Hebreus 8 - Kaxinawá Bíblia (BR)

Deusũ Jesuswẽ yuba bena pehaira wanikiaki, na hãtxarã

¹ Nũ haska hakiri hãtxairã, nuku Deusbe hãtxashunika binua nũ ha xinã kaya wairã, nai anu hawẽ ibu Deusũ tsauti yusiuri nuku tsaushunaki.

² Hanu Deus hiwea anua Deusbe nuku habi hãtxashunika kayabi hawẽ daya akirã, haska hatu yusĩmaniwẽ taeshũ hatũ yusĩa nũ ikũwaiĩ. Txanima Deusbe nuku hãtxashũmistũ hatu dasibi binutã hanushũ tsuã ana itxakawatima anu Deusbe shanẽ ibukĩ hanu Deuski nukuti kayabi Deusũ besti ani anushũ nuku inũ hawẽ Epa Deus daewakĩ nuku haibunamemaikiki, ana sinatamamarã, hunibũ Templo wama ini anushunã.

³ Ha inũ, Deusbe hawenabu hãtxashunika tibirã, Deusũ hatu katukubaĩmiski, hau habũ hatu merabewakĩ hawẽ Deus daewati yuinaka inãkuĩaĩbu hau habũ kuashũkubainũbunã. Hakia Jesus Cristo nuku hãtxashunika inũ ikarã, hawẽ yurawẽ hawẽ hiwea yauxiama hawẽ Ibu Deus nuku daewashunũ ika nuku mawashuniki.

⁴ Hamẽ nenu mai anushũ Deusũ hãtxa Moisés yusĩni txibãkĩ Deusbe nukunabu hãtxashunikabũ txashuwã bake inũ ina awa tesẽshũ kuakĩ ma hatu menu keyushũkubaĩmisbuwẽ taearã, nukũ Shanẽ Ibu Jesusrã, hania Deusbe nuku hãtxashũtiruma ikeanaii.

⁵ Ha inũ, haska Mati Sinai anushũ Deusũ nai anua tari inũ bitxi hiwe dami Moisés uĩmaxina Moisés hatu amanũ ikaya hanushũ Deusũ Moisés ana yuikĩ: “Uĩrawe. Haska mati anushũ ẽ mia uĩmaxina keska ha itsa hatu amashãwẽ”, aniwẽ taeshũ Deusũ Moisés uĩmani ha kayabima ha itsa uĩmani keska ha Israelbu hawenabu Deusbe hãtxashunikabũ txibãkĩ akubaĩmisbuki.

⁶ Hakia Cristo nuku hãtxashunika kayabirã, ha hawẽ Epabe nuku hãtxashũkĩ nukukiriri xinaĩ nukuwẽ dabanã Deus hakiri yuba bena pehaira ana tsuã betsa watima waniki, hawẽ taeshũ hawa kanetima txanima yuba mestẽwãkinã.

Ha dukũ Deusũ yubani yamawai kai ana bena yubashanaikiri hãtxanikiaki, na hãtxarã

⁷ Hanua ha dukũ yubani pepahairakẽ hawẽ yubati hãtxa ha katxu Deusũ ana yubama ikeaniki.

⁸ Hakia ha yurabu Deusũ uĩa hawa hawẽ yunuti pe txibãbumakẽ hanushũ hatukiri hawẽ yuishunika Deusũ Jeremias yuikĩ: “Deusũ yuikĩ: Hawatiãra Israelbu inũ Israelĩ bake betsa Judã bababube ẽ hatube yubakai benashanaii.

⁹ Na haskakiri hatube yubakairã, ha baritiã hatũ shenipabu Egito mai pakea anu hiweabu ẽ kuxipawẽ ẽ hatu tsekabirãkĩ iweni keska ha xinãwẽ ẽ hatu ani keska ẽ wama ishanaii. Ẽ habu hatu yubani ea txibãkĩ pewabumawẽ taeshũ ẽ ma hatu heneaki, iniki, Shanẽ Ibu Deusrã.

¹⁰ Hamẽ hanu hatiara Israelĩ bababukiri ẽ ana hatukiri yubakairã, eska ẽ ishanaii. Hatiara haska ẽ hatube yubakai benairã, ana bemakis ẽ hãtxa ẽ hatu yunuamaki. Hanua hanu hatuki dasikatsi hatũ bushka anu ẽ hãtxa mistukĩ hatũ huĩti bena watã ẽ hãtxa hatuki kenea keska ẽ washanaii. Hanushũ habũ mekenika Deus ea ẽ ikaya habu enabu bena meribi kayabi ikubaĩshãkanikiki.

¹¹ Hatiã ẽ hatu haska wakẽ ẽ hatũ mekenã Deus dasibibũ unãshãkanikiki, shanẽ ibuhairabu inũ hawaumabũrirã. Dasibi habũ ma ibubis ea unã keyuaibũ tsuabũra hawẽ haibuaibu inũ hawẽ betsabu ekiri hatu xinãma ishãkanikiki.

¹² Hatũ txakabu hatu buashũtã ẽ ana haska hatukiri xinãma ikũkaĩshanaii”, aka hawenabu yusĩtã Jeremiasĩ nukuri keneshuniki.

¹³ Hanua hawẽ yubati hãtxa benakiri Deusũ Jeremias hãtxa watã xinaĩ: “Ha dukũ ẽ yubati hãtxa sheni ẽ anirã, ana ikama ishanikiki”, ikĩ ana atimawakĩ xinãkĩ: “Bena ẽ yunuaya ha dukũ ẽ yununi shenikũkaini yamai kaikiki”, iwanã, Deusũ xinãniki.