Hebreus 11 - Kaxinawá Bíblia (BR)

Haskakĩ hatũ shenipabu itxapabũ Deusũ hãtxa ikũwãpaunibukiaki, na hãtxarã

¹ Deusũ yubakati hãtxa txanima ikũwãkĩ hawa uĩriamabia hamapai tibi pepawẽ Deusũ nuku duawashanai hayakatsi hawa xinã betsa wama mestẽ besti watã nũ manakahairakubaĩtirubuki.

² Nukũ shenipabu itxapabũ Deusũ yubakati hãtxa haya ha ikũwãkubainaibuwẽ taeshũ Deusũ hatũ xinã unãtã hatukiri pe xinaĩ benimakũkainikiaki.

³ Hamẽ hawara nũ uĩaĩ inũ nũ uĩtiruma dasibi mai inũ nai anu damiwakinã, hawẽ hãtxa kuxipawẽ besti Deusũ damiwanirã, ikũwãkĩ nũ unãkubainaii.

⁴ Ha inũ, Adãonẽ huni bake dabe Deusũ yunuxina hawẽ hãtxa Abelĩ ikũwãkĩ txibãkĩ hawẽ Deus kẽwãti txashuwã tesẽshũ kuakĩ keyushũbiaya hawẽ betsa Caimnẽ Deusũ yunua hãtxa txibãma hawẽ bai anua yunu besti kuashũkĩ Deus kẽwãpaibiaya Abelĩ kẽwãti besti Deusũ abukĩ hawẽ hãtxa ikũwaĩ unaĩ: “Huni pepaki”, anikiaki. Ha inũ, Abel mawabianikẽ haska ikũwãkĩ tates taewatã henebaini habiawẽri nũ ikũwãkubaĩshanũ Deusũ hãtxa Abelkiri kenenibu uĩkĩ nũ unãriakubaĩmiski.

⁵ Ha inũ, Enoque huni pepatũ Deusũ hãtxa ikũwãkĩ txibãkĩ heneama Deusbe haibunamekĩ Deus benimawakubainaya hawenabu uĩmamabaĩkĩ hau mawayamanũ Enoque Deusũ nai anu aininikiaki. Haska kenenibu nũ uĩmiski.

⁶ Ha inũ, tsuabũra Deusũ hãtxa ikũwãbumarã, haskatã Deus benimawatirubumaki. Hakia tsuabũra Deus hiwea haya inũ hatũ hatu manakushanai benakĩ hau ikũ besti wakubainũbũwẽ.

⁷ Ha inũ, nukũ shenipabu Noẽ Deus ikũwãyã Deusũ bebũkiri haska washanai iriama uĩyamabia huni pepakĩ Deusũ yunuti txibãkĩ hawẽ hawenabu pashawakatsi nunuti ewapa wanikiaki. Haska Deus ikũwaĩwẽ taeshũ Deusũ mekekĩ hawẽ pewẽ manakukĩ pashawanikiaki. Habias hãtxa ikũwãkĩ txibaĩwẽ pashakĩ yurabu mai hirabi anuabu Noẽ hatu kupinikiaki.

⁸ Ha inũ, Abraãonẽ Deus ikũwãkĩ txibãkubainaiwẽ taea Deus habe haria yubakakatsi ikĩ Deusũ kena hawa hẽ iyamama ikũwaĩwẽ taea hawẽ mae henei tashnikaini hani kai unãmabia ha mai pakea betsa anu Deusũ inãshanai anu kanikiaki.

⁹ Deusũ haska yubaimawẽ taea hawẽ xinãnẽ besti ikũwaĩ ha mai pakea anu txipu ibuwanũbariai ha xinaĩ nawa betsa keska hiweyunikiaki. Haska hiweirã, tari pũtebaũkĩ hiwe watã hiweakeakeniki. Habiaskariai hawẽ bake Isaque inũ hawẽ baba Jacó ha Deusũ hatu yubani ibuwashanũ ika hiweriakubainibukiaki.

¹⁰ Deusũ hawẽ dami hawa kaneismatũ ma hatu mestẽwãshuni anu hari hatu hiwemashanai maewã Abraãonẽ xinaĩ na mai anushũ dukũ mana taewanikiaki.

¹¹ Ha inũ, Abraãonẽ aĩ kayabi Sara ma yushabuhairakĩ bake bitirumabiakẽ Abraãonẽ ikũwã besti ha dikabi ma ika kai mestebuhairabia Deusũ merabewa bake wanikiaki, Deus habe yubakaima parãma ha meneshũshanai ikũwãkubaĩyamawẽ taeshunã.

¹² Tsuã haska watirumai Abraão anibuhairabiatũ bake waima hanua hawẽ bababu mirimahaira bixiti inũ iã kesha anu maxiti tsuã hati tanatiruma keska pahairanibukiaki.

¹³ Hamẽ ha yurabu haska Deusũ hatu yubani hari hiweriamabia ikũwã besti mawanibukiaki. Hakia Deusũ yubani bebũkirihairashũ ikũwãkĩ besti xinaĩ punu nukama manakakĩ habũ ibubis xinaĩ: “Na nawã mai anu baii niyua keskakĩ Deusũ mae pepa nai anua nũ hari kashanai anu nũ manakakubainaii”, ikubainibukiaki.

