Hechos 16 - Kaxinawá Bíblia (BR)

Paulo inũ Silas buaibube Timóteo hatube kanikiaki, na hãtxarã

¹ hanua Paulo inũ Silas kakũkaĩkĩ Derbe inũ Listra ha mae dabe anu yusĩ Listra anua Jesus ikũwaĩ betsa hawẽ kena Timóteoki nukunibukiaki. Hawẽ ewa judeu aĩbũ Jesus ikũwãyã hawẽ epa Gregonawã Jesus ikũwãmakẽ

² hanua ikũwaĩbu Listra inũ Icônio anushũ Timóteõ Jesus ikũwaĩ pe hiwekũkaĩmiskiri txaniaibũ

³ Paulõ nĩkatã hau ea merabewai ebe kanũ, ishũ hawẽ epa judeumabiakẽ hawẽ ewa judeuwẽ taeshũ hau judeubũ Timóteo danãyamashanũbũ hawẽ berabĩtirubukẽ hatũ beya txibãkĩ hawẽ hina kubitxi Paulõ hatu meshtemanikiaki.

⁴ Hanua bukubaĩkĩ judeubu inũ judeubumã Jesus ikũwaĩbu mae tibi anua hau hatũ beyakiri yusĩ bikanameyamakubainũbũ Jesusũ kuxipayabu inũ mekenikabu Jerusalém anushũ hatu nemakĩ keneshunimabu hatu yusĩ txanikubainaibũ

⁵ hanua ikũwaĩbũ haska nĩkatã hatũ xinã pewakĩ mestẽwãkubainaibũ yura betsabũri Jesus ikũwaĩ shaba tibi ana itxapabu hatuki dasikubainaibũ

Paulo usha namaya Macedônia anu hau kanũ huni betsã kenanikiaki, na hãtxarã

⁶ mai pakea betsa Ásia anu Paulo inũ, Silas inũ, Timóteo Jesuskiri hatu yusĩ hari bunũ ikaibũ Deusũ Yushĩ Pepatũ hatu nemaya mai pakea dabe Frígia inũ Galácia anuabu hatu yusĩ kapukebauni

⁷ mai pakea betsa Mísia kemai Bitínia mai pakea betsa anu hikinũ ishũ xinãyã Jesusũ Yushinĩ hatu ana nemakẽ

⁸ hanua Mísia kapukei bai txai tanabaini mae betsa iãnẽwã kesha anu bei butubirani Trôade anu hikiabũ

⁹ habianuri ẽ Lucas ẽ hatuki nukukẽ mexu merã Paulo usha namaya huni betsa Macedônia anua damia nishũ Paulo yuikĩ: “Macedônia anuri hushũ nuku merabewayuwe”, ikai

¹⁰ nĩkatã bestẽshũ ha namapã uĩshu nuku yuiaya Macedônia anushũ Jesuskiri kakape nũ hatu yusĩ kanũ Deusũ nuku yunuai unãtã nukũ mabu pewaxĩtã

Filipos mae anushũ Paulo inũ Silasĩ hatu yusĩnibukiaki, na hãtxarã

¹¹ hanua Trôade anua penaya niwe shashu ibu peiwẽ pakatã nanekaini natukã hawẽ kena Samotrácia anu kayãbis kai pukei hanu keti itã hanu ushaxini ana bestẽkaini mexukiri habias shashuwẽri pukei mai pakea betsa Macedônia anu mae betsa Neápolis anu hiki keti itã

¹² hanua mananã mapekekaini Romano mae ewapa mae tibi binua txaima Filipos anu nũ hikixina hawa wariama hanu usha eskarabestã

¹³ hanu judeubu itxamisbu hiwe hayamakẽ sábado huĩrukũtitiã mae anua kaĩkaini hene keshashũ Deus kẽwãkĩ hanushũ Deus kuxipa yukamisbu anu kai aĩbus itxamisbuki nukutuxitã hatube tsaushũ Deusũ Katua Jesus mekenãkiri nũ hatu yusĩkĩ taewaibũ

