibuwẽ taeshũ hatũ hãtxa kayabi hawa hayamaki.

¹⁴ Hakia haskakiri ekiri mia yuiaiburã, shabakabi mia yuinũ nĩkawe. Jesusũ Bai Bena nũ txibãyã: “Deuskiri kanekanikiki”, iwanã, nuku aki ikanikiki, haskamabiakenã. Jesus ikũwãkĩ nukũ shenipabũ Deus kẽwãpauni ẽ duawapakemiski, Moisés yusĩni inũ Deusũ hãtxa yuishunika betsabũri kenenibu dasibiri ikũwãkinã.

¹⁵ Haska wakĩ yura pepabu inũ txakabubu kupikatsi Deusũ hatu ana bestẽwãshanai ikũwãkĩ ẽ manaii. Habiasri na judeubu nukube itxabũ habiaskari manariakanikiki.

¹⁶ Haskawẽ taeshũ Deuski inũ hunibuki ẽ xinã txakaismaki, haskai hiwei pepanũ ishunã.

¹⁷ Haska inũ, betsarã, bari itxapa mai hirabi mae tibi kakũkaũtani enabu inãkuĩ hatu beshuĩ inũ Deus kẽwãkĩ txashuwã hatu kuamatanũ ika ẽ ana txĩtũkirãxinaki.

¹⁸ Hanushũ nukukiri Deus pepa xinãmatã Templo hemaĩtĩ anushũ txashuwã ẽ inãkuĩayã eki hawa huni itxabuma inũ tsua itimaskabumakẽ Ásia anua judeu betsabu eki nukushũ ea habũ itimaska wakĩ taewaxinabuki.

¹⁹ Ea habũ haska waxinabu ha Ásia anuabu habu betirubuki, mia bebũ shabakabi nishũ ea txiteirã, ẽ haskaxĩkẽ eki sinatai ixiãbumẽkainã.

²⁰ Beabumakẽ nukũ shanẽ ibubu Sinédrio itxashũ ea unãti wakĩ hawara ẽ txakabuwamis ea tapĩxĩshũ na shanẽ ibubũ mia haska yuikeãkanaii.

²¹ Hakia Sinédrio shanẽ ibũ hatũ besuuri nishũ hãtxa kuxipawẽ hatu yuikĩ: “Mawabu ana bestẽshanaibu ẽ ikũwaĩwẽ taeshũ natiã mã ea unãti waii”, akĩ Jerusalém anushũ ẽ hatu yuixinawẽ taea eki sinatai ikanimẽkaĩ. Hatu yukawe— aka

²² Jesusũ Bai Benakiri unãhairakĩ Paulõ yuiai nĩkatã judeubu manamakĩ Félixsĩ hatu yuikĩ: —Hatiara comandante Lísias Jerusalém anua huaya ẽ ana matu unãtihairawashũshanai, matunaki. Manayukãwẽ— hatu waya

²³ hanua hawẽ haibuaibũ Paulo duawakĩ hau pimayushanũbũ hawa hatu nemama hau Paulo hawa wama mekeyunũbũ Romano capitão hatu yunuxĩshũ

²⁴ hanushũ shaba betsaki txipu hawẽ aĩ judeu aĩbu hawẽ kena Drusila iyui Félixsĩ ana Paulo nĩkakatsi hatu kenama Paulo iweabu Jesus Cristo ikũwaĩkiri hatu yuikĩ

²⁵ hiwea pepatikiri inũ ibubis pe meketikiri inũ dasibi txakabu Deusũ kupishanaikiri Paulõ hatu hãtxa wakĩ yusĩaĩ nĩkai datekĩ Félixsĩ nitxĩkĩ yuikĩ: —Kayuwe, xinãshũ ana ẽ daya hayamatiã ana mia nĩkakatsis ikĩ ẽ mia ana kenashanairã— atã

²⁶ Félixsĩ Paulokiri xinã betsa wairã: “Ẽ hawa wama nitxĩshanũ pei itxapa hau ea inãshanũwẽ”, ikĩ Félixsĩ Paulo hawẽtxaĩs kenai habe hãtxabiakũkaĩkĩ

²⁷ hawẽ hãtxa nĩkabiakĩ judeu shanẽ ibubu daewakatsis ikĩ Paulo hawa nitxiãma ma bari dabe ka hanua Félix hawẽ daya menetã kaĩkainaya Roma anua shanẽ ibu betsa hawẽ kena Pórcio Festo Cesaréia anu shanẽ ibui taeniki.