Hebreus 1 - Kaxinawá Bíblia (BR)

Natiã Deusũ hawẽ bakewẽ hawẽ hãtxa nuku unãmanikiaki, na hãtxarã

¹ Hãtxa pepa ẽ matu bumai uĩkĩ nĩkairakãwẽ. Ha dukunã, nukũ shenipabube Deus hãtxairã, hawẽ hãtxa yuishunika tibiwẽ hawẽ hãtxa hatu yuimakĩ hawẽtxaĩs hatu yusĩkĩ betsa tibiwẽ tashnimakĩ hatu yuikubainiki.

² Haska wabiakubaĩkĩ hawẽ bake kuxipa watã mai hirabi dasibi damiwamanishũ dasibi ibu wamanishũ natiã hawẽ henekĩ hawẽ huni bake hãtxamakĩ Epa Deusũ hawẽ hãtxa nuku unãmaniki. Haskakiri matu ana yusĩnũ nĩkakãwẽ.

³ Hawẽ Epã kuxipaya txashakapa hawẽrua keskaritũ dasibi betsa betsapa damiwani hawẽ hãtxa kuxipawẽ mekekubaĩmiski, hau hawa benuyamanũbunã. Ha inũ, hawẽ Epa nuku daewashuni mawakĩ nukũ txakabu buatã hawẽ Epa kuxipahaira dasibi binu keyuatũ yusiuri tsauwa nai anua ma habe shanẽ ibukũkainikiaki.

Deusũ bake pepatũ nai tsumabu binu keyunikiaki, na hãtxarã

⁴ Hau Jesusũ dasibibu yunu keyukubaĩshanũ Deusũ yuikĩ: “Narã, ẽ bakeki”, akĩ nai tsumabu dasibi hatũ kuxipa binumaniki, hawẽ kena tushkutima inãkinã.

⁵ Deus hawẽ bakekiri hãtxani matu yuinũ nĩkakãwẽ. Deusũ hawẽ nai tsuma betsa yuikĩ: “Mĩ ẽ bakeki”, akĩ betsa yuitaskama inikiaki. Hakia hawẽ bake bestikiri hãtxairã, eskaniki: “Mĩ ẽ bakerã, natiã ẽ hiwea mia inãkĩ ẽ mia yunuaii”, aniki. Ha inũ, hawẽ nai tsumabukiri haska yuiamabia hawẽ bakekiri yuikĩ: “Earã, ẽ hatũ epa ikũkaĩshanaii, hawenarã. Harã, ẽ bake ikũkaĩshanikiki, enarã”, Deusũ arianiki. Hakia hawẽ nai tsumabu hawẽ bakebumawẽ taea haska hatu yuitaskama iniki.

⁶ Kene betsa anushũ hawẽ bake bestitxai nukũ Hutxi Kayabi Iuwa yurabube hiwemashanaikiri hatuki txanikĩ yuikĩ: “Hau dasibi ẽ nai tsumabũ ẽ bake duawakĩ kẽwãriashanũbũwẽ”, arianiki.

⁷ Hakia hawẽ nai tsumabukiri yuikĩ: “Ẽ daya hau ea ashunũbũ niwe birenepa inũ txi here kuxipa keska wakĩ ẽ nai tsumabũ hau daya betsa betsapa ea habuã ashũkubaĩshanũbũ ẽ hatu yununiki”, anikiaki.

⁸ Hanushũ hawẽ bakekiri yuikĩ: “Deusuũ, mia shanẽ ibuirã, mĩ ea keska shanẽ ibui ikibi ipakeshanaii, shanẽ ibui hawa txakabu hayamarã.

⁹ Hawara pepa abukĩ hamapai txakabu mĩ danãmisrã, mĩ haskamiswẽ taeshũ ea ẽ mĩ mekenika Deusũ ẽ mia katuaki. Sheni mashu akĩ unãti wakĩ ẽ miwẽ benimaii, mĩ haibuaibu keskawama hatu mia binumakinã”, aniki.

¹⁰ Ana hawẽ bake yuikĩ: “Shanẽ Ibuũ, hawa hayamahairabiakẽ mianã, damiwakĩ taewakĩ nai inũ mai hirabi ibubis mĩ damiwaniki.

¹¹ Miarã, hawa betsama mĩ ipakeshanaii. Hakia mĩ dami wanirã, keyushãkanikiki, tari txukai keskairã.

¹² Tari katũkĩ akawamisbu keska wakĩ dasibi tsuãra tari pekatã betsa sawemis keska wakĩ nai inũ mai mĩ ana bena washanaii. Hakia miarã, maei mĩ betsatirumahairaki, mĩ hiwea keyuisma mĩ hayarã”, aniki.

¹³ Hanushũ Deusũ hawẽ nai tsumabu betsa eska hatu yuitaskama iniki: “Miki sinatakĩ mia danaĩbu kupikĩ ẽ hatu mia maemakĩ keyumariama manai ẽ yusiuri tsauyuwe”, aki hawẽ bakekiri besti hãtxanikiaki, hawẽ nai tsumabukiri yuiamarã.

¹⁴ Ha inũ, Deusũ hawenabu kayabi habũ hiwea ikibi ika bitã nũ pashashanaibu nuku yauxikĩ hawẽ nai tsumabũ hau nuku mekekubainũbũ Epa Deusũ hatu yunukubaĩmiski. Dasibi Deusũ nai tsumaburã, yushĩki, habũ Deusũ daya ashũmisburã.