Hechos 17 - Kaxinawá Bíblia (BR)

Paulo inũ Silas Tessalônica anushũ hatu yusĩayã hanua itimaskanibukiaki, na hãtxarã

¹ Filipos anua Timóteo iyui Paulo inũ Silas txipekebaini bui mae Anfípolis anu ushaxini ana bui mae Apolônia anu ana ushariakaini hanua bui mae betsa Tessalônica anu hikixina hanu judeubu itxamisbu hiwe hayawẽ taea

² Paulo ma haskamis beyawẽ taea hanu sábadotiã semana dabe inũ besti Paulo judeubube itxashũ Messiaskiri Deusũ hãtxa yuishunikabũ kenenibu betsa betsapa yuiaibube hatube yuinamekĩ:

³ —Deusunã, hawẽ Messiasrã, hau mawayushanũ yununiki. Mawatã ana bestẽshanikiki, akĩ hakiri keneniburã— akĩ Paulõ hatu yusĩ pewatã ana hatu yuikĩ: —Ha Jesuskiri matu yui ẽ txanikũkainairã, Deusũ Katua Messias Cristoki— hatu wa

⁴ hanushũ judeubu hatiritũ inũ Gregonawabũ Deus kẽwãmisbu itxapabu inũ aĩbuaibu pepa hakiri pe xinãmisbu mirimabũri Jesus ikũwãkĩ Paulo inũ Silaski dasiaibũ

⁵ hakia judeu shanẽ ibu betsabu habũ ikũwãkatsi ikama Paulo inũ Silasĩ hatu binuaiwẽ taeshũ hatuki sinatakĩ huni txakabu txikixbu hatu itxawatã hatu pei inãtã yura dasibibubetã hau hatu itimaska wabaĩ Paulo inũ Silas atxishũ mae shanẽ ibubu hau inãnũbũ hatu yunuabu haskai berukubaĩkĩ hatu mesewakĩ datebaĩkĩ dasibi itimaskakaĩ Jasomẽ hiwe anu ha hunibũ Paulo inũ Silas benakeakebaini ha hiwe anu hikitã

⁶ hatu betxiama Jasom inũ ikũwaĩ betsabu besti atxibaĩ mae shanẽ ibubu anu sharabaĩkĩ hatu iyushũ hãtxa kuxipawẽ ha akĩ txitekĩ: Ha huni Paulo inũ Silasinã, Romano mai hirabi anu buaketãkĩ hatũ yusĩawẽ hatu itimaska wakubaũkĩ nenuri bexĩshũ habiaskari wai

⁷ Jasomẽ hiwe anu hatu ixinakiaki. Habũ nukunabu yusĩkĩ Jesus hatũ shanẽ ibu benakiri yusĩkĩ nukũ shanẽ ibu Romano Césarn nemati hãtxa danãti wakĩ binumakanikiki. Txakabuhairaki— hatu wakĩ

⁸ yurã kaiã inũ mae shanẽ ibubu haska hatu yuiaibu nĩkatã hamẽmẽs daketapakĩ Jesus ikũwaĩbuki hatu sinatahairamaibũ

⁹ nĩkatã hau hune kaĩbaĩyamashanũbũ hawẽ yubakati pei itxapa Jasom inũ ikũwaĩbu betsabuna biãyushũ txipu ana hatu nĩkakatsi hatu hawa wama heneyuabu

Beréia anushũ Paulo inũ Silasĩ hatu yusĩaĩ nĩkanibukiaki, na hãtxarã

¹⁰ haskaibũ hawaira mexu merã hau hunebaĩtanũbũ ikũwaĩbũ Paulo inũ Silas inũ Timóteo mae betsa Beréia anu hau pashanũbũ hatu nitxiãbu bui Beréia anu hikixina hanua hanu judeu itxamisbu hiwe anu hikitã

¹¹ Deusũ Messias Jesus mekenãkiri hatu yusĩabu Tessalônica anua judeubu keskama Beréia anu judeubu pepabũ nĩkakatsis ikĩ: “Paulõ hãtxa txanimẽkaĩ? Txanimamẽkaĩ?” ikĩ Deusũ hãtxa kenenibu anua shaba betsa tukama tibi itxashũ tapĩkatsis ikĩ abukĩ uĩkubainaibũ

