Hebreus 7 - Kaxinawá Bíblia (BR)

Cristorã, Melquisedeque hawenabu Deusbe hãtxashũpauni keskakiaki, na hãtxarã

¹ Melquisedequekiri ana matu yuinũ nĩkakãwẽ. Ha Melquisedequerã, Salém shanẽ ibu inũ nukũ Deus binuabe hawenabu hãtxashunika inikiaki. Nukũ shenipabu Abraão shanẽ ibu betsabube detenamekĩ hatu maematã hawara yumetsubaĩxinabu hatu deteshũ mebĩtãkĩ beaya Salém mae shanẽ ibu Melquisedeque kaĩkaĩ haki nukushũ Deusũ Abraão hau duawapakeshanũ Melquisedequeĩ Deus yukashunikiaki.

² Haska washunaya Abraãonẽ hawenabu yunua nawabũ mabu mebĩxina pashkakĩ mãtxĩ mekẽ dabeti wabu Melquisedeque duawakĩ kẽwãkĩ mabu mãtxĩ bestitxai Abraãonẽ inãkuĩnikiaki. Hamẽ betsarã, Melquisedeque hawẽ kena maewarã, shanẽ ibu xinã pepaki. Ha inũ, hawẽ kena betsa Salém shanẽ ibu maewarã, hawenabu unãnuma hiwetanika shanẽ ibuki.

³ Ha inũ, betsarã, nukunabu Deusbe nuku hãtxashunikakiri hatu unãkĩ hatũ epa inũ hatũ ewa inũ hatũ shenipabukiri unãkĩ nũ hatu tanakubaĩmiski. Hakia Melquisedeque betsahairakiaki, tsuã unãmarã. Hawenabukiri tsuã unãma inũ, hawẽ kaĩyãkiri tsua hakiri hãtxaisma inũ, mawani tsuã unãmakiaki. Hakia Deusũ bake keskai hawenabu Deusbe hãtxashunika ipakeriaikiaki, heneamarã.

⁴ Ha inũ, Melquisedeque shanẽ ibuhairakĩ nukũ shenipabu Abraão shanẽ ibubia ha binuawẽ taeshũ nawa shanẽ ibubube detenamekĩ maematã hatũ mabu beshũ mekẽ dabeti mãtxĩtã Abraãonẽ Melquisedeque pashkashũkĩ mãtxĩ bestitxai inãkuĩnikiri ana matu yuinũ nĩkakãwẽ.

⁵ Ha dukũ, Abraãonẽ baba Levĩ bababu Deusbe nukunabu hãtxashunikatũ Moisés hatu yusĩni hãtxa txibãkĩ dasibi hatunabu habias Abraãonẽ bababubia yura betsabu anua hatu akawakĩ habuã yunu mãtxiãbu habũ dukũ ha piti pashka taewashũmisbuki, mãtxĩ betsa Levĩ bababu inãkinã.

⁶ Melquisedeque Levĩ babamabiatũ Abraão anua hawẽ mabu mãtxiã betsa binikiaki. Ha inũ, betsarã, Deusũ Abraão duawakĩ ma yubabianikẽ Melquisedeque shanẽ ibuhairatũ nukũ shenipabu Abraão beshmas merabewakĩ duawanikiaki.

⁷ Tsuara kuxipa beshmas hau Deusũ duawanũ betsã binuatũ Deus yukashũmisrã, haska nũ unaiĩ.

⁸ Uĩkĩ xinãkãwẽ. Levĩ bababũ Deus dayashũkĩ hawenabu Israelbũ inãkuĩ bishũbiakubaĩmisburã, debukubirãmisbuki. Hamẽ Melquisedequekiri keneniburã, hiwepakeaiwẽ taea Abraão anua inãkuĩ bikinã, Levĩ bababu binunikiaki.

⁹ Na haska yuikinã, Levĩ bababu hawenabu Deusbe hãtxashunika iki kai xinãkĩ Abraãonẽ Melquisedeque inãni keska wakĩ natiã amisburã, haska Melquisedeque pakakĩ inãkinã, Abraãonẽ hanubi ibubis pakanikiaki, ha mabu mãtxĩ mekẽ dabeti watã hatiubus bestitxai inãkinã.

¹⁰ Melquisedeque Abraão kawanaiki nukuni keskarã, dasibi Abraãonẽ bababu kaĩriabumabiakẽ hawẽ yura meranua habuki nukuni keska nũ xinãtiruki. Txanima Melquisedequẽ hawẽ kuxipawẽ Abraão inũ Levĩ bababu binua iniki.

Deusbe hawenabu hãtxashunika binua bena wanikiaki, na hãtxarã

¹¹ Israelbu Deusũ hatu hawẽ pepawayukatsi hawẽ yunuti inũ hawẽ nemati hãtxa Moisés hatu inãmakĩ yununikiaki. Hawẽ taeshũ Levĩ bababu Deusbe hawenabu hãtxashunika wakĩ ha hãtxa txibãkĩ hau hatu pewakubaĩshanũbũ, iwanã, Deusũ Moisés habu katumanikiaki. Hatu haska waniwẽ taeshũ habuã hawa pewama kanekubaini hiwenibuki. Haskawẽ taea huni betsa Deusbe nuku hãtxashunika betsa Deus anua huniki. Hamẽ Arãonẽ bababũ amis keskama hakia Melquisedeque imis keskai Deusbe nukunabu hãtxashunika bena hau ipakeshanũ haska Deusũ xinãnishũ hawẽ yunuti maewanikiaki.

¹² Hanua Jesus Deusbe nuku hãtxashunika yunukĩ nukunabu Deusbe nuku hãtxashunikabu hatu binumakĩ hatu hamẽ waniki. Ha dikabi hawẽ yunuti inũ hawẽ nemati hãtxa betsa wakĩ Deusũ maewarianiki.