¹⁴ ha aĩbuaibu itxa betsã Deus kẽwãmis hawẽ kena Lídia mae betsa Tiatira anua hunishũ tari pepa bishũ pukukĩ nanke mexupa duakabi washũ hatu inãmis nukũ Shanẽ Ibũ merabewakĩ nĩka pewamakĩ hawẽ xinã betsa wamaya Paulõ hãtxawẽ Jesus Lídiã ikũwãyã

¹⁵ hanushũ habubetã hawẽ hiwetãshũ ikũwaĩbuwẽ taeshũ unãtã nũ hatu naximakĩ keyua Lídiã nuku yuikĩ: —Txanima nukũ Shanẽ Ibu Jesus ẽ ikũwaĩ mã ea xinaĩnã, ẽ hiwe anu iyui bekãwẽ— akĩ nuku ea akĩ ana nuku ena wanũ ikaya —Peki— itã hari ka nũ habe hiweyuniki.

¹⁶ Hanua shaba betsatiã hanu Deusbe hãtxamisbu anu ana Deusbe hãtxanũ ika nũ kaya txipax yushinĩ bebũkiri unãmamiskẽ ha txipax huni betsabũ tsumapã hatu unãshũkĩ hawẽ tsumabu pei mirima hatu bishũmiskẽ txaima haki nukutã nũ daĩbainaya

¹⁷ nuku txibãbaĩkĩ metubaĩkĩ mapuabu dasibi unãshubima hui kuxipawẽ hatu yuikĩ: —Ha huniburã, Deus kuxipa dasibi binua hawẽ tsumabũ ha dayashũkanikiki. Hanu kupiaitiã tsuãra matu nemashũtiru hawẽ txanima pashati bai matu unãmakanikiki— akĩ

¹⁸ shaba tibi hawẽtxaĩs bestikima nukukiri yui hãtxakũkainaya Paulõ haska nĩkai ma bika teneshũ dabeketã ha txipaxki yushĩ hikini yuikĩ: —Jesus Cristõ kuxipawẽ ẽ mia yunuai ha txipax anua kaĩriwe— aka haska was ha yushinĩ hawaira henebainaya

¹⁹ ana ha txipax yushĩyãkĩ pei ana hatu bishũtiruma hawẽ tsumabũ ana hawawẽ haskatima unãtã Paulo inũ Silaski sinatakĩ atxibaĩkĩ hatũ mae namakis hemaĩtĩ anu hatũ shanẽ ibubu bebũ iyukĩ sharabaĩ

²⁰ hanushũ shanẽ ibu pewanikabũ besuuri hatu nitxĩtã yuikĩ: —Na judeubunã, nukũ mae anushũ yusĩkĩ harakiri xinãtimawakĩ dasibibu nuku itimaska wakanikiki.

²¹ Hatũ beya haska hiwemisbu nuku yusĩaĩbu nũ Romanobũ nũ txibãbaĩtirubumaki, haska nuku yusĩnũ ika ikaiburã— hatu waya

²² hanushũ yurã kaiã mapubaunabũri haska nĩkai sinatai habũri hatu txiteaibũ hatukiri haskaibuwẽ taeshũ hatũ shanẽ ibu pewanikabũ hau hatũ tari pekatã hi siriwẽ hau hatu kuxa kuxa anũbũ hatu yunuabu

²³ habũ hatu kuxa kuxa atxakayamatã bitxiti hiwe anu hatu bitximatã mekenikatũ uĩ pewakĩ hau mekehairanũ yunubiranabu

²⁴ nĩkatã ana dĩtu uke merãhaira Paulo inũ Silas mistushũ hau haska pashayamanũbũ hi shui dabeyawẽ hatũ tae bitaush arabetã mekekẽ

²⁵ ha haska wabu habias mexu yamenapũ Deus dayuikĩ Paulo inũ Silasĩ hawẽ kẽwãti Deuskiri nawaibũ ha habu dukũ hatu bitximabũ hatu nĩkaibũ

