Hechos 12 - Kaxinawá Bíblia (BR)

Tiago tenãtã Pedro Herodesĩ hatu bitximanikiaki, na hãtxarã

¹ Ha haskaibu habiatiãri shanẽ ibu Herodesĩ ikũwaĩbu betsabu hatu itxakawakĩ taewakĩ

² soldadobu hatu yunua Joãonẽ betsa Tiago nupe txaipawẽ detekĩ tenãxinabũ

³ haska waibu judeu shanẽ ibubũ uĩkĩ abuxinabũ Herodesĩ unãtã judeubũ misi shashama besikĩ pimisbutiã Pedrori hatu atximashũ

⁴ bitxiti hiwe merã Jerusalém anu hatu bitximatã habu tibibũ hau mekekĩ keshebainũbũ soldadobu quatro shuku tibi habu quatro soldadobũ habuã hau mekenũbũ hatu yunutã xinãkĩ: “Judeubu Páscoa nawai besi keyuaibũ Pedro unãti washũ ẽ hatu tenãshũriashanaii, judeu shanẽ ibubu benimawakinã”, ixĩkẽ

⁵ Pedro kene merã bitxixinabu hatu keshe pehairawamabũ hanua ikũwaĩbu hawẽ nuikĩ hau tashnimanũ hakiri Deusbe hãtxakĩ yukatxakayamashũkĩ heneabumakẽ

Pedro bitxiti hiwe anua haskabiamawatã nai tsumã tashnimanikiaki, na hãtxarã

⁶ hanua Pedro bitxishũ ushãxĩkĩ penaya yurã kaiãnẽ berubi uĩaĩbũ Herodesĩ Pedro unãti watã tenãkatsi ikĩ manaya hanua Pedro soldado dabebe mane dispi txiwetameyawẽ habe meneshekea mekea habe ushabũ, hanua daberi kini hawẽ beputi kesheshũ uĩhairaibũ

⁷ hanua bitxiti hiwe merã Deusũ nai tsuma damii hiki txashai shabakaĩ bitxiti dĩtu merã shaba wa nitã nai tsumã Pedro usha bestẽwãkĩ tima tima aka besteĩ tekuitanai yuikĩ: —Menaã, hawaira beniriwe— akaya ha Pedro mane dispi soldadobube meneshekea hawaira hamebi txurekei niri ikaya

⁸ nai tsumã ana yuikĩ: —Mĩ nanesheketi sawetã mĩ bitxi tae saweriwe— aka Pedrõ haska waya nai tsumã ana yuikĩ: —Mĩ tari bemakia peyabukutã ea txibãbirãwẽ— aka

⁹ hatxũ kakĩ txibãbaĩkĩ xinaĩ: “Ẽ haskai? Ẽ txanima ma besteã daka kai ikai? Na ea nai tsumã eska wairã, ẽ daka usha namai ikai?” ishũ xinãbaini

¹⁰ ha dukũ soldado betsa daĩbaini ana betsãri keshea ha katxu daĩriabaini kai bitxiti hiwe hawẽ henea beputi anu mane beputi kuxipawẽ bepuabuki kemaya hamebi bepẽmanaya hanua kaĩkaini tashnirabetã bai tanabaĩkĩ nai tsumã ha besti henebaina

¹¹ hanushũ Pedrõ xinã kayatiwakĩ unãtã: —Herodes inũ judeu shanẽ ibubũ dasibi ea haska wakatsi ikaibu nemanũ, iwanã, txanima ẽ Shanẽ Ibũ hawẽ nai tsuma yunua hushũ ea tashnimashu xinãkĩ ẽ unaiĩ— itã,

¹² haska xinãbaini João Marcõs ewa Mariã hiwe anu ikũwaĩ mirimabu itxashũ Deus hakiri yukashunaibu anu Pedro kashũ

¹³ hiwe hemaĩtĩ kenenibu hanu hikiti shui beputi tsã tsã akaya Mariã tsuma aĩbu hawẽ kena Rode: —Tsua ikimẽkaĩ?— ika kaĩkaĩ uĩ kashũ