^13-14 Nukũ Shanẽ Ibukiri keneniburã, Israelbu shukua betsa anua tashniniki, Levĩ bababu anuamarã. Ha shukua anua hawa Deusbe hawenabu hãtxashunika hayariama iniki. Hakia Judã bababu anua nukũ Shanẽ Ibu Jesus tashninirã, dasibibũ unãkanikiki. Hamẽ Moisés Deusbe hawenabu hãtxashunikabukiri kenekinã, Judã bababu anua kaĩshanaikiri hawa hatuki txaniama iniki.

¹⁵ Haska Deusbe nuku hãtxashunikakiri Deusũ hawẽ yusĩa maewanirã, txanima shabakabi nũ unãtirubuki, Deusbe nuku hãtxashunika betsahaira Melquisedeque keska nukũ Shanẽ Ibu nuku washunirã.

¹⁶ Haska hunibu hau nukunabu Deusbe hãtxashunika binua ikũkaĩshanũ Levĩ bababu anua katumisbu keska wakĩ ha hãtxa yununi txibãkĩ nukũ Shanẽ Ibu Deusũ katuama iniki. Hakia hiwea kuxipa haya tsuã yamawatirumawẽ taea niti ikama nuku hãtxashũpakeikiki.

¹⁷ Ha kaĩriamabia hau hawenabu Deusbe hãtxashunika ipakeshanũ hakiri keneniburã, eska yuiaki: “Miarã, minabu ebe hãtxashunika niti ikama mĩ ipakeshanaii, Melquisedeque ikũkaini keskairã”, aniki.

¹⁸ Habu dukũ katushũ Deusũ hawẽ hãtxayabi hatu yunubiani ha yunuti sheni babutũ nũ haki txiti ibia nukũ hiwea hawa nuku pepawatirumakẽ Deusũ nemakĩ beshteyuniki. Haskawẽ taeshũ Jesus nuku hãtxashunika tashnimatã hatũ daya binumaniki.

¹⁹ Deusũ Moisés yunua hawẽ hãtxa keneni txibãbiai hatũ nuku pepawatirumakẽ hawẽ shãtukũ betsa yunukĩ nuku hawẽ yuba bena pehaira wakĩ ha txibaĩ haki dasitã Deusũ enabu kayabibu nũ hiweshanũbũ nuku ashuniki.

Hawenabu ini keskama Deusbe ha nuku hãtxashunika binua Jesus hiweakiaki, na hãtxarã

²⁰ Ha inũ, Jesus katukinã, Deus ibubis yubakakĩ betsa watimawakĩ mestẽwãkĩ Jesus katuniki, hau nuku hãtxashũpakeshanunã. Hakia Deusũ hawa yubama yunukĩ Levĩ bababu katunikiaki, Deusbe hau nukunabu hãtxashunika ikubainũbunã.

²¹ Hamẽ nukũ Shanẽ Ibu katukinã, hawẽ yuba kanetima waniki. Hakiri tana yubakaikiri Davi hakiri hãtxakĩ kenekĩ: “Deusũ hawẽ bake katukĩ hakiri yuikĩ: ‘Miarã, ebe minabu hãtxashunika mĩ ipakeshanaii, niti ikamarã’, akĩ yubakĩ Deusũ ma yui hãtxashu ana hawẽ xinã betsa wama ishanikiki”, akĩ nuku keneshuniki.

²² Ha dukũ nuku yubani keskama Jesuswẽ hawẽ yubaka bena binumakĩ pepahaira waniki.

²³ Ha inũ, Moisés hãtxa txibaĩ Deusbe nukunabu hãtxashunikabu mirimabu dayabiai betsa taska tsua hiwei ikibi ikama dasibibu mawakubaĩmisbuki.

²⁴ Hakia Jesus ana mawatirumawẽ taea ha besti Deusbe nuku hãtxashũkũkainaya betsã haska washũ hawẽ daya mebĩtirumaki.

²⁵ Tsuabũra Jesus ikũwaĩ hawẽ Epa Deuski dasia Deusũ kupiti binui pashaibu hiwekuĩa inãkĩ hatu merabewai Deusbe nuku hãtxashũpakeikiki, hawa niti ikamarã.

²⁶ Hanua Jesus Deusbe nuku hãtxashunika binua nũ haska keskariai hiwetiru ha hawa txakabu hayama inũ hawa detsis hayama meribi pepa besti haska yurabu txakabukĩ Deus sinatamamisbu keskama pepakĩ keyu hatu binutã naiuri pepahairai hauri nuku hiwei kashuniki.

²⁷ Ha nukunabu Deusbe nuku hãtxashunikabu binuabunã, shaba tibi yuinaka betsa tenãtã hatu kuakĩ menu keyushũmisbuki, ha dukũ hatũ txakabu dukũ buatã ha katxu hatunabũ txakaburi buashũkinã. Hamẽ Jesusrã, hatu keskamaki. Hatũ nukũ txakabu Deus buamai hawẽ hiwea yauxiama cruz anua besti wai hawẽ hiweawẽ nuku mawashũkĩ ana mawatimai ibubis Deus nuku daewashuniki.

²⁸ Ha inũ, Deusũ Moisés yusĩni hãtxa txibaĩ pepakatsi ibiai Deusbe hatunabu hãtxashunikabũ kanemisbuki. Hanushũ Deusũ hawẽ yunuti inũ hawẽ nemati yunu keyunishũ hawẽ bake yubakĩ katukĩ nukunabu Deusbe hãtxashunika binua pepahaira hau ipakeshanũ hakiri yubakatã katuniki.