Hebreus 5 - Kaxinawá Bíblia (BR)

¹ Haska inũ, hawenabu txakabukubaĩmisbuwẽ taea Deus hatuki sinatai habuã hatu daewashũkĩ merabewakĩ txashuwã tesẽshũ hau hatu kua keyupakeshũshanũbũ dasibi Deusbe hawenabu hãtxashunika shanẽ ibu tibi hunibu anua Deusũ katumiski, Moisés betsa Arão katuni keska wakinã.

² Hamẽ yura betsa imis keskai Deusbe judeubu hãtxashunika shanẽ ibu tibitũ ibubis mekei peama kanemisbuwẽ taea haska xinaĩ hatuwẽ nuiriatirubuki, unãriabuma inũ txakabuwakĩ kaneaibuwenã.

³ Ha inũ, hawẽ txakabuwẽ inũ nukunabũ txakabuwẽ taea Deus sinatai Deusbe nukunabu hãtxashunika shanẽ ibu tibitũ Deusũ yununi txibãkĩ Templo hemaĩtĩ anushũ yuinaka hatu menu keyushũkĩ Deus hatu daewashũpakemisbuki.

⁴ Ha inũ, tsuãra ibubis eiskaũ xinaĩ: “Deusbe enabu hãtxashunika shanẽ ibunũ”, ika hamebi katukutirubumaki. Hakia Deusũ Arão katuni keska wakĩ tsuara katukatsis ikĩ duawakĩ hatũ besti hatu kenakĩ katukubaĩmiski.

⁵ Habiaskari wakĩ Cristo ibubis katukui nuku hãtxashunika binua ibubis ikama iniki. Hakia Deusũ duawakĩ yuikĩ: “Mĩ ẽ bakerã, natiã ẽ hiwea mia inãkĩ ẽ mia yunuaii”, aniki.

⁶ Hanushũ hawẽ kene betsa anushũri yuikĩ: “Miarã, minabu ebe hãtxashunika niti ikama mĩ ipakeshanaii, Melquisedeque ipauni keskairã”, aniki.

⁷ Ha inũ, nenu mai anu yurabube Cristo hiweyua mawawẽ dateyamanũ ika yumaĩ saĩ iki kashai hawẽ Epa Deusũ merabewatiru xinaĩ habe hãtxakĩ hau hawẽ date yushĩ nemashunũ hawẽ kuxipa ea aniki. Hawẽ Epã hãtxa nĩkakĩ danaĩsmawẽ taeshũ Epa Deusũ haska wai nĩkatã hawẽ date nemashuniki.

⁸ Ha inũ, Deusũ bakebiatũ hawara bika tenekĩ nĩkakĩ txibãhairanũ itã hamapai xarabu haska Deusũ abumis Cristõ nĩkahairai ishũkũkainiki.

⁹ Haskai pepakũkaini hawẽ besti hiwekuĩa bi nũ hawẽ pashatirubu nuku ishuĩ ha besti bai ikibi iniki, nũ habũ ikũwãkĩ txibãshanaibu nuku ishuĩnã.

¹⁰ Hawẽ bake haska yubani keska watã Melquisedeque keskari wakĩ hawenabu Deusbe hãtxashunika shanẽ ibu binua hau niti ikama ipakeshanũ Deusũ ha uĩkĩ katunishũ yununiki.

Jesus ikũwãbiatã henetimakiri hatu yununikiaki, na hãtxarã

¹¹ Haskai Deusbe Jesus nuku hãtxashũmiskiri itxapa ẽ ana matu yuitirubia mã unãshubira tapiaĩwẽ taea ẽ matu yusĩaĩ bikahairaki.

¹² Ha inũ, bari itxapa ikũwãbiakubaini mã yusĩnanãriamaki. Hakia natiã yusĩa betsa betsapa Deuskiri hau tsuabũra unãshubira matu meshtãmabaĩkĩ ana yusĩ pewanũbũwẽ. Hamẽ ha dukũ hawaira abukĩ ikũwãkĩ mã tapĩnibuki. Hakia natiã mã ma punu nukai babuhairaii. Hanũ piti kuxipa pinũ ika keskama mã bakeixtã txutxu heneriama keskabuki.

¹³ Ha inũ, bakeixtã txutxu besti amis keskaburã, tsuãra haska nukũ Shanẽ Ibũ abuai tapiãma mã kanekubainaii.

¹⁴ Hakia yura ewabũ piti kuxipa pimisbu keskabũ habuã besti hawara pepa inũ hawara txakabu unãti wakĩ Deusũ hãtxa pepa unãkĩ katutirubuki.