Filipenses 4 - Kaxinawá Bíblia (BR)

¹ Ẽ betsabu inũ ẽ puibuũ, ẽ matu abutxakayamai inũ, ẽ matuwẽ nuiai inũ, ẽ matuwẽ benimaiwẽ inũ, matuwẽ taeshũ Deusũ ea manakua ẽ bishanaiwẽ taea xinaĩ ẽ matu ana uĩ kakatsis itxakayamaii. Ẽ matu haska xinãyã txĩtuãma nukũ Shanẽ Ibu txibãpakekãwẽ.

Ikũwaĩbu haska xinaĩ hiwetikiri Paulõ hatu yununikiaki, na hãtxarã

² Evódia inũ Síntiqueẽ, nukũ Shanẽ Ibu ikũwaĩ mã nukũ puibu matuwẽ nuikĩ ẽ matu xinaiĩ. Nukũ Shanẽ Ibu ebe mã dayashũbiamis mã yuãnanãrabeai ẽ matu nĩkairã, haskama menã daenamerikãwẽ, ẽ matu yunuairã.

³ Haska inũ, miarã, mĩ txĩtuĩsmawẽ taeshũ mia yununũ nĩkawe. Nukũ pui dabe Evódia inũ Síntique ea hatu merabewashũshãwẽ, hau daenamenũbunã. Clemente inũ merabenanika betsabu ha aĩbu dabebetã Cristokiri kakape ẽ yusĩayã habũ ea putama ea merabewai bika teneriakubainibuki, haburã, hatũ kena tibi ha hiwekuĩti unaki ma hatũ kena Deusũ hatu kenekĩ netãnikirã.

⁴ Nukũ Shanẽ Ibu ikũwaĩnã, benimarikãwẽ. Ana habias ẽ matu yuaii. Heneama benimarikãwẽ!

⁵ Hau dasibibũ matu unãnũbũ ikũwaĩ pepabu ikubaĩkãwẽ, ma nukũ Shanẽ Ibu hua kemaikikirã.

⁶ Haska inũ, ana hamapaiwẽ dabanã iyamakãwẽ. Hakia Deusbe hãtxakĩ yukai inũ kẽwaĩnã, mĩ hamapai hakiri shabakabi yui txanikubaĩkãwẽ. Hanushũ Deusũ matu nĩkashũ ashũkẽ hawẽ duapa kẽwãkubaĩkãwẽ.

⁷ Mã haska waibu Deusũ unãnuma matu hiwemakĩ haska tsuã xinãkĩ nĩkatirumawẽ Deusũ hawẽ unãnumawẽ matũ huĩti inũ matũ xinã mekekubaĩshanikiki, Jesus Cristo nĩkakĩ mã txibaĩwẽ taeshunã.

⁸ Ẽ betsabu inũ ẽ puibuũ, kenekĩ ẽ ma matu keyushunai ea nĩkairakãwẽ. Eska tibi pepa xinãkãwẽ. Dasibi hãtxa kayabi inũ, dasibiwẽ pepa wai nũ haki mesetiru inũ, dasibi nũ kanetiruma inũ, dasibi pepas inũ, dasibi hawẽ nũ xinã txãkãtiru inũ, dasibibu tsuara hawẽ pepawẽ kẽwãmisbu inũ, haska tibi hatukiri xinã kayabikubaĩkãwẽ, haskakĩ Deus benimawakinã.

⁹ Ẽ hãtxa nĩkakĩ ea uĩkĩ hawara mã tapĩni inũ ẽ matu yusĩkubainima heneama txibãkubaĩkãwẽ, mã haskaibu nukũ Epa Deus unãnumatũ matu heneama merabewapakeshanikikirã.

Filipos anuabu Paulõ hatu kẽwãnikiaki, na hãtxarã

¹⁰ Bari betsatiã mã ea merabewani keskai mã ana ewẽ dabanã ikaya ẽ Shanẽ Ibuwẽ ẽ benimatxakayamaii. Haskakẽ mã ea hakimakiri ẽ xinãmaki. Hakia matũ hawara mã ea bumatirubia natiã ẽ txaikẽ haska washũ mã hawaira ea merabewatirubumaki.