¹² haska wakĩ judeu itxapabu inũ Gregonawabu hunibu inũ aĩbuaibu pepabu hatukiri pe xinãmisbũri habũ Jesus ikũwaĩbũ

¹³ hatu haska wamaya Beréia anushũ Deusũ Messias kakapekiri Paulõ hatu yusĩaĩ judeubu Tessalônica anuabũ nĩkakĩ unãtã hawairabirani beshũ Paulokiri txani txakabaũkĩ Beréia anu hiweabu hatu xinã betsa wamakĩ yurabu hatu itimaska wai berukubaunaibũ

¹⁴ haska nĩkatã ikũwaĩbũ merabewakĩ hawaira hau Paulo pashanũ iãnẽwã kesha anu iyuaibũ hakia hatu anu Silas inũ Timóteo baxikuaibũ

¹⁵ hanua ikũwaĩ betsaburi Paulobe niwe shashuwẽ bui mae ewapa betsa Atenas anu txaihaira iyushũ nitxĩtanabu Paulõ hatu yuikĩ: —Silas inũ Timóteo hau hawairabirã hau eki nukuri benũbũ ea hatu yuishũtãkãwẽ— hatu wa txĩtũbainaibũ

Atenas mae ewapa anushũ Paulõ hatu yusĩnikiaki, na hãtxarã

¹⁶ hanua Paulo Atenas anushũ Silas inũ Timóteo manakĩ ha mae ewapanu dami yushĩ wanibu itxapa kẽwãmisbu uĩkubauni hatuwẽ nui bika tenehairai

¹⁷ haskawẽ taea judeubu inũ Gregonawa bestibu habũ Deus kẽwãmisbu hatũ itxati hiwe anua shaba tibi hikitã Deusũ Messias Jesuskiri hatube yuinamei hãtxakũkaini inũ mae hemaĩtĩ ewapa anushũri dasibi maniabu habiaskasri Jesuskiri hatu yui hatube hãtxanameriakũkainaya

¹⁸ hanua huni betsa unãnepabu epicureubũ yuikĩ: “Tsuawẽ nuiama hawara mĩ abuai besti aki pe hiwekũkaĩtiki”, ikĩ xinãmisbu inũ huni betsa unãnepaburi estóicobũ yuikĩ: “Hawawẽ benimama, hawẽ yurawẽ nuiama pe hiwekũkaĩtiki”, ikĩ xinãmisbu Paulobe yuinamei kemanameriaibũ habu betsã txitekĩ yuikĩ: —Na txikix hãtxãwainã, harakiri hãtxai ikimẽkaĩ?— ikaya betsã yuikĩ: —Paulonã, eska yui ikikiaki. Deusũ Messias Jesuskiri inũ yurabu dasibi mawa ana bestẽshanaibukiri txanirã— ikaya haskakenã: —Mekenika yushĩ betsa betsapa nũ hawa unãriabumakiri hawẽ nuku benimawanũ ika ikiraka?— ikaibũ

¹⁹ haska wabaĩkĩ Mati Areópago anu hanu unãnepabu itxamisbu anu Paulo iyushũ yukakĩ: —Nũ tapĩnũ ha yusĩa bena mĩ bexianã, nuku unãmariwe.

²⁰ Haskakiri txanikĩ mĩ nuku bepushuma kayairã, nũ tapĩkatsis ikai nuku yuiriwe, haskara kayakiri yuia mĩ yui ikimẽkainã?

²¹ Haska habu yuka ikirã, Atenas anu hiweabu inũ nawa betsa hanu hatube hiweyuabu tsuãra yusĩa bena beabu yuiaibu nĩkakatsis imisbukẽ

²² yusĩnã unãnepabu itxashũ kebaunabu namakis Paulo benia nishũ hatu yuikĩ: —Atenas anua hunibuũ, txanima hãtxa matu yuinũ nĩkakãwẽ. Yushĩ betsa betsapaki mesekĩ mã kẽwãkubaĩmis ẽ matu uĩaiĩ.

