Hebreus 4 - Kaxinawá Bíblia (BR)

¹ Ha haskanibukiri natiã nũ yuikubainairã, hawẽ mae pepa haska Deus yubakani hanu huĩrukuĩ hikikatsi iki nũ ikaiburã, haska keskariki. Uĩrakãwẽ. Betsabũ matũ xinã mã betsa wamakẽ haskawẽ taea mã hikitirumariki.

² Txanimaki. Matũ shenipabu hawẽ yubati hãtxa Deusũ Moisés hatu yuimani keska wakĩ hawẽ kakape hãtxa huĩrukũti betsakiri Jesusũ hawẽ tsumabu unãmatã hatu nukuri yusĩmani nũ nĩkariakubainaii. Nũ hatu keskatirumaki. Uĩrakubainãkãwẽ. Haskai nukũ shenipabũ hawẽ yuba hãtxa huĩrũkũtikiri nĩkabiai ikũwãma inũ hawa txibãma ikubainaibuwẽ taeshũ hawẽ mai pepa yubani anu hau hikiyamashanũbũ hatu yubanitũ hatu nemaniki.

³ Tsuabũra nũ ikũwaĩbu Deusũ huĩrukũti pepa anu nũ hikitirubuki. Hakia tsuabura nukubetã ikũwãbumarã, hawa hikitirubumahairaki. “Ẽ hatuki sinataiwẽ taea hanu ẽ huĩrukũti pepa ẽ hatu yubabiani anu hau hikiyamashanũbũwẽ”, ika Deus yubakakĩ yuini xinãkãwẽ. Deus haska yubakabiani mai hirabi damiwatanã, huĩrukũti pepa ma pewani hayaki, hanu ikũwaĩbu nũ hikitiruburã.

⁴ Haska Deus dayani Moisés hawẽ hãtxa keneni sétimo diakiri yuikĩ: “Dasibi damiwakĩ hawẽ daya keyutã sétimo dia Deus huĩrukuniki”, hatu watã keneniki.

⁵ Kene betsa anu hanu hawẽ huĩrukũti anu yurabu hikitiru kasmai hikitirumamẽkaĩ, hawa hawẽ hãtxa nĩkaisbumawẽ taea hatuki sinatai yubakai: “Hanu ẽ huĩrukũti pepa ẽ hatu yubabiani anu hau hikiyamashanũbũwẽ”, ika Deus hãtxaniki.

⁶ Habu dukũ nukũ shenipabũ hawẽ hãtxa pepa nĩkabiatã danaĩ mai pepa huĩrukũti anu hikiama inibuki. Hakia betsabu hikinibuki. Natiã ha yubani hãtxarã, betsa wariamaki. Haskawẽ taea ha huĩrukũti pepa anu tsuabũra ikũwaĩ nũ hikishanaii.

⁷ Hakia hawẽ hãtxa danaĩbu yuini keska wakĩ Deusũ yurabu xinã betsa wamakatsis ikĩ hanu shaba betsa pewaitiã haska hãtxa tashnimanũbariai pewakĩ ana hãtxaniki. Bari itxapa katã anũbariaikiri bebũkiri nukũ shenipabu shanẽ ibu Davi hakiri nawamakĩ yuimakĩ: “Natiã matũ mã Deusũ hãtxa nĩkairã, matũ huĩti kuxiyamakãwẽ”, akĩ hãtxamai ikũwãshanaibu dasibibukiri Deus hatu yubakashuniki.

⁸ Ha inũ, hawẽ hãtxa danãnibũ bakebu mai pepa anu Josuẽ hatu iyushũ hanu huĩrukũti kayabi hatu ibuwamaya hanu huĩrukũti betsakiri Deus yubakai ana hãtxama ikeaniki.

⁹ Haskawẽ taea hawẽ huĩrukũti pepa naiuri nũ Deus ikũwaĩbu meribi nũ hawenabu hikishanaibu hayayuakiaki.

¹⁰ Ha inũ, Deusũ huĩrukũti pepa anu tsuabura ma hikia ana dayama Deusbe huĩrukũpakeshãkanikiki, damiwakĩ keyutã Deus huĩrukuni keskairã.

¹¹ Haskawẽ taea hawẽ huĩrukũti pepa anu hikishanũ ika nukũ merabenã Jesus txibaĩ yumãbiai txĩtũtaskayamanãkãwẽ, ha habũ hawẽ hãtxa nĩkama nukũ shenipabũ danãnibu keskakĩ hatu tanaĩ hatu txibãyamanãkãwẽ.

¹² Ha Deusũ hãtxa kaĩkinã, paepa hiwea keskatũ nukũ xinã pewakĩ huni hawẽ nupe kenu dabeyatũ huĩti uke merã txapashũ uĩa keska wakĩ nukũ xinã inũ nukũ yushĩ unãti wamiski.

¹³ Dasibi Deusũ hatu damiwanirã, unãti waya tsuã hani hũtaĩ hunetirubumaki. Dasibi nukũ akarã, hirabi nuku unãti washanikiki, nukuki kenemis bepẽtã manakukĩ pewakinã.

Jesus Deusbe nukũ hãtxashunika binua kayabikiaki, na hãtxarã

¹⁴ Deusũ bake Jesus iwãni ana hawẽri naiuri kani hawẽ Epabe nuku hãtxashunika binua nũ ikũwaĩwẽ taeshũ nukũ xinãwẽ mestẽwãtã txibãkĩ heneyamakubainãkãwẽ.

¹⁵ Haska hiwea bika tenei nũ yumãkũkaĩmis keskai nukũ Deusbe nuku hãtxashunika binua na mai anua hiweria nuku itsai hamapai tibi mei bika teneriai yumãkũkainiki. Haskabiai hawa txakabu mekĩ kaneama iniki.

¹⁶ Haskakẽ hawara mei nũ bika teneaitiã hau nuku merabewanũ Deusũ kuxipa xinãkĩ haki dateama ikũwaĩ haki txanikĩ ea akubainãkãwẽ, hau nukũ Epa Deus nuikipatũ nukuwẽ dabanã ikĩ hawẽ duapawẽ nũ nuitapai hau nuku merabewanunã.