²⁶ haskabiama e iskaũ hawaira patxa sakui mixki bitxiti hiwe wanibu takash takash akaya ha haska waya beputi tibi hamebi bepẽmanai keyuaya huni tibi mane dispiwẽ meneshekeabu hamebi txurekei niri iki keyuaya

²⁷ hanua mekenika bestẽkawã beputi tibi ma bepẽmana uĩtã xinaĩ: “E hee! Mĩ haskati kemaĩ. Dasibi ma kaĩbaini pashabubĩ! Ibubisbĩ ẽ mawai!” itã hawẽ nupe txaipa sitã ibubis tenukuyupanã

²⁸ hawaira Paulõ hui kuxipawẽ yuikĩ: —Mimebi ibubis txakabuyamawe. Nuku dasibi nũ hani kamaki— ikaya

²⁹ hanushũ hawẽ tsumabu bĩ yukatã Paulo inũ Silaski datei saki saki iki kuxikaĩ kẽwaĩ hatu namã dãti itã

³⁰ hanushũ kaĩmatã hatu yukakĩ: —Shanẽ ibubuũ, hanu kupiaitiã ẽ Deus daewakatsis ikaii. Haskapa, hau ea mekeshanunã?— hatu wa

³¹ hanushũ habũ kemakĩ: —Shanẽ Ibu Jesus ikũwãwẽ. Mia inũ mĩ hiwe anu mibe hiweabubetãs mã haska waya Deusũ matu mekekubaĩshanikiki, kupiamarã— hatu waya

³² hawaira bitxiti hiwe mekenika inũ dasibi habe hiweabu nukũ Shanẽ Ibu mekenãkiri hatu yusĩaĩ

³³ nĩkatã mexubiakẽ hatu kuxaxinabu su ika hene habaibu hawaira ũpashwẽ hatu txukatã hanushũ habe hiweabubetãs Jesus mekenã ikũwãkãshuwẽ taeshũ Paulo inũ Silasĩ hatu naximabu

³⁴ hanua habe hiweabubetã Deus ikũwãbaini benimahairabaĩkĩ hatũ hiwe anu hatu iyushũ hatu pimaxinaibũ

³⁵ hanua penaya shanẽ ibu pewanikabũ hatũ tsumabu hatu hãtxa bumakĩ yuikĩ: —Ha huni dabe atxiabu mã hatu bitxixinaburã, ana hatu hawa wama hau kaĩnũbũ yuitãkãwẽ— akabu bushũ bitxiti hiwe mekenika yuiabu

³⁶ hanushũ Paulo yuikĩ: —Ẽ matu hawa wama kaĩmanũ shanẽ ibubũ ea yunukãshukiaki. Haskakẽ unãnuma burikãwẽ— hatu waya

³⁷ hakia Paulo kaĩtã shanẽ ibũ tsumabu yuikĩ: —Nuku dabe Romano documento nũ hayabiakẽ txanima nuku hawa yuka pewama e iskaũ huni dasibibũ berubi nuku kuxa kuxa matu amatã nuku bitxixinabuki. Ikis natiãri huneri nuku kaĩmakatsis ikanimẽkaĩ? Haskamaki, hau habũ ibubis nuku kaĩmai benũbũ hatu yuitãkãwẽ— hatu wa

³⁸ hanua hatũ tsumabu bushũ haska Paulõ hatu yuia nĩkabaĩ hatũ shanẽ ibubu yuiabu nĩkatã: —Romano documentoyabu daka— iki datei

³⁹ haska hatukiri nĩkabirani beshũ daewakĩ hawẽ bitxiti hiwe anua kaĩmatã nitxĩkĩ Paulo inũ Silas yuikĩ: —Matu haska wakĩ nũ kanexinaki. Nukũ txakabu xinãma unãnuma burikãwẽ, nukũ mae henebainirã— hatu wa

⁴⁰ bitxiti hiwe anua tashnibaini bui Lídiã hiwetã hikia bayukĩ hanushũ ikũwaĩbu hatu xinã txãkãwãtã Paulo inũ Silas buaibũ Timóteo hatube kaya hakia ea Lucas habianu ẽ baxikuyuniki.