¹⁴ Pedrõ hui nĩkatã benimahairai bepẽshũyuama kuxikaĩ uke merã hiwetã hikishũ hatu yuikĩ: —Pedrorã, ua ma beputi kesha nia ẽ nĩkatanaii— hatu wa

¹⁵ hawẽ hãtxa ikũwãma habũri yuikĩ: —Hamabiakẽ mĩ humei ikaii— akabu —Ẽ txanĩwaĩ ikai dabanẽ mã ikaii. Haskamaki— ikaya habũ ana yuikĩ: —Hamaki. Hatũ mekea hawẽ nai tsuma mĩ nĩkatanamẽ ikai?— ikaibũ

¹⁶ Pedrõ hatu kenakĩ tsã tsã akĩ heneamakẽ hanua bepẽshũ betxitã uĩ e iki teku iki keyuaibũ

¹⁷ hanushũ hikitã hawẽ mekenẽ hatu nemakĩ hatu hãtxa nesematã haska hawẽ Shanẽ Ibuã bitxiti hiwe anua tashnimakĩ pashawashu hatu yuitã ana yuikĩ: —Haskatã ẽ kaĩshu Tiago inũ ikũwaĩbu betsabu ea hatu yuishũshãkãwẽ— hatu watã hanua hune kaĩkaini mae betsa anu iruyui kakẽ

¹⁸ hanua ma penai shabaya Pedro haskatã kaĩkaina unãma bepushui bitxiti hiwe anua soldado uĩnikabu haskatima datehairaibũ

¹⁹ hanushũ hawẽ soldadobu betsa Herodesĩ yunua benabaũkĩ Pedro betxiabumakẽ ha soldadobũ Pedro mekexinaibũ Herodesĩ hatu yuka hawa yuitirubumakẽ hatũ hãtxa abuamahaira ha habũ meke txakaxina soldadobu kupikĩ hau tenãnũbũ soldado betsaburi yunutã hanua Judéia henebaini kai Cesaréia anu Herodes hiwei kanikiaki.

Haskatã Herodes mawanikiaki, na hãtxarã

²⁰ Hanua Tiro anuabu inũ Sidom anuabuki Herodes hatuki sinataya Tiro inũ Sidom yurabũ piti Herodesĩ maiwã anua bimisbuwẽ taeshũ shanẽ ibu Herodes daewakatsis iki habe shanẽ ibu beshmas Herodes merabewamis Blasto anu beshũ hau hatu merabewakĩ daewamashanũ haibu watã yukaxinabu

²¹ hanua shaba betsatiã Herodesĩ hatu hãtxa wakatsi hatu kenaxina bea shanẽ ibu betsaburi beria itxa maniabũ hatũ besuuri Herodesĩ itxati tari hawẽruahaira sawea hanushũ yunumis anu tsaushũ hawẽ hãtxa hatu yuikĩ taewaya

²² hanushũ hunibũ habũ hawẽ hãtxa nĩkakĩ abukĩ unãshubima yuikĩ kẽwãkĩ: —Na Herodes hãtxairã, huni keskamaki. Ha deus betsa keskai hãtxaikiki— akaibũ

²³ Herodesĩ haska waibu unãkĩ nĩkabiakĩ hatu hawa nemama hatũri Deus kẽwãkatsi ikamawẽ taeshũ hawaira Deusũ nai tsumã Herodes kupikĩ isĩ tenemaya nami shenã kaiãnẽ pia mawanikiaki.

²⁴ Haskaxĩkẽ Deusũ Messias Cristo mekenãkiri mae betsa betsapa tibi hiweabu anu hatu yuikubainaibũ nĩkakĩ ana itxapabũ Jesus ikũwãkubainaibũ

²⁵ hanua Antioquia anua ha pei hatu itxawashũtã bushũ Jerusalém anu Jesus ikũwaĩbu mekenikabu hatu inãtã harishũri hatubetã Jesuskiri hatu yusĩkubaĩkĩ keyutã txĩtũkirãkĩ João Marcos Antioquia anu iwei Barnabé inũ Saulo bunibukiaki.