²³ Hanushũ mã yushĩ dami betsa betsapa tibi duawakĩ kẽwãmis anu ha txi tapu fogão betsakia uĩbaũkĩ betsa hawẽ kene nea: “Yushĩ tsuã ha unãmaki”, ika netãni ẽ uĩxinaki. Haska hawẽ kena unãriamabia mã kẽwãmisrã, hawẽ kenarã, Yavé Deuski. Haskakiri matuki txanitanũ ika ẽ huxiãki. Ea nĩkakãwẽ.

²⁴ Yavé Deusunã, mai hirabi inũ dasibi nũ hanu hiweabu Deusũ damiwanirã, dasibi hawenaski. Ha nai anua inũ mai anua dasibi mekei shanẽ ibuaya hunibũ haska wakĩ duawanũ, iwanã, hatũ xinãnẽ templo hawẽ kẽwãti hiwe washunabu anu besti hiweamakiaki.

²⁵ Ha inũ, dasibibu Deusũ nuku hiwemashũ huĩsinamamis inũ hamapai tibi nuku inãkĩ merabewakubaĩmiswẽ taeshũ hawara yurabũ Deus ashũtirubumahairakiaki.

²⁶ Xinãkãwẽ, eskakirã. Na mai hirabi anu nũ hanu hiwebaũshanũbũ Deusũ huni bestitxai dukũ Adão dami watã hawẽ taeshũ dasibi nawa betsa betsapa pawanikiaki. Na nenu mai anu hatiãra inũ hanira nũ hiweshanũbũ ma hanu tibi nuku mae pewashuni anu nũ ikabuki, na habia mae anu nũ hiweaburã,

^27-28 Deus benai yurabũ haki nukutiruburã. Txanima Deus nuku tibi anu benãtamabiakẽ Deuskiri tapĩnũ ika hawa txai kama nũ hanubi haki nukutirubuki. Matunabu unãnepa miyui hawẽrua unaĩbũ yuikĩ: “Nukurã, nũ deusũ bakebuki”, anikiaki. Txanima haska yuini keska nũ habia Deusunabuki. Haskawẽ taea Deuswẽ nũ hiweabu inũ nũ hawẽ hamapaiyaibu inũ nũ hayabuki.

²⁹ Nũ haskai Deusunabukĩ nũ haska xinãtirubumabiakẽ hunibũ xinã txakakĩ Deus haska keska dabanẽ hatũ xinãwẽ habũ deus wakĩ ouro inũ prata inũ mixki dami wamisbuki.

³⁰ Ũ unu bari betsatiã yura betsa betsapabũ hawa unãbumakẽ Deusũ hatu beruwẽs uĩyukubainiki. Hakia natiã ana haska wama mai hirabi anu hiwebaunabũ hau hatũ xinã betsa watã hakiri hau xinãnũbũ Deusũ hatu yunuikiki.

³¹ Huni betsa katushũ yurabu anu yununi mawa bestẽwãkĩ yurabu dasibi hawẽ kuxipa hatu uĩmaniki. Haskawẽ taeshũ ha shaba ma Deusũ katuni anu ha huni katuniwẽ taeshũ yura dasibi mai hirabi anu hiwebaunabu hatu unãti wakeakekĩ keyutã Deusũ hawa kaneama hatu kupishanikiki— hatu wa

³² mawa ana bestẽtirubukiri nĩkatã betsabũ kashe waibũ hanushũ betsabũ kashe wama yuikĩ: —Nũ ma haska nĩkashuki. Betsatiã nũ ana mia nĩkatiruki— akaibũ

³³ hanushũ Paulõ hatu henebaini kaya

³⁴ hanua yura eskarabesbũ txibãbaini haki dasishũ ana nĩka pewatã Jesus ikũwãnibukiaki, Areópago anua unãnepa yununika betsa hawẽ kena Dionísio inũ, aĩbu betsa hawẽ kena Dâmarisrã, ha inũ, ana hatirabunã.