¹⁴ Habũ haska yuibiakĩ hatũ mae kayabi betxiriama shabakabi nĩkakĩ unãbiai haskara dabanẽ ha mae manaka bestikubaĩkanikiki.

¹⁵ Haska hatũ mae anua benibu pe dabanẽ xinaĩ ana hawẽri txĩtũkeanibukiaki.

¹⁶ Haskama ha mae pepahaira hawẽrua nũ haska uĩriama txakabuma nai anu Deusũ hatu yubayama xinaĩ habianus hiweyunibukiaki. Haskakẽ habu katuni Deusũ ma hatũ maewã pewashuniwẽ taea Deus hatuki dakeama hatu xinaĩ: “Ẽ hatũ merabenã Yushĩki”, imiski.

^17-18 Ha inũ, Abraãonẽ Deus ikũwãniwẽ taeshũ Deusũ hawẽ bake Isaquekiri yubakĩ yuikĩ: “Isaquewẽ mĩ bababu itxapa mia washũshanikiki”, abianishũ hanushũ haska ikũ ea txibaĩmẽkaĩ? ishũ unãti wa hawẽ bake Isaque Abraãonẽ Deus inãkĩ kua keyushunũ, iwanã, hawa yauxi hawẽ nuiama hawẽ bake bestitxai iyui kanikiaki.

¹⁹ Haska Deusũ ashuã uĩkĩ hawẽ kuxipakiri Abraãonẽ tapĩniki, Deusũ mawabu bestẽwãtirukiri tapĩkinã. Haskawẽ taeshũ hawẽ bake inãkĩ Deus tenãshũbiai kashũ ana hawẽri hawẽ bake hiwea txĩtũwãbirãkĩ hawa wama ishu keska iwenikiaki. Haska wakĩ Deusũ kuxipa hawẽ xinãmati shabakabi hatu unãmaniki.

²⁰ Ha inũ, Deusũ hawenabu duawashanai Isaquẽ ikũwãkĩ hawẽ bake Jacó inũ Esaú hãtxa pewẽ Deus hatu yukashunikiaki.

²¹ Ha inũ, Jacõ Deus ikũwaĩ ma mawa kemashũ hawẽ mestẽti tsumatã Deus kẽwãkĩ hawẽ baba Josẽ huni bake dabe hãtxa pepawẽ hatu duawakĩ yukashũrianikiaki.

²² Ha inũ, Deusũ Israelbu Egito anua hatu tashnimabainũbariai Josẽ ikũwaĩ mawakĩ hawenabu hatu yuikĩ: “Nenua kaĩbaĩkinã, mai pakea pepa Deusũ matu ibu wamashanai anu ẽ shau ẽ bababũ hau ea bunũbarinũbũwẽ”, akĩ hatu yununikiaki.

²³ Ha inũ, Israelbu pahairaibuwẽ taea Egitonawa shanẽ ibu hatuwẽ datekĩ hatũ huni bakebu kaĩaĩ hau tenãkubainũbũ ishũ hatu yunubiaimakẽ hawa dateama Moisés ibubũ Deus ikũwãkĩ hatũ bake hawẽruahaira kaĩaĩwẽ nuikĩ ushe dabe inũ besti huneyunibukiaki.

²⁴ Ha inũ, Egitonawa shanẽ ibu Faraónẽ aĩbu bakẽ Moisés hene anu nunua neshetã ma yumewaimawẽ taea huni ewa Moisés hawẽ bake hatu wamakĩ hatu kenamakatsi ikama Deus ikũwaĩwẽ taea

²⁵ Moisés katukinã, Egitonawabũ beya hatubetã mei benimai hatube txakabui hiwekatsi ikama haska hawenabũ bika teneaibube merabewai hatube nuitapakatsi haska xinãkĩ katunikiaki.

²⁶ Hanushũ Deus ikũwãkĩ hawara Deus yubakani manakĩ Egitonawabũ mabu pepa betsa betsapa Moisés inaĩbuwẽ taea Messias Cristo ha kẽwãma shanẽ ibu wabu hawẽ kẽtiru unãbiai shanẽ ibũ hiwe anua kaĩkaini Deus kẽwaĩ hatũ merabenã Messias Cristo hawenabubetã manakai bika tenei yumãbiai manakuti pepa Deus anua hawa benuama inãshanai Moisés haska katunikiaki.

²⁷ Haskakẽ Egitonawabu shanẽ ibu haki sinatabiaya hawa haki dateama Egito mai pakea anua kaĩkainima Deus uĩtirumabia ikũhairawakĩ xinã betsa wama ikũkainikiaki.

²⁸ Ha inũ, Deusũ yunua nĩkatã ikũwãkĩ Moisés hawenabu Páscoa besi hatu tates taewamakĩ misi shashama inũ txashuwã bake nami shui hatu pimakĩ txashuwã himi hiwe tibi hanu hikiti shui sheshekaiã hatu kepushmakĩ keyukẽ Deusũ nai tsuma debuwanikatũ Egitonawã huni bake iuwabu dasibi hatu debuwabiakĩ Israelbu hawa meama dũkebainikiaki.

²⁹ Ha inũ, Israelbu Egito anua pashai bui Iãnẽwã Taxipa namakis pashkatã Deusũ hatu bai wakĩ metu washuna Deusũ meketi kuxipa ikũwaĩ Israelbu pukei keyuaibũ hakia Egitonawabu habias baiwẽ hatu txibãbaini pukeriai hasai keyunibukiaki.

³⁰ Haska inũ, Israelbũ Deusũ yunua nĩkatã katã katãkĩ shaba metutitiã hatu dũkebaunaibũ Jericó mae mixki ewapabuwẽ kenebaunibu di iki keyuaya Deus ikũwãkĩ Israelbũ hatu detekĩ maemakĩ yamawanikiaki.

³¹ Ha inũ, habianuari Raabe aĩbu hininipabia Deuski mesekĩ Israelĩ baba dabe unãtinaĩ buabu hatu itã merabewaxinawẽ taeshũ txakabukubaĩmisbu Jericó anu habe hiweabu hatu yamawakĩ Israelbũ Raabe tenãma inibukiaki.

³² Matũ shenipabũ Deus ikũwãkĩ Gideão inũ, Baraque inũ, Sansão inũ, Jefté inũ, Davi inũ, Samuel inũ, Deusũ hãtxa yuishunika betsa betsapabũ haska wakubainibu ana ẽ matu yuikatsi ibiakĩ haska washũ ẽ matu yui keyutirumaki.

³³ Betsabũ Deus ikũwãkĩ shanẽ ibu betsabũ mae mebinibukiaki. Betsabũ Deus ikũwãkĩ hatũ mae anu shanẽ ibukĩ hatu pe hiwemakubainibukiaki. Betsabũ Deusũ yubaka hãtxa ikũwãkĩ Deusũ kuxipa bitã hatuna wakubainibukiaki. Betsabu inu pubẽbu anu yunukĩ hatu bitxiabu Deus ikũwaĩwẽ taeshũ hawẽ kuxipawẽ Deusũ hatu nemashuna habu piama inikiaki.

³⁴ Betsabu itxakawakĩ tenãnũ, iwanã, txi merã hatu putabu Deus ikũwãkĩ hawẽ kuxipawẽ txi nematã hawa menuama kaĩnibukiaki. Betsabu nupe hawẽ detenameti bestiwẽ hatu detepanãbũ Deus ikũwaĩbuwẽ taea pashanibukiaki. Haskakẽ huĩti babubũ ikũhairawakĩ taewaibu Deusũ hatu kuxipa wakubainaya nawabũ Deusũ enabuki sinataibu detekatsis ikaibu maemakĩ hatu pashamanibukiaki.

³⁵ Ha inũ, betsarã, aĩbu betsabũ hatũ bakebu mawa manukĩ Deus ikũhairawaibu Deusũ hatu bestẽwãshunikiaki. Hamẽ huni betsabũ Deusũ hãtxa txibãkubainaibuwẽ taeshũ hatuki sinatakĩ hatu itxakawakĩ haska habũ abuai keska biama pashama hakia mawa ana bestẽtã hiwea pepa bishanai xinaĩ mawakubainibukiaki.

³⁶ Ha inũ, betsabũ Deusũ hãtxa ikũwãmisbu nuitapawakĩ hatu kashewakĩ betsabu kuxa kuxa akĩ betsabu mane dispiwẽ neshatã hatu bitximapaunibukiaki.

³⁷ Ha inũ, betsarã, Deus ikũwaĩwẽ taeshũ betsabu mãkãwẽ hatu tsaka tsaka akĩ hatu tenãpakeaibũ betsabu hawẽ hi nisatiwẽ hatu meshtekĩ nisanibukiaki. Deus hatu danãmakatsi ikĩ hamapai xarabu bika hatu tenemakĩ hatũ nupe txaipawẽ betsabu hatu detekĩ tenaĩbũ betsabu itxakawakĩ hatu nuitapawabu pashai hamakiri kakĩ txashuwã bitxi tari besti sawea yumãhairakubainibukiaki,

³⁸ habu haskanu hiwetirubumabia mae txakabu hanu tsua hiwetirubumanu buni yuinaka keskai mati tenãmã tãpe anu hiwekubaunirã. Haskai yumãkubainaibũ habũ hatu itxakawaibu hatu binuhairabiakẽ hunibu txakabũ hawa hatu kẽwãma hatu danã bestikubainibukiaki.

³⁹ Haskabia habũ Deusũ yubani xinãkĩ ikũwaĩbuwẽ taeshũ hawẽ yubaka hatu uĩmariamabia Deus hatuki petxiama hatu unãti watã hatuwẽ benimakũkainikiaki.

⁴⁰ Deusũ hatu haska wakinã, haska yubakani habu bebũshũ besti akatsi ikama nukubukiriri xinãkĩ hanus nuku shuku watã haska yubakani pehaira nuku inãkatsi nuku hatube itxawashanikiki, hiwekuĩa anu nuku hatube hiwemakinã.