Filipenses 3 - Kaxinawá Bíblia (BR)

Paulõ hiwea shenirã, hamẽkiaki, na hãtxarã

¹ Ẽ betsabu inũ ẽ puibuũ, Jesusũ nuku mekeawẽ taea benimanãkãwẽ. Ẽ matu yuiyamarã, habiaskari ẽ ana matu keneshunairã, enarã bikamaki. Matu keneshũkinã, mã hawẽ hiwenũ merabewakĩ ẽ matu ashuaiĩ.

² Ha huni yusĩnã meketikiri parananaĩ itxakanikai daya pepa wanikapaikĩ matu yusĩkĩ judeubu keska matu hiwemanũ ika ikanikiki, dateyamakaĩ matũ hina kubitxi meshtemanũ ikarã. Matu haska wanũ ikaibu uĩrakãwẽ.

³ Haska nũ yunu kayabiaiburã, nũ nukuki, nũ habũ Deus kẽ kayabi waiburã. Jesus Cristõ ma nuku pewashuniwẽ taeshũ Deusũ Yushĩ Pepatũ nuku kuxipa wakĩ merabewaya hawara nukũmebi nukũ yura anua hina kubitxi bemakisa nũ meshtemis keskawẽ nũ kẽtirubumaki.

⁴ Earã, haska xinãti dabanẽ emebi keĩ ẽ yurakiri inũ ẽ hiweakiri dasibibu ẽ binutiruki.

⁵ Deusũ Abraão yununiwẽ taeshũ ẽ kaĩxina oito shabatiã ẽ hina kubitxi ea meshtenibuki. Ẽ Israelĩ baba betsa Benjamim shukua anua eari ẽ kainiki. Haskawẽ taea ẽ ibubu Hebreokẽ eari ẽ Hebreoki. Ha inũ, hawẽ hãtxa Deusũ Moisés yusĩni txibaĩ dasibi betsabu binui ẽ fariseu iniki.

⁶ Ha inũ, Deus duawanũ ishũ Jesus Cristo ikũwaĩbu ẽ hatu itxakahairawayukubainiki, haska dabanẽ ẽ xinã ẽ unãnepaiwenã. Ha inũ, Deusũ Moisés yusĩni ikũwãkĩ txibaĩ hawa kaneama ẽ pepahairakũkainaya ekiri hawa txakabu tsuã yuitiruma inibuki.

⁷ Na haska tibi Moisés yusĩa txibaĩnã, ẽ haki txiti ikarã, enarã, ewapa benuisma ẽ xinãniki. Hakia natiã Cristowẽ taearã, ẽ ana hawẽ teatirumaki.

⁸ Haska tibi hayai ẽ hawẽ kuxipa biakũkaini natiã ẽ uĩanã, hamẽki. Jesus Cristo ẽ mekenã wakĩ ẽ unaĩnã, hawenarã, binuhairaki, ẽ Shanẽ Ibu kayabirã. Haskakẽ Cristowẽ taeshũ dasibi hamapai eanua txakabu ẽ benu keyuniki. Haska wakinã, ẽ hiwea sheni txaka keska wakĩ henetã hanua haki maei ẽ hawẽ yuraniki,

⁹ haki nukutã haki dasirã. Haska inũ, Moisés hãtxa txibaĩ hawẽ nuku ibubis nũ pepahairakũkaĩkatsis ikaiwẽ en dayamiswẽ ea akama Cristo ewẽ nui eki nukutã ea xinã betsa wama ẽ ikũwãniwẽ taeshũ Deusũ hawena ea wakĩ ẽ txakabu ea buashunikẽ Jesus besti ẽ txibãkubainaii.

¹⁰ Haskakĩ Cristo ana ẽ unãhairakatsis ikaii. Haska inũ, hawẽ Epa Deusũ mawabu ana bestẽwãti kuxipa ẽ hayakatsis iriaii. Haska inũ, ana haki dasihairanũ ika ha nuitapawanibu keska eari dateama mei mawakĩ ẽ txibãkatsis ikaii.

¹¹ Txĩtuãma ẽ haskakũkainaya Jesusũ enabu hiweabu inũ mawabu mai anua nai anu hatu iyunũ ika huaya hatube dasikatsi ẽ manakubainaii.

Jesus txibaĩ pepakũkaini haki nukutikiaki, na hãtxarã

¹² Jesus besti txibãkatsis ibiai ẽ pepai keyuriama inũ ẽ tapĩ keyuriamariki. Hakia pepa besti ẽ ikũkaĩshanũ Jesus Cristõ ea abukĩ ea katuniwẽ taea hawẽ xinã txibaĩ pepatã haki nukukatsis iki heneama manai ẽ txĩtũkiranamaki.

¹³ Ẽ betsabu inũ ẽ puibuũ, ẽ pepai keyuriamabia haska ẽ hiwea sheni ẽ ikũkaini hakimai txipu watã unuri ẽ hiwekuĩkatsis ikaiwẽ taea hariri uĩbaini bikabiakẽ nĩkamas ẽ txĩtuãmaki.

¹⁴ Haska Jesus Cristowẽ nuku Deusũ yubani haska nai anua haki nukukĩ haria bishanũ ika nĩkamas Jesus ẽ dayashũkũkainaii.

¹⁵ Tsuabũra nũ ma ikũwã kayabiai pepabunã, haska xinãnãkãwẽ. Ẽ xinaĩ keska tsuabũra habias keska mã haska xinãmakẽ haska ha hamapaikiri Deusũ yusĩkĩ matu uĩmakĩ matu unãmatiruki.

¹⁶ Nũ ma haska tapĩmaburã, haskas xinãkĩ betsa wama txibãkubaĩkĩ heneyamanãkãwẽ.

Jesuswẽ taearã, nukũ mae kayabi nai anukiaki, na hãtxarã

¹⁷ Ẽ betsabu inũ ẽ puibuũ, haska ea inũ ea merabewamisbu nũ hiwekũkaĩkĩ nũ matu uĩmamis nukũ aka nũ haskai hiwemis nuku xinãkĩ txibãkĩ nuku mawakubaĩkãwẽ.

¹⁸ Tsuabura itxapa matube hiweabũ hatũ hiwea sheni henekĩ betsa wakatsi ikama Cristo cruzki hatu mawashuni xinãma haki sinatai keska hiweabu haskabukiri hawẽtxaĩs ẽ matu yuimiski. Natiã haska xinaĩ kashayabi ana hatukiri ẽ matuki txaniaii.

¹⁹ Ha yurabu haskaburã, nukũ Deuskiri xinãma habũ deusrã, pikekĩ pi bestimisburã, ha inũ, hawẽ kẽmisburã, yurabu hawẽ dakebiaibũ habu dakeama hamapai txakabu na mai anua besti xinãkĩ abukĩ akubaĩmisbu hanu bari hawẽ heneaitiã habu benunũbarikanikiki, Deusũ hatu kupiarã.

²⁰ Hakia nuku ikirã, nũ haskamaki. Nukũ mae kayabi nai anuki. Haska nũ manakaiburã, nukũ mekenika nukũ Shanẽ Ibu Jesus Cristo ana hushanai nũ manakakubainaii.

²¹ Hanua hushũ habiaskari kuxipawẽ hamapai dasibi meke keyumistũ nukũ yura babu atimapa betsa wakĩ benawashanikiki, hawẽ yura txasha keska nuku wariakinã.