Hechos 23 - Kaxinawá Bíblia (BR)

¹ Sinédrio itxabu dasibi shabakabi beiskĩ Paulõ hatu yuikĩ: —Ẽ betsabuũ, matu yuinũ nĩkakãwẽ. Ẽ hawa Deuski txakabu nima natiã Deuski dateama unãnuma ẽ hiweaki, Deusũ ea unãyanã— hatu waya

² ha dapi niabũ hau betsã kepais atanũ Deusbe hawenabu hãtxashunika shanẽ ibuhaira Ananiasĩ hatu yunua betsã kepais aka

³ sinatakĩ Paulõ kemakĩ: —Bemakis mĩ beparamebiaya mĩ huĩti txakabu unãtã Deusũ mia kupikĩ mia kepais ariashanikiki. Mĩ hari tsaushũ Deusũ hãtxa kenenibuwẽ ea unãti wabiakĩ hau ea kepais anũbũ hatu yunui na habia Deusũ hãtxa mĩ kaneaii— aka

⁴ ha dapi mapuabũ hawaira nemakĩ yuikĩ: —Deusbe nukunabu hãtxashunika shanẽ ibuhairaki dateama mĩ haki sinataii— akabu

⁵ Paulõ yuikĩ: —Ẽ betsabuũ, Deusbe nukunabu hãtxashunika shanẽ ibuhairama dabanẽ ẽ unãma ikaii. “Matunabu shanẽ ibukiri hãtxa txakabutimaki”, ibianikẽ ẽ kaneshuki— itã

⁶ shanẽ ibubu itxabu Sinédrio anu hatiri saduceubu inũ hatiri fariseubu Paulõ unãkĩ hui kuxipawẽ hatu yuikĩ: —Ẽ betsabuũ, earã, ẽ fariseuki. Ẽ epa inũ ẽ shenipabu fariseubu irianibuki. Mawa ana hiweshanaibu ikũwãkĩ ẽ manaya ea unãti wakĩ mã daka ea danaĩ ikai— hatu wa

^7-8 “Mawa ana besteãbuma ishanai inũ Deusũ nai tsuma inũ yushĩ hayamaki”, ikĩ saduceubũ yuimisbũ hanua fariseubu haskama: “Mawabu ana bestẽshanai inũ Deusũ nai tsuma inũ yushĩ hayaki”, akĩ yuimisbukẽ Paulõ ha hamebi haskakiri hatu hãtxa wai nĩkatã fariseubu inũ saduceubu ha iki hanubi kemanamei ha itxabu anua pashkaibũ

⁹ haskaibũ unãshubima dasibibũ yui kemanamei keketikubaunaibũ hanua Deusũ hãtxa kenenibu yusĩnanãmisbu fariseubu betsa benitã fariseubu hãtxashunũ, iwanã, hatu yuikĩ: —Na huninã, hawa txakabuwamaki. Yushĩ kasmai nai tsuma habe hãtxai daki ixiãki— hatu waibũ

¹⁰ pubẽhairai kemanamei hãtxa berukuaibuwẽ taeshũ Paulo yauxikĩ niniakeakekĩ pashka pashka akana ika datekĩ Romano soldado comandantẽ hau i benũbũ hawẽ soldadobu yunua itxabu anua Paulo iyushũ hawẽ meketi hiwe kuxipa anu soldadobũ ana bitxiabũ

¹¹ ushaxini ana mexu betsatiã Paulo anu nukũ Shanẽ Ibu Jesus hushũ yuikĩ: —Pauloõ, dateama benimawe. Na Jerusalém anushũ ekiri ikũwãkĩ mĩ hatu yuixina keskari wakĩ Roma anushũ habiaskari ekiri hatu yuiritãshãwẽ— awani kakẽ

Paulo tenãkatsi yubakanibukiaki, na hãtxarã

^12-13 hanua penaya judeubu itxapahaira 40 binua itxa Paulo tenãkatsi yubakai yuinamei: —Paulo tenãnũ ika tenãriama ana nũ hawa piama inũ nũ hawa nushuama ishanaii. Hakia ariama hawara nũ pikẽ Deusũ hau nuku kupishanũwẽ— iki haskakiri xinaĩ hãtxabaini

¹⁴ bushũ Deusbe hawenabu hãtxashunika shanẽ ibubu inũ shanẽ ibu beshmasbu anu bushũ betsã hatu yuikĩ: —Nukubunã, Paulo tenãnũ ika nũ hakiri yubakashuki. Ariama ana nũ hawa pitiruma inũ nũ hawa nushutiruma nũ yubakashuki. Hakia tenãriama hawara nũ pikẽ Deusũ hau nuku kupishanũwẽ, iki 40 hunibu binua haskakiri xinaĩ nũ hãtxakãshuki.

¹⁵ Haskakẽ dasibibũ mã ana unãti pehaira wakĩ Paulo hau ana iwenũbũ beparãtã Romano soldado shanẽ ibu comandante yukakãwẽ. Hanushũ iweaibũ hanu mã itxamisbu anu hikiriama nũ tenãshanaii— iwanã —Nũ yubakakãshu nũ ma peki— ikaibu

¹⁶ Paulõ puĩ huni bakẽ haskaibu nĩkabaini hawaira kaĩ soldadobũ meketi hiwe anu kashũ haska yubakakãshu Paulo yuia

¹⁷ Romano soldado shanẽ ibu beshmas capitão betsa kenashũ Paulõ yuikĩ: —Mĩ shanẽ ibu comandante hau hawara nĩkashukiri banabimanũ na berunã iyutãwẽ— aka

¹⁸ hanua hawẽ shanẽ ibu comandante anu capitãonẽ berunã iyushũ yuikĩ: —Hawa daki hau mia yuinũ na berunã mianu ẽ iwẽnũ ha Paulo nũ bitxixinatũ ea yunushuki— aka

¹⁹ Romano comandantẽ metsũshũ tari berunã ha besti iyushũ yukakĩ: —Hawa mĩ ea yuinũ ika ikai?— aka

²⁰ berunãtũ yuikĩ: —Paulo ana yukanũ, iwanã, mia beparãtã mexukiri habu Sinédrio anu mĩ Paulo hatu iyushũshanũ mia yukai bekatsi ma shanẽ ibubu yubakakãshuki.

²¹ Hakia 40 hunibu binuatũ Paulo tenãkatsi yubakakãshũ huneshũ manakanikiaki. Tenãriama ana hawa piama inũ hawa nushuama iyukanikiaki. Tenãriama hawara piaibũ Deusũ hatu kupishanikiaki. Haskakãshu miã besti: “Peki”, mĩ hatu wanũ mia yukai bekanikiaki. Hatũ hãtxa ikũwãyamashãwẽ— aka

²² comandantẽ nĩkatã berunã yuikĩ: —Haska mĩ ea yuishu tsua kakawayamatãwẽ— ashũ nitxiã berunã kaya

Hatũ shanẽ ibu Félix anu Paulo yununikiaki, na hãtxarã

²³ hanushũ Romano comandantẽ hawẽ capitão dabe hatu kena beabu yunukĩ: —200 soldadobu maĩ buaibu inũ, 70 cavaloki katsaumea buaibu inũ, hanua 200ri hatũ haxia buaibu itxawakĩ hatu pewakãwẽ. Mexu merã 9:00 hora da noitekẽ Cesaréia anu nitxĩtãkãwẽ,

²⁴ nukũ shanẽ ibu Félix anu iyukinã. Meribi cavalo betsaki katsaũshũ Paulo hawama meke pewashũ piskumatãkãwẽ— hatu wa kakatsi soldadobũ pewaibũ

²⁵ hau keneyabi butanũbũ comandantẽ keneshũkĩ:

²⁶ “Ẽ ea comandante Cláudio Lísiasĩ mĩ ẽ shanẽ ibu pepahaira Félixsĩ, ẽ mia hãtxa bumai uĩrashãwẽ.

²⁷ Ha huni hawẽ kena Paulo haki sinatakĩ judeubũ atxipakebaũ tenãpanãbũ Romano documento hayakẽ tapĩtã hatu nemanũ ika ẽ soldadobube kashũ ẽ hatu mepãmaxinaki.

²⁸ Hanua haskai haki sinatakĩ ha akanimẽkaĩ tapĩnũ ishũ dasibi judeu shanẽ ibubu Sinédrio itxabu anu iyushũ

²⁹ hatũ shenipabũ yusĩni Paulõ betsa wamis haki sinatakĩ txitekĩ kũyã akaibu ẽ nĩkaxinaki. Hakia hawa txakabu hayamawẽ taeshũ haska ha huni tenãtima inũ haska bitxiti hiwe merã bitxitimakẽ ẽ hatu nemaxinaki.

³⁰ Hakia tenãnũ ika haki yubakaibu nĩkatã ha huni hawaira mia anu ẽ yunua iyukanikiki. Miã mekeyuwe. Habu haki sinataibu judeubu bushũ hau harishũ txitenũbũ mia anu ẽ hatu yunuriashanaii, hau habũ txiteai miãri mĩ nĩkashanunã. Ẽ shanẽ ibu pepahaira Félixsĩ, hatiski, ẽ hãtxarã”, ashũ hatu bumaya

³¹ haska wakĩ soldadobu yunua mexu merã Paulo iyuxĩkĩ mae betsa hawẽ kena Antipátride anu bitxiabũ

³² haria hatuki pena soldadobu mexukiri maĩ bexiãbu ana Jerusalém anu txĩtũbiranaibũ hatiri soldadobu cavalowẽ buxiãbũ Paulo habũ iyukubaini

³³ Cesaréia anu hikitã Félix anu iyushũ kene inãkĩ Paulo yunuabu

³⁴ kene uĩshũ Félixsĩ Paulo yukakĩ: —Mĩ haniamẽ?— aka Paulõ yuikĩ: —Cilícia anua ẽ kaĩniki— ikai

³⁵ nĩkatã Félixsĩ yuikĩ: —Mĩ haskaya habũ mia txitexina beaibutiã hatubetã ẽ mia nĩkashanaii— atã hawa wama Herodesĩ hiwe itamama anushũ hau Paulo mekeyunũbũ hatu yunuxĩkẽ