¹¹ Haska inũ, na haska matuki txanirã: “Ẽ nuitapaikiri ea merabewai bekãwẽ”, ishũ ẽ matu yuiamaki. Hakia hawara ẽ haya inũ hawara ẽ hayama xinaĩ benimai haska tibi mei ẽ ma beyakũkainaii.

¹² Haskai hiwetirã, ma ẽ unaiĩ, nuitapai hiweti inũ, nuitapama piti itxapaya hiweti inũ, hamapai bika betsa betsapa mei benimai inũ, buni tenei inũ, hanu piti itxapa hayakẽ nũ teshewai inũ hawa hayamakẽ ẽ nuitapairã, haska ẽ beyakũkainaii, hawawẽ nui kemuamarã.

¹³ Hanushũ Cristõ ea kuxipa waya hawẽ taeshũ dasibi teneshũ ẽ akĩ keyushũtiruki.

¹⁴ Ẽ haskabiaya matubunã, ewẽ nuikĩ ẽ bika teneai mã ea merabewakubainirã, mã ea haska wayamarã, matukirirã, peki.

¹⁵ Hanu matũ mai pakea Macedônia anua kashũ Deusũ kakape ẽ matu yusĩbaini ana mae betsa tibi anu ẽ yusĩkĩ taewakubainaya hanua matu anua ẽ kaĩkainaya ikũwaĩbu betsabũ ea merabewabumabiakẽ mã Filipos anuabũ besti matũ pei ea bumakĩ mã ea merabewaniki, haskai merabenãti ẽ matu yusĩma haska ẽ yusĩa txibãkĩ hiwea ẽ matu tapĩmaima hanushũ hawẽ taeshũ matũri mã ea merabewanibuki.

¹⁶ Eska ea wakinã, Tessalônica mae ewapa anushũ ẽ hatu yusĩayã hanu hawẽtxaĩs mã ea pei bumakubainibuki, hawẽ ẽ hamapai tibi ẽ binunã.

¹⁷ Haskakẽ pei ẽ matu ea akamabia mã ea merabewamiswẽ taeshũ matũ pepa Deusũ hau matukiri ana xinãshanũ haska ẽ matukiri xinaiĩ.

¹⁸ Epafrodito yunukĩ matũ pei mã ea bumaima dasibi ẽ bimaki. Hawẽ ẽ hamapai ẽ paka keyubia teshe ẽ hayayuaki. Haska inãkuĩ ea yunukinã, Templo anushũ inĩti pepa inĩhaira kuakĩ Deus inãbu haska shetei Deus benimamis keskai eari matuwẽ ẽ habiaskariaii.

¹⁹ Mã ea merabewakĩ ea hawa yupawaismakenã, ẽ Epa Deus pepahairatũ matu manakukĩ matũ hamapai tibi matu inãkubainikiki, hawẽ bake Jesus Cristowẽ taeshũ matu duahairawakinã.

²⁰ Haskakẽ nukũ Epa Deus pepahaira duawakĩ kẽwanãkãwẽ, heneamarã. Haskakirã.

²¹ Ea ẽ Paulonã, ẽ matukiri pe xinãkĩ mã ma dasibi Jesus Cristõ enabu meribikẽ ẽ hãtxa ẽ matu bumaii. Nukubetã Jesus ikũwaĩbu ebe hiweabũri matukiri xinãkĩ hatũ hãtxa pepa matu bumariakanikiki.

²² Ha dikabi dasibi habũ Jesus ikũwaĩbu inũ Roma shanẽ ibuhairatũ hiwe anu dayashunaibũri hatũ hãtxa matu bumariakanikiki, matu xinaĩ matuwẽ nuikinã.

²³ Nukũ Shanẽ Ibu Jesus Cristõ hau matu duawakĩ xinã txãkãwãkubainũwẽ. Hatiski, ẽ hãtxarã